អ៊ីស្លាម៉ាបាដ ៖ ប្រភពពីមន្ទីពេទ្យ និងមន្ត្រីប៉ូលីស បាននិយាយថា សិស្ស៧នាក់ ត្រូវបាត់បង់ជីវិតភ្លាមៗ និងមនុស្សជាង១២០នាក់ទៀត បានរងរបួស នៅពេលដែលគ្រាប់បែកមួយបានផ្ទុះនៅខាងក្នុងសាលសាលារៀនមួយ…
អ៊ីស្លាម៉ាបាដ ៖ ប្រភពពីមន្ទីពេទ្យ និងមន្ត្រីប៉ូលីស បាននិយាយថា សិស្ស៧នាក់ ត្រូវបាត់បង់ជីវិតភ្លាមៗ និងមនុស្សជាង១២០នាក់ទៀត បានរងរបួស នៅពេលដែលគ្រាប់បែកមួយបានផ្ទុះនៅខាងក្នុងសាលសាលារៀនមួយ នៅក្នុងរដ្ឋធានី Peshawar នៃខេត្ត Khyber Pakhtunkhwa ភាគពាយព្យប្រទេសប៉ាគីស្ថាន នាព្រឹកថ្ងៃអង្គារ ទី២៧ ខែតុលានេះ បើយោងតាមទីភ្នាក់ងារព័ត៌មានចិនស៊ិនហួរ ។
លោក Tariq Burki អនុប្រធានមន្ទីរពេទ្យ Lady Reading បានប្រាប់អ្នកសារព័ត៌មានថា ពួកគេបានទទួលសាកសពចំនួន៧នាក់ និងអ្នករងរបួសចំនួន ៩០នាក់ ចូលមកមន្ទីរពេទ្យនេះ ខណៈដែល ជនរងគ្រោះប្រហែលជា ៣០នាក់ទៀត កំពុងទទួលការសង្គ្រោះនៅមន្ទីរពេទ្យដទៃ ។
លោក Tariq Burki បានបន្ថែមថា ក្នុងចំណោមអ្នករងរបួសទាំងអស់ មានជនរងគ្រោះ ៥នាក់ ស្ថិតក្នុងស្ថានភាពរលាកធ្ងន់ធ្ងរ និងកំពុងសង្គ្រោះបន្ទាន់ ។
ដោយឡែកលោក Peshawar Waqar Ahmad ស្នងការក្រុង បានប្រាប់ទីភ្នាក់ងារព័ត៌មានចិនស៊ិនហួរថា កម្លាំងជំនាញរកឃើញ ការផ្ទុះនេះកើតឡើងពីគ្រឿងផ្ទុះកែច្នៃ ដែលគេលាក់ទុក នៅក្នុងកាបូបសិស្សសាលាមួយ ។
លោកនិយាយបន្តថា កាបូបដែលផ្ទុកគ្រឿងផ្ទុះ មានទម្ងន់ប្រហែលពី៥ ទៅ៨គីឡូក្រាម ត្រូវពួកសកម្មប្រយុទ្ធដាក់លាក់នៅខាងក្នុងសាលមួយ នៃវិទ្យាស្ថាននោះ ។
លោកបន្ថែមទៀតថា ជនរងគ្រោះ មានអាយុចន្លោះពី១៥ ទៅ១៨ឆ្នាំ ដែលអ្នកខ្លះ ត្រូវរលាក និងរងរបួសយ៉ាងធ្ងន់ធ្ងរ ដោយសារអគ្គិភ័យបានឆាបឆេះបន្ទាប់ពីការផ្ទុះសារធាតុគីមីមួយចំនួនប្រើនៅក្នុងឧបករណ៍ផ្ទុះនោះ ហើយបានប៉ះពាល់យ៉ាងធ្ងន់ធ្ងរដល់អាគារផងដែរ ។ ប៉ូលីស បានបិទបរិវេណសាលា និងតំបន់ក្បែរគ្នា ដើម្បីធ្វើការស៊ើបអង្កេត ។
រហូតមកដល់ពេលនេះ មិនទាន់មានក្រុមណាមួយ ឬបុគ្គលណាម្នាក់ អះអាងពីការវាយប្រហារនេះនៅឡើយទេ ៕
ចែករំលែកព័តមាននេះ