ខេត្តកំពង់ចាម ៖ ប្រជាពលរដ្ឋមកពីស្រុកកំពង់សៀម កងមាស ស្ទឹងត្រង់ និងក្រុងកំពង់ចាម ចំនួនជិត៤០០គ្រួសារ ដែលរងគ្រោះដោយសារតែជំនន់ទឹកភ្លៀងបាក់ច្រាំងទន្លេ និងរលំផ្ទះ ត្រូវបានទទួលអំណោយពីលោកបណ្ឌិត ហ៊ុន ម៉ាណែត អគ្គមេបញ្ជាការរងកងយុទ្ធពលខេមរៈភូមិន្ទ។ ពិធីនេះបានធ្វើឡើងនៅទីវាលមុខសាលាខេត្តកំពង់ចាម នារសៀលថ្ងៃទី២៧ តុលា ២០២០។
លោកនឿន ណុយ អនុប្រធានគណៈកម្មការគ្រប់គ្រងគ្រោះមហន្តរាយខេត្តឲ្យដឹងថា ឆ្នាំនេះទឹកជំនន់ទន្លេមេគង្គមិនមានអ្វីគួរឲ្យកត់សម្គាល់ ដោយសារតែកម្ពស់ទឹកបានត្រឹមតែ១២.៤៧ម៉ែត្រប៉ុណ្ណោះ។ ជាមួយគ្នានេះជំនន់ទឹកភ្លៀងរយៈពេល៣សប្តាហ៍កន្លងមកនេះ បាននិងកំពុងជះឥទ្ធិពលទៅលើតំបន់ទំនាបនៅក្នុងស្រុកភាគខាងលិចខេត្ត ដែលជាតំបន់ទំនាបបឹងទន្លេសាប បណ្ដាលឲ្យដំណាំស្រូវបណ្ដាញទឹករបស់បងប្អូនប្រជាកសិកររងផលប៉ះពាល់។
លោក អ៊ុន ចាន់ដា អភិបាលខេត្តប្រធានគណៈកម្មការគ្រប់គ្រងគ្រោះមហន្តរាយខេត្តមានប្រសាសន៍ថា រដូវការចេញវស្សាដូច្នេះនឹងត្រូវអស់ទឹកភ្លៀងតែនៅឆ្នាំ២០២០នេះ ភ្លៀងបែរជាបង្អុរធ្លាក់នៅចុងរដូវ បណ្ដាលឱ្យប៉ះពាល់ដំណាំកសិកម្ម ក្នុងនោះមានស្រុកបាធាយ ជើងព្រៃ ដោយជន់ពី បឹងទន្លេសាបជាដើម ។ ក្រុងកំពង់ចាម កន្លងមក មិនដែលជន់លិចដោយសារទឹកភ្លៀងនោះទេ តែនៅឆ្នាំនេះបែរជាភូមិបឹងកុកទី២ សង្កាត់បឹងកុក ត្រូវបានទឹកភ្លៀងមកជន់លិច បណ្ដាលឲ្យប៉ះពាល់ចំនួន១៩៣គ្រួសារ។
លោក អ៊ុន ចាន់ដា ប្រធានគណៈកម្មាធិការគ្រប់គ្រងគ្រោះមហន្តរាយខេត្តបន្តថា កន្លងមកនេះ ផ្លូវជាតិលេខ៧ ក្នុងស្រុកកំពង់សៀម ត្រូវបានទឹកភ្លៀងជន់លិចហូរកាត់ផ្លូវថ្នល់រហូតដល់បិទចរាចរណ៍មួយព្រឹក ដោយប្រជាជនធំៗត្រូវបើកវាងតាមស្រុកកងមាសវិញ។ ដោយឃើញការលំបាកបែបនេះ រូបលោកបានដឹកនាំកម្លាំងចុះពិនិត្យផ្ទាល់ឃើញប្រព័ន្ធលូនៅក្នុងស្រុកកំពង់សៀម មានដុំថ្ម និងគល់ឈើ កត្តានេះហើយដែលធ្វើឲ្យស្ទះទឹកមិនអាចហូរកើត ហើយនៅសង្កាត់បឹងកុក ក៏ត្រូវបានចុះអន្តរាគមន៍ក្នុងរយៈពេលពីរថ្ងៃ ធ្វើឱ្យទឹកភ្លៀងបានស្រក និងវិលត្រឡប់ទៅរកភាពប្រក្រតីវិញ។
ជាមួយនោះ ក៏បានចាប់ឱ្យប្រធានមន្ទីរសាធារណការខេត្ត មន្ទីរអភិវឌ្ឍន៍ជនបទ មន្ទីរធនធានទឹក និងឧតុនិយម និងមន្ទីរកសិកម្ម រុក្ខាប្រមាញ់ និងនេសាទខេត្ត ត្រូវប្រញាប់ចុះស្រង់ទិន្នន័យនៃផលប៉ះពាល់ដែលបង្កឡើងដោយជំនន់ទឹកភ្លៀងធ្វើយ៉ាងណាអន្តរាគមន៍ជួសជុលឲ្យបានឆាប់រហ័ស និងត្រៀមចែកស្រូវពូជជូនប្រជាពលរដ្ឋ។
លោក រិន វិរៈ សមាជិកអចិន្ត្រៃយ៍យុវជនគណបក្សថ្នាក់កណ្ដាលតំណាងលោកបណ្ឌិតហ៊ុន ម៉ាណែត មានប្រសាសន៍ឱ្យដឹងដែរថា តាមរយៈការស្នើសុំរបស់អាជ្ញាធរខេត្តត្រូវបានលោកបណ្ឌិត ហ៊ុន ម៉ាណែត អគ្គមេបញ្ជាការរងកងយោធពលខេមរៈភូមិន្ទមានការយកចិត្តទុកដាក់ និងបានផ្ដល់អំណោយចែកជូននាឱកាសនេះ។ នៅឆ្នាំនេះ ប្រទេសកម្ពុជាបានរងគ្រោះដោយកត្តាពីរ ក្នុងនោះរួមមាន ៖
១-ជំងឺ COVID-19 បានបង្កផលប៉ះពាល់នៅក្នុងប្រទេសកម្ពុជា រួមទាំងបណ្ដាប្រទេសនានាលើពិភពលោកសរុបជាង២០០ប្រទេស ក្នុងចំណោមនោះនៅសហរដ្ឋអាមេរិកមានការឆ្លងជំងឺនេះរហូតទៅដល់ជាង១លាននាក់ និងពលរដ្ឋបាត់បង់ជីវិតចំនួនជាង ២០ម៉ឺននាក់។
លោក រិន វីរៈ បានបន្តថា ក្រោមការយកចិត្តទុកដាក់របស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា គឺបានដាក់ចេញនូវយុទ្ធសាស្ត្រក្នុងការប្រយុទ្ធប្រឆាំងជំងឺ COVID-19 មានប្រសិទ្ធភាពដោយនៅសកម្ពុជា មានចំនួន២៨៧នាក់ ក្នុងនោះបានជាសះស្បើយស្ទើរតែទាំងអស់។ ហើយចំពោះអ្នកដំណើរអ្នកដំណើរតាមជើងហោះហើរយន្តហោះដែលមកពីបរទេសតម្រូវឲ្យធ្វើចត្តាឡីស័ក១៤ថ្ងៃ ។
២- គ្រោះមួយទៀត គឺគ្រោះជំនន់ទឹកភ្លៀង ក្នុងនោះមាននៅខេត្តបន្ទាយមានជ័យ បាត់ដំបង និងខេត្តពោធិ៍សាត់ បណ្ដាលឱ្យបាត់បង់ជីវិតប្រជាពលរដ្ឋចំនួន ៣៩នាក់ និងរងការខូចខាតផលដំណាំរាប់សែនហិចតាផងដែរ៕
ចែករំលែកព័តមាននេះ