រាជធានីភ្នំពេញ ៖ មិនត្រឹមតែបង្កើនការបង្វឹកនៅក្នុងស្រុកប៉ុណ្ណោះទេ សហព័ន្ធ កីឡាវាយកូនឃ្លីលើតុកម្ពុជា ក៏ប្រកាសពីការរៀបចំយុទ្ធសាស្ត្រដើម្បីត្រៀមខ្លួននៅក្នុងព្រឹត្តិការណ៍កីឡាស៊ីហ្គេមនៅក្នុងប្រទេសវៀតណាមនាឆ្នាំ២០២១ និងស៊ីហ្គេមនៅកម្ពុជានាឆ្នាំ២០២៣ ផងដែរ។
យុទ្ធសាស្ត្រទាំងនោះ គឺនឹងបញ្ជូនសមាសភាពឆ្នើមៗយ៉ាងហោច៨នាក់ ឱ្យទៅហ្វឹកហាត់នៅឯក្រៅប្រទេស ដែលនេះគឺជាការត្រៀមខ្លួនពីចម្ងាយដើម្បីមុខមាត់កម្ពុជា នៅលើសង្វៀនស៊ីហ្គេម។
យោងតាមបញ្ជាក់របស់លោក ស៊ុន សុទ្ធារិទ្ធ អគ្គលេខាធិការសហព័ន្ធកីឡាវាយកូនឃ្លីលើតុកម្ពុជា បានអះអាងថា សហព័ន្ធបានគិតគូរនិងត្រៀមខ្លួនរួចរាល់អស់ហើយសម្រាប់ស៊ីហ្គេមដែលធ្វើឡើងនៅក្នុងប្រទេសវៀតណាមនៅចុងឆ្នាំ២០២១ និងនៅប្រទេសកម្ពុជាដែលនឹងធ្វើឡើងនៅឆ្នាំ២០២៣ខាងមុខ។
លោកថា បើពុំមានការប្រែប្រួលទេ សហព័ន្ធនឹងបញ្ជូនកីឡាករដែលសម្រាំងចេញពីការជ្រើសរើសដោយសហព័ន្ធទៅហ្វឹកហាត់នៅប្រទេសចិន ដោយការបញ្ជូនទៅហ្វឹកហាត់នេះ គឺនឹងដំណើរការនៅចុងឆ្នាំ២០២០ ឬដើមឆ្នាំ២០២១ ខាងមុខនេះ ។ ការហ្វឹកហាត់នេះ គឺអាចនឹងមានរយៈពេលវែងផង ដើម្បីបង្កើនសមត្ថភាពឱ្យកាន់តែប្រសើរ សម្រាប់ការប្រកួតក្នុងពេលខាងមុខ ។ លោកអះអាងថា ការបញ្ជូនកីឡាករទៅហ្វឹកហាត់នៅក្នុងប្រទេសចិននេះ គឺមិនមែនគ្រាន់ធ្វើឡើងដោយការនឹកឃើញនោះទេ ពោលគឺមានការត្រៀមខ្លួនយ៉ាងច្បាស់លាស់នោះផង។
លោកថា បើគ្មានបញ្ហាកូវីដ-១៩ប៉ះពាល់ កីឡាករវាយកូនឃ្លីលើតុនឹងទៅហ្វឹកហាត់នៅក្រៅប្រទេសតាំងពីពេលនោះផង ។ ដូច្នេះហើយទើបគ្រាន់តែស្ថានភាពកូវីដ-១៩នេះ មានភាពធូរស្រាល ក៏ដាក់ផែនការបញ្ជូនកីឡាករទៅហ្វឹកហាត់នៅឯក្រៅប្រទេសតែម្ដង ។ លោកជឿជាក់ថា ការត្រៀមខ្លួនដែលកំពុងរៀបចំនេះ នឹងជួយបង្កើនសមត្ថភាពដល់កីឡាករ កីឡាការិនីកម្ពុជាឱ្យទទួលបានលទ្ធផលល្អ ក៏ដូចជាដើម្បីត្រៀមខ្លួននៅក្នុងព្រឹត្តិការណ៍ស៊ីហ្គេមទាំងពីរ។
លោក ស៊ុន សុទ្ធារិទ្ធ បានបញ្ជាក់ពីយុទ្ធសាស្ត្រនេះថា ដ្បិតតែពិភពលោក និងប្រទេសកម្ពុជា មានការផ្ទុះឡើង តែសហព័ន្ធមិនមានការធ្វេសប្រហែសនោះទេ គឺនៅតែមានការត្រៀមខ្លួនដោយក្នុងអំឡុងពេលក្រសួងអនុញ្ញាតឱ្យមានការហ្វឹកហាត់ឡើងវិញ ក៏សហព័ន្ធបង្កើននូវការហ្វឹកហាត់នៅក្នុងសហព័ន្ធផងដែរ ដោយការហ្វឹកហាត់នាពេលកន្លងមក ក៏ចាត់ទុកថានោះគឺជាការត្រៀមខ្លួនរបស់សហព័ន្ធផងដែរ ។
លោកបានទាំងរំពឹងថា អ្វីដែលខាងសហព័ន្ធត្រៀមខ្លួន នឹងជួយឱ្យសហព័ន្ធមានទំនុកចិត្តជាងមុន ។ លោកថា កីឡាករកម្ពុជានឹងទៅហ្វឹកហាត់នៅក្នុងប្រទេសចិនរហូតដល់៩ខែ ដើម្បីពង្រឹងសមត្ថភាព ។ លោកសង្ឃឹមថា ការហ្វឹកហាត់៩ខែក្នុង១ឆ្នាំ និង៩ខែក្នុង១ឆ្នាំ នៅប្រទេសចិន យើងនឹងអាចទទួលបានលទ្ធផលល្អប្រសើរនៅស៊ីហ្គេមឆ្នាំ២០២១ ហើយ រហូតដល់ស៊ីហ្គេមឆ្នាំ២០២៣ ក៏កាន់តែល្អប្រសើរ ។
លោកថា នៅក្នុងពេលនេះ កីឡាករ កីឡាការិនី មកពីក្លិប សមាគម នានា ក៏កំពុងត្រៀមខ្លួនក្នុងការចូលរួមការប្រកួតជើងឯកថ្នាក់ជាតិ នៅក្នុងឆ្នាំនេះ ដើម្បីឱ្យសហព័ន្ធស្វែងរកអ្នកឆ្នើមៗសម្រាប់ការទៅហ្វឹកហាត់នៅក្នុងប្រទេសចិននោះ។
លោក ស៊ុន សុទ្ធារិទ្ធ បន្តថា លោកសម្លឹង ឃើញកីឡាករ-កីឡាការិនីមកពីតាមខេត្តជាច្រើនរូប ដែលអាចនឹងមានសមត្ថភាពគ្រប់គ្រាន់ឱ្យសហព័ន្ធជ្រើសរើស ។ លោកបញ្ជាក់ថា ការប្រកួតដែលនឹងធ្វើឡើងនោះ ក៏ភាគច្រើនគឺជាកីឡាករកីឡាការិនីដែលឆ្នើមៗស្រាប់ ដោយលោករំពឹងថា បើបានកីឡាករមកពីខេត្តគឺជាសមាសភាពឆ្នើមនោះកាន់តែប្រសើរ ។ លោកនិយាយថា សម្រាប់សហព័ន្ធគឺ ចង់បានកីឡាករមកពីខេត្តច្រើនជាងនៅភ្នំពេញពីព្រោះគ្នានៅខេត្តមានលទ្ធភាពគេងនៅហ្នឹង ហាត់នៅហ្នឹងដែលធ្វើឲ្យការហ្វឹកហាត់បំពេញបានល្អជាងបើអ្នក នៅភ្នំពេញទៅហូបបាយនៅផ្ទះគេងនៅផ្ទះ។
លោក ស៊ុន សុទ្ធារិទ្ធ បានបញ្ជាក់ដូច្នេះបន្ថែមថា ដើម្បីឲ្យកីឡាករអាចមានភាពរីកចម្រើនទាម
ទារឲ្យពួកគេហ្វឹកហាត់ចន្លោះពី៨ទៅ១០ម៉ោងក្នុង១ថ្ងៃជាមួយការរៀបចំកន្លែងស្នាក់នៅនិងអាហារហូបចុកឲ្យបានត្រឹមត្រូវ ។ លោកថាការបញ្ជូនកីឡាករទៅចិន នឹងធ្វើមិនយូរនោះទេ ដើម្បីជួយឱ្យកីឡាករផ្នែកវាយកូនឃ្លីតុ ទទួលបានការហ្វឹកហាត់ឱ្យបានច្រើនមុនចូលស៊ីហ្គេមនៅវៀតណាម នាឆ្នាំ២០២១ ៕
ចែករំលែកព័តមាននេះ