អាកាសធាតុក្តៅបង្កឱ្យអូស្ត្រាលីប្រឈមមុខគ្រោះធម្មជាតិ
លោកដេវីដ ចូន នាយកផ្នែកព្យាករអាកាសធាតុនិងឧតុនិយមរបស់អូស្ត្រាលីបានប្រកាសដល់ពលរដ្ឋឱ្យប្រុងប្រយ័ត្ន និងទប់ទល់លើស្ថានភាពអាកាសធាតុកើនកម្តៅតាំងពីចុងខែឧសភា
លោកដេវីដ ចូន នាយកផ្នែកព្យាករអាកាសធាតុនិងឧតុនិយមរបស់អូស្ត្រាលីបានប្រកាសដល់ពលរដ្ឋឱ្យប្រុងប្រយ័ត្ន និងទប់ទល់លើស្ថានភាពអាកាសធាតុកើនកម្តៅតាំងពីចុងខែឧសភា ២០១៥ទៅ ។ ការប្រកាសនោះក្រោយពីត្រួតពិនិត្យអាកាសធាតុរួមមួយនៅក្នុងមហាសមុទ្រប៉ាស៊ីហ្វិកខាងកើតឃើញថាសីតុណ្ហភាពមធ្យមនៅលើផ្ទៃទឹកសមុទ្រកើនខ្ពស់ ព្រោះចរន្តខ្យល់នៅក្នុងសមុទ្រចុះខ្សោយ និងបង្កឱ្យកើតបាតុភូតសម្ពាធ «Elnino» ជាលើកដំបូងក្នុងរយៈពេល៥ឆ្នាំនៅអូស្ត្រាលីដែលបង្កឱ្យមានអាកាសធាតុក្តៅ និងបរិមាណទឹកភ្លៀងធ្លាក់ចុះ ។
ស្ថានភាពបែបនេះអាចបង្កឱ្យកើតគ្រោះរាំងស្ងួតធ្វើឱ្យមានភ្លើងឆេះព្រៃយ៉ាងឆាប់រហ័ស ខណៈពេលបាតុភូតសម្ពាធ Elnino នៅក្នុងឆ្នាំនេះចាប់ផ្តើមលឿនខុសប្រក្រតីរមែងកើតឡើងក្នុងអំឡុងពីខែមិថុនា ដល់ខែវិច្ឆិកា ។
ក្រៅពីនេះ សីតុណ្ហភាពនៅលើផ្ទៃទឹកមហាសមុទ្រប៉ាស៊ីហ្វិកខាងកើតដែលកើនខ្ពស់បានបង្កឱ្យប៉ះពាល់ដល់ស្ថានភាពអាកាសធាតុនៅក្នុងក្រុមប្រទេសភូមិភាគអាស៊ី ពិសេសនៅប្រទេសប៉ាពួអាស៊ី និងឥណ្ឌូណេស៊ី ជាប្រទេសស្ថិតនៅប្រជុំកោះ និងនៅក្បែរអូស្ត្រាលី ។ ស្របពេលជាមួយគ្នានេះខាងផ្នែកឧតុនិយមរបស់ជប៉ុនប្រកាសឱ្យពលរដ្ឋត្រៀមប្រុងប្រយ័ត្ននឹងគ្រោះធម្មជាតិ ទាំងខ្យល់ព្យុះ ខ្យល់កន្ត្រាក់ រន្ទះ ភ្លៀងខ្លាំង រលកនៅក្នុងសមុទ្រ និងទឹកជំនន់ ក្រោយពីព្យុះ «Noul» បោកបក់ពីហ្វ៊ីលីពីន ឆ្ពោះទៅភាគខាងត្បូងប្រទេសជប៉ុនដោយល្បឿនខ្យល់មានប្រហែល១៨០គីឡីម៉ែត្រក្នុងមួយម៉ោង កាលពីថ្ងៃទី១២ ឧសភា និងបានរំកិលទៅកោះហុងស៊ូ ភាគកណ្តាលរបស់ជប៉ុននៅថ្ងៃទី១៣ ឧសភា ៕
ចែករំលែកព័តមាននេះ