រាជធានីភ្នំពេញ ៖ ជនវ័យក្មេងដែលជាមុខសញ្ញាឆក់យ៉ាងសកម្មនៅរាជធានីភ្នំពេញ ជាពិសេសនៅខណ្ឌពោធិ៍សែនជ័យ និងខណ្ឌទួលគោក ដែលបានធ្វើសកម្មភាពជិត១០លើកមកហើយនោះ ពេលនេះត្រូវនគរបាលប៉ុស្តិ៍កាកាបទី២ និងនគរបាលផ្នែកព្រហ្មទណ្ឌខណ្ឌពោធិ៍សែនសែនជ័យ ធ្វើការស្រាវជ្រាវរហូតឈានដល់ចាប់ខ្លួនបាន២នាក់ ចំណែកម្នាក់ទៀតកំពុងរត់គេចខ្លួននៅឡើយ ។
ការចាប់ខ្លួនបាននេះ គឺបន្ទាប់ពីក្រុមជនសង្ស័យខាងលើធ្វើសកម្មភាពឆក់កាបូបពីស្ត្រីម្នាក់ កាលពីវេលាម៉ោងប្រមាណ៦និង៣០នាទីព្រឹកថ្ងៃទី២៤ ខែតុលា ឆ្នាំ២០២០ នៅតាមផ្លូវរថភ្លើង ក្នុងភូមិព្រៃសាលា សង្កាត់កាកាបទី២ ខណ្ឌពោធិ៍សែនជ័យ បណ្ដាលឲ្យស្ត្រីរងគ្រោះដួលរងរបួសរហូតសន្លប់ស្ដូកស្ដឹងនៅនឹងកន្លែង ។
មន្ត្រីនគរបាលនិយាយថា ជនសង្ស័យដែលចាប់ខ្លួនបានទាំង២នាក់នេះ ម្នាក់ឈ្មោះ ប៊ុន ឈឿនពិសិទ្ធ ភេទប្រុស អាយុ១៨ឆ្នាំ មុខរបរលក់ដូរ មានទីលំនៅក្នុងបុរីពិភពថ្មីឈូកវ៉ា១ ក្នុងភូមិអណ្ដូង សង្កាត់គោករកា ខណ្ឌព្រែកព្នៅ រាជធានីភ្នំពេញ ត្រូវឃាត់ខ្លួនបានកាលពីវេលាម៉ោងប្រមាណ៣រសៀលថ្ងៃទី២៥ ខែតុលា ឆ្នាំ២០២០ នៅភូមិព្រៃសាលា សង្កាត់កាកាបទី២ ខណ្ឌពោធិ៍សែនជ័យ ។ ចំណែកម្នាក់ទៀតឈ្មោះ ហុន ប៊ុនខេង ភេទប្រុស អាយុ១៨ឆ្នាំ មានទីលំនៅក្នុងភូមិក្រាំងចេក ឃុំដើមឫស ស្រុកកណ្ដាលស្ទឹង ខេត្តកណ្ដាល ត្រូវឃាត់ខ្លួនបានកាលពីថ្ងៃទី២៦ ខែតុលា ។ រីឯជនដែលកំពុងរត់គេចខ្លួន ត្រូវបានស្គាល់ហើយគឺឈ្មោះ អាហ្សង់ទីន ភេទប្រុស អាយុប្រហែល១៨ឆ្នាំ ទីលំនៅមិនពិតប្រាកដ ។
ប្រភពដដែលបន្តថា ស្ត្រីរងគ្រោះចុងក្រោយគេក្នុងអំពើឆក់នេះឈ្មោះ គង់ សុខជា អាយុ៤៤ឆ្នាំ មុខរបរលក់លតឆា មានទីលំនៅក្នុងភូមិតាងួន សង្កាត់កាកាបទី១ ខណ្ឌពោធិ៍សែនជ័យ ។ នៅក្នុងកាបូបដែលត្រូវជនសង្ស័យឆក់មាន លុយចំនួន១សែនរៀល ទូរស័ព្ទ១គ្រឿង និងអត្ត
សញ្ញាណប័ណ្ណ១សន្លឹក ។
មុនពេលកើតហេតុ ស្ត្រីរងគ្រោះជិះម៉ូតូ១គ្រឿងចេញពីទិញអីវ៉ាន់នៅផ្សារស៊ិនជូរីផ្លាហ្សា ត្រឡប់ទៅផ្ទះ លុះទៅដល់ចំណុចខាងលើ ស្រាប់តែក្រុមជនសង្ស័យជិះម៉ូតូស៊ុយហ្សុ៊យគីនិច១គ្រឿង ដេញតាមធ្វើសកម្មភាពឆក់យកយកកាបូបបណ្ដាលឲ្យស្ត្រីរងគ្រោះដួលរងរបួសធ្ងន់រហូតសន្លប់ ។ បន្ទាប់ពីឆក់កាបូបបានហើយ ជនសង្ស័យបានជិះម៉ូតូគេចខ្លួនទៅបាត់ស្រមោល ចំណែកស្ត្រីរងគ្រោះត្រូវបានប្រជាពលរដ្ឋទាក់ទងហៅរថយន្តពេទ្យដឹកយកទៅសង្គ្រោះភ្លាមៗ ។
ក្រោយពេលកើតហេតុ នគរបាលប៉ុស្តិ៍កាកាបទី២ និងនគរបាលផ្នែកព្រហ្មទណ្ឌខណ្ឌពោធិ៍សែនសែនជ័យ បានទៅកាន់កន្លែងកើតហេតុ និងឆែកមើលកាមេរ៉ាសុវត្ថិភាពនៅផ្ទះប្រជាពលរដ្ឋក្បែរនោះ ឃើញភិនភាគជនសង្ស័យនិងធ្វើការស្រាវជ្រាវ ។ រហូតដល់វេលាម៉ោងប្រមាណ៣រសៀលថ្ងៃទី២៥ ខែតុលា ក៏ប្រទះឃើញជនសង្ស័យឈ្មោះ ប៊ុន ឈឿនពិសិទ្ធ កំពុងបង្ហោះម៉ូតូតាមផ្លូវជាមួយយុវជនម្នាក់ ។ ភ្លាមៗនោះ កម្លាំងនគរបាលក៏ដេញតាមហើយជនសង្ស័យរូបនេះបានលោតចុះពីម៉ូតូរត់គេចខ្លួន តែរត់អត់រួចក៏ត្រូវចាប់ខ្លួនបាន រួចនាំទៅសាកសួរនៅប៉ុស្តិ៍ ។
លុះមកដល់ថ្ងៃទី២៦ ខែតុលា កម្លាំងនគរបាលដដែលបានបន្តធ្វើការស្រាវជ្រាវរហូតឈានដល់ចាប់ខ្លួនបក្ខពួកម្នាក់ទៀតឈ្មោះ ហុន ប៊ុនខេង ហើយនាំទៅសាកសួរដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញ ព្រមទាំងតាមស្វែងរកចាប់ខ្លួនឈ្មោះអាហ្សង់ទីនដែលកំពុងរត់គេចខ្លួន ។
ក្រោយពេលចាប់ខ្លួន ជនឈ្មោះ ប៊ុន ឈឿនពិសិទ្ធ សារភាពថា ខ្លួននិងបក្សពួកពិតជាបានធ្វើសកម្មភាពឆក់កាបូបពីស្ត្រីខាងលើនោះមែន ហើយកន្លងមក ពួកគេធ្លាប់ធ្វើសកម្មភាពឆក់កា
បូបនៅក្នុងរាជធានីភ្នំពេញបានសម្រេចជិត១០ដង ៕
ចែករំលែកព័តមាននេះ