រាជធានីភ្នំពេញ ៖ បុរសម្នាក់បើករថយន្តសណ្តោងធ្ងន់ធំមួយគ្រឿងបោះពួយយ៉ាងលឿនឆ្លងកាត់ស្តុបបំបែកជាបួនទាំងបំពានភ្លើងសញ្ញាចរាចរណ៍ក៏ត្រូវរថយន្តហាយលែនឌ័រមួយគ្រឿងទៀតបុកចំពាក់កណ្ដាលពេញទំហឹង កាលពីវេលាម៉ោង៣ និង៣០នាទីយប់ ថ្ងៃ២៨ ខែតុលា ឆ្នាំ២០២០ត្រង់ចំណុចស្តុបបាគូ តាមបណ្ដោយផ្លូវ២១៧ កែងផ្លូវ៥០ម៉ែត្រ…
រាជធានីភ្នំពេញ ៖ បុរសម្នាក់បើករថយន្តសណ្តោងធ្ងន់ធំមួយគ្រឿងបោះពួយយ៉ាងលឿនឆ្លងកាត់ស្តុបបំបែកជាបួនទាំងបំពានភ្លើងសញ្ញាចរាចរណ៍ក៏ត្រូវរថយន្តហាយលែនឌ័រមួយគ្រឿងទៀតបុកចំពាក់កណ្ដាលពេញទំហឹង កាលពីវេលាម៉ោង៣ និង៣០នាទីយប់ ថ្ងៃ២៨ ខែតុលា ឆ្នាំ២០២០ត្រង់ចំណុចស្តុបបាគូ តាមបណ្ដោយផ្លូវ២១៧ កែងផ្លូវ៥០ម៉ែត្រ ស្ថិតក្នុងសង្កាត់ដង្កោ ខណ្ឌដង្កោ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញរថយន្តមួយគ្រឿងម៉ាកហាយលែនឌ័រ ពណ៌ទឹកប្រាក់ ពាក់ស្លាកលេខ ភ្នំពេញ 2AL-6583 បើកបរជាលក្ខណៈគ្រួសារ៤ទៅ៥នាក់ តាមបណ្ដោយផ្លូវ២១៧ ទិសដៅពីជើងទៅត្បូង និងក្នុងល្បឿនយ៉ាងលឿន។ លុះមកដល់ចំណុចស្តុបកើតហេតុភ្លើងសញ្ញាចរាចរណ៍ពណ៌បៃតងជាភ្លើងអទិភាព រថយន្តខាងលើក៏បានបើកឆ្លង។
ស្របពេលនោះដែលក៏ស្រាប់តែមានរថយន្តសណ្តោងធន់ធំមួយគ្រឿងទៀតម៉ាក FUSO ពណ៌លឿង ពាក់ស្លាកលេខ ភ្នំពេញ 3C-2890 បើកបរដោយបុរសម្នាក់ តាមបណ្ដោយផ្លូវ៥០ម៉ែត្រ ទិសដៅពីកើតទៅលិច និងក្នុងល្បឿនយ៉ាងលឿន បានបើកឆ្លងកាត់ស្តុបទាំងបំពានភ្លើងសញ្ញាចរាចរណ៍។ ខណៈពេលនោះក៏រថយន្តហាយលែនឌ័របានជ្រុលទៅបុកចំពាក់កណ្ដាលរថយន្តសណ្តោងពេញទំហឹង បណ្ដាលឱ្យរថយន្តហាយលែនឌ័ររងការខូចខាតក្រពឹតមួយកំណាត់មុខ និងអ្នករួមដំណើរម្នាក់រងរបួសស្រាល។
ចំណែកឯរថយន្តសណ្តោងបានវិលក្បាលត្រឡប់ក្រោយរងការខូចខាតយ៉ាងដំណំ រីឯអ្នកបើកបររថយន្តសណ្តោងបានចុះរត់គេចចេញពីកន្លែងកើតហេតុភ្លាមៗតែម្ដង។
ក្រោយពេលកើតហេតុ សមត្ថកិច្ចមូលដ្ឋានក៏បានចុះមកធ្វើការអន្តរាគមន៍ និងរាយការណ៍ទៅសមត្ថកិច្ចជំនាញឲ្យចុះមកវាស់វែងស្ទូចរថយន្តទាំងពីរគ្រឿងយកទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញរង់ចាំធ្វើការដោះស្រាយទៅតាមផ្លូវច្បាប់ជាបន្តទៀតនៅពេលក្រោយ៕ ដោយ ៖ យឹម ឈឿន
ចែករំលែកព័តមាននេះ