វៀតណាម ៖ ព្យុះ Molave ជាព្យុះដែលមានឥទ្ធិពលបំផុត ក្នុងរយៈពេល២០ឆ្នាំចុងក្រោយនេះ បានទៅដល់ឆ្នេរសមុទ្រភាគកណ្តាលរបស់ប្រទេសវៀតណាម ដោយនាំមកនូវភ្លៀងធ្លាក់ខ្លាំង និងខ្យល់បក់ខ្លាំង ។
មជ្ឈមណ្ឌលព្យាករណ៍ឧតុនិយមរបស់វៀតណាម និយាយថា នៅម៉ោង៨ព្រឹក ថ្ងៃទី២៨តុលានេះ កម្លាំងខ្យល់មានល្បឿន ១៣៥គីឡូម៉ែត្រ ក្នុងមួយម៉ោង វាមកដល់ទីក្រុងដាណាងភាគកណ្តាល ។ វាត្រូវបានគេរំពឹងថា នឹងធ្វើដំណើរទៅទិសខាងលិច នឹងធ្វើឲ្យមានការបាក់ដី នៅលើខេត្ត Quang Ngai,ខេត្ត Quang Nam និងខេត្ត Binh Dinh នៅរសៀលថ្ងៃពុធដដែលនេះ ។
ព្យុះនេះបានចាប់ផ្តើម នៅខេត្តដាណាង នាពេលព្រឹកព្រលឹម និងមានខ្យល់បក់បោកខ្លាំង ដើមឈើជាច្រើនត្រូវដួល ។
គណៈកម្មាធិការគ្រប់គ្រងគ្រោះមហន្តរាយប្រទេសវៀតណាម បានដូនដំណឹងដល់ប្រជាជនមិនឲ្យចាកចេញពីផ្ទះរបស់ពួកគេ ចាប់ពីម៉ោង ៨យប់ នៅថ្ងៃអង្គារ រហូតមកដល់ថ្ងៃពុធនេះ ។
ទីប្រជុំជននានា ក្នុងខេត្ត Quang Nam ជាប់នឹងខេត្តដាណាង បានជួបប្រទះនឹងខ្យល់បក់ខ្លាំង និងដាច់ចរន្តអគ្គិសនី ។ នៅលើផ្លូវ មានដើមឈើជាច្រើន និងផ្ទាំងប៉ាណូ ត្រូវខ្យល់បក់វាយបំផ្លាញ ។
នៅតាមបណ្តោយឆ្នេរសមុទ្រ មានរលកកម្ពស់ ៥ ម៉ែត្រ ។ ព្យុះភ្លៀង និងខ្យល់បក់ខ្លាំង បណ្តាលឲ្យដើមឈើនៅកន្លែងជាច្រើនត្រូវដួល ហាងនានាត្រូវបានបិទ និងបិទឆ្នេរសាធារណៈ និងហាមឃាត់ការហែលទឹកសមុទ្រ ។
ចាប់តាំងពីថ្ងៃអង្គារម្សិលមិញ អាជ្ញាធរនៅខេត្តដាណាង និងខេត្តជិតខាងចំនួន៦ទៀត បានជម្លៀសប្រជាជនចំនួន ៤៥០,០០០ នាក់ ។
នៅពេលព្យុះ Molave ចូលសមុទ្រខាងកើត វាបានបង្កការបំផ្លិចបំផ្លាញ នៅក្នុងប្រទេសហ្វីលីពីន ដោយបានសម្លាប់មនុស្សយ៉ាងហោចណាស់ ៣នាក់ និងមានមនុស្សរាប់សិបនាក់ទៀតបានបាត់ខ្លួន ៕
សូមទស្សនាវីដេអូ មានដូចខាងក្រោមនេះ ៖
ចែករំលែកព័តមាននេះ