ទីក្រុងម៉ានីល ៖ ប៉ូលីសហ្វីលីពីនម្នាក់បានស្លាប់ ក្នុងអំឡុងពេលឆ្មក់ចុះបង្ក្រាបសង្វៀនបញ្ជល់មាន់ខុសច្បាប់មួយ ដោយចៃដន្យបានមុតនឹងខ្នាយដែកស្រួច ដែលគេចងភ្ជាប់នឹងខ្នាយមាន់ជល់ មុតត្រូវចំជើងរបស់គាត់ ដាច់សរសៃឈាមស្លាប់ភ្លាម តែម្តង ។
គ្រោះថ្នាក់ចៃដន្យនេះ បានកើតឡើងកាលពីថ្ងៃចន្ទ ទី២៦ ខែតុលា ម្សិលមិញនេះ នៅភាគខាងជើងខេត្តសាម៉ា ប្រទេសហ្វីលីពីន ពេលដែលអនុសេនីយ៍ឯក Christian Bolok បានរើសយកមាន់ជល់០១ក្បាល ប្រមូលទុកជាភស្តុតាង នៅក្នុងការបង្ក្រាបខាងលើនេះ ។
លោកវរសេនីយ៍ឯក Arnel Apud ស្នងការនគរបាលខេត្ត បាននិយាយថា ការមុតនឹងខ្នាយស្រួចនេះ គឺចាក់ចំសរសៃឈាមនៅភ្លៅខាងឆ្វេងរបស់គាត់តែម្តង ហើយគាត់បានដាច់ខ្យល់ស្លាប់ភ្លាមៗ គួរអោយអាណោចអធ័ម ។
ល្បែងបញ្ជល់មាន់ ឬប្រជាជនហ្វីលីពីនហៅថា Tupada គឺជាកីឡាបក្សី ដ៏ពេញនិយមមួយ នៅក្នុងប្រទេសនេះ ដែលមានចាក់ប្រាក់ភ្នាល់គ្នាទៅលើលទ្ធផល នៃការប្រយុទ្ធគ្នា រវាងបក្សី ២ក្បាល ប្រដាប់ដោយខ្នាយមាន់ និងខ្នាយលោហៈដែលគេដាក់បន្ថែមលើខ្នាយមាន់ ។ កីឡាដ៍សាហាវនេះ ត្រូវបានអាជ្ញាធរប្រទេសហ្វីលីពីនហាមឃាត់ ក្នុងកំឡុងពេលមានជំងឺរាតត្បាតឆ្លងថែមទៀតនោះ គឺត្រូវហាមដាច់ខាតដើម្បីការពារហ្វូងមនុស្សពីការប្រមូលផ្តុំគ្នា ។
លោកវរសេនីយ៍ឯក Arnel Apud បាននិយាយថា វាគឺជាឧបទ្ទវហេតុ ហើយក៏ជាអកុសល និងជាសំណាងអាក្រក់ ដែលខ្ញុំមិនអាចពន្យល់បានទេ ។ ខ្ញុំមិនអាចជឿវាបានទេ នៅពេលដំណឹងនេះ ត្រូវបានគេរាយការណ៍មកខ្ញុំ ។ នេះជាលើកទីមួយហើយក្នុងរយៈពេល២៥ឆ្នាំរបស់ខ្ញុំ ក្នុងនាមជាមន្ត្រីប៉ូលីស ខ្ញុំមិនដែលមានជួបរឿងដូចអ៊ីចឹងទេ ខ្ញុំសោកស្ដាយដែលបាត់បង់មន្ត្រីម្នាក់ដោយសារតែមាន់ជល់ ។
ថ្លែងនៅក្នុងសន្និសីទកាសែត កាលពីម្សិលមិញ នាយប៉ូលិសរូបនេះ បាននិយាយថា «ខ្ញុំមានអារម្មណ៍ថា ដូចបានបាត់បង់បងប្រុសម្នាក់ចឹង ដែលបានលះបង់ជីវិតផ្ទាល់ខ្លួន ក្នុងនាមជាមន្ត្រីបម្រើរាស្ត្រ ។ លោកសោកសៅ ចំពោះមរណភាពរបស់អនុសេនីយ៍ឯក Christian Bolok និងបង្ហាញការអាណិតអាសូរយ៉ាងជ្រាលជ្រៅចំពោះក្រុមគ្រួសារ និងសាច់ញាតិនៃសព» ។
បើតាមរបាយការណ៍របស់ប៉ូលីសខេត្តសាម៉ា បានអោយដឹងថា ការឆ្មក់ចុះបង្ក្រាបសង្វៀនបញ្ជល់មាន់ខុសច្បាប់មួយកន្លែង ដឹកនាំលោកអនុសេនីយ៍ឯក Christian Bolok ។ ជាលទ្ធិផលកម្លាំងប៉ូលិសបានឃាត់ខ្លួនមនុស្ស ៣នាក់ រឹបអូសយកបានមាន់ជល់ ២ក្បាល ព្រមជាមួយនឹងខ្នាយ(ត)លោហៈ ចំនួន០២ឈុត ទ្រុងមាន់ចំនួន០៧ និងប្រាក់ហ្វីលីពីន ចំនួន៥៥០ PHP (ស្មើនឹងលុយខ្មែរ ៤៥,៧០០រៀល) ជាប្រាក់ភ្នាល់ ។ ប៉ូលីសក៏បានកំណត់អត្តសញ្ញាណ ជនសង្ស័យ០៣នាក់ផ្សេងទៀត ដែលកំពុងរត់គេចខ្លួន ផងដែរ ។
នៅក្នុងខែសីហា អាជ្ញាធរខេត្តសាម៉ាភាគខាងជើង ក៏បានចេញសេចក្តីព្រមានរួចហើយចំពោះការលេងបញ្ជល់មាន់ខុសច្បាប់ទាំងអស់ បន្ទាប់ពីមានមនុស្ស ៤នាក់ នៅក្នុងការប្រមូលផ្តុំគ្នាលេងបញ្ជល់មាន់ បានធ្វើតេស្ត រកឃើញឆ្លងវីរុស កូវីដ-១៩ ។
មុនពេលមានវិបត្ដិ COVID-19 រាតត្បាត ក្នុងប្រទេសហ្វីលីពីន កីឡាបក្សីនេះ ត្រូវបានអនុញ្ញាតអោយលេង តែនៅក្នុងកន្លែងដែលមានច្បាប់តែប៉ុណ្ណោះ ក្នុងអំឡុងពេលថ្ងៃអាទិត្យ និងថ្ងៃឈប់សម្រាកស្របច្បាប់ និងក្នុងអំឡុងពេល មានពិធីបុណ្យក្នុងស្រុក មិនឲ្យលើសពី ០៣ថ្ងៃ ឡើយ ៕
ចែករំលែកព័តមាននេះ