ជីវប្រវត្តិសង្ខេបរបស់លោកសុទ្ធ ប៉ូលីន បានបង្ហាញនៅក្នុងសៀវភៅ «អក្សរសិល្ប៍ខ្មែរសតវត្សទី២០» ឱ្យដឹងថា លោកកើតនៅថ្ងៃទី៩ កុម្ភៈ ឆ្នាំ១៩៤៣ នៅភូមិកំពង់ចាម ស្រុកកំពង់សៀម
ជីវប្រវត្តិសង្ខេបរបស់លោកសុទ្ធ ប៉ូលីន បានបង្ហាញនៅក្នុងសៀវភៅ «អក្សរសិល្ប៍ខ្មែរសតវត្សទី២០» ឱ្យដឹងថា លោកកើតនៅថ្ងៃទី៩ កុម្ភៈ ឆ្នាំ១៩៤៣ នៅភូមិកំពង់ចាម ស្រុកកំពង់សៀម ខេត្តកំពង់ចាម ។ លោកសុទ្ធ ប៉ូលីន បានប្រឡងជាប់មធ្យមសិក្សាបត្រភាគទី២ ផ្នែកទស្សនវិជ្ជាទាំងសញ្ញាបត្រជាតិ និងសញ្ញាបត្របារាំង ។ បន្ទាប់មកលោកសុទ្ធ ប៉ូលីន សិក្សាអក្សរសាស្ត្រ និងទស្សនវិជ្ជានៅមហាវិទ្យាល័យអក្សរសាស្ត្រ និងមនុស្សសាស្ត្រ។ ទន្ទឹមនឹងការសិក្សានេះ លោកបានសិក្សាច្បាប់នៅមហាវិទ្យាល័យច្បាប់និងវិទ្យាសាស្ត្រសេដ្ឋកិច្ចនាក្រុងភ្នំពេញ ។ លោកមានតួនាទីជាសាស្ត្រាចារ្យទស្សនវិជ្ជានៅក្រុងភ្នំពេញផងដែរ ។
លោកសុទ្ធ ប៉ូលីន បានចូលជាសមាជិកសមាគមអ្នកនិពន្ធខ្មែរនៅថ្ងៃទី១៣ មករា ឆ្នាំ១៩៦៧ ហើយលោកបានបង្កើតព្រឹត្តិបត្រ «នគរធំ» ដែលខ្លួនលោកផ្ទាល់ជាចាងហ្វាងការផ្សាយ ។
លោកសុទ្ធ ប៉ូលីន បានចាកចេញពីភ្នំពេញទៅប្រទេសបារាំងនៅឆ្នាំ១៩៧៤ ។ លោករស់នៅសហរដ្ឋអាមេរិក ហើយបានចេញផ្សាយឡើងវិញនូវព្រឹត្តិបត្រ«នគរធំ» រហូតដល់ឆ្នាំ១៩៨៥ ។
លោកសុទ្ធ ប៉ូលីន ជាអ្នកនិយម ស្រឡាញ់កោតសរសើរលោកអាល់ប៊ែរ កាមុយ (Albert CAMUS) និងលោកស្ហង់ប៉ូលសាត្រ (Jean-Paul SARTRE) ។ ចរន្តអក្សរសិល្ប៍បារាំងប្រាកដនិយមបានជ្រួតជ្រាបក្នុងទស្សនៈលោក ។
លោកសុទ្ធ ប៉ូលីន បានចេញផ្សាយប្រលោមលោកជាច្រើនជាភាសាខ្មែរ ប្រលោមលោកជាភាសាបារាំង និងសៀវភៅសិក្សា ខ្លះៗផងមានដូចជា៖
-ខូចសតិព្រោះកាមតណ្ហា,ប្រលោមលោក, ភ្នំពេញ ១៩៦៤ ។
-អូនជាម្ចាស់ស្នេហ៍ ប្រលោមលោក, ភ្នំពេញ ១៩៦៤ ។
-ជីវិតឥតន័យ ប្រលោមលោក, ភ្នំពេញ ១៩៦៤(បោះពុម្ពផ្សាយឡើងវិញនៅក្រុងប៉ារីស នាឆ្នាំ១៩៨១) ។
-ស្នេហ៍អភមង្គល ប្រលោមលោក, ភ្នំពេញ ១៩៦៤ ។
-ចំតិតឥតអាសូរ ប្រលោមលោក, ភ្នំពេញ ១៩៦៧ ។
-ក្ស័យតែម្តងទេ ប្រលោមលោក, ភ្នំពេញ ១៩៦៧ ។
-បុរសអផ្សុក ប្រលោមលោក, ភ្នំពេញ ១៩៦៨ ។
-អ្នកផ្សងព្រេងអារាត់អារាយ ប្រលោមលោក, ភ្នំពេញ ១៩៦៩ (បោះពុម្ពផ្សាយឡើងវិញនៅបា៉រីសនាឆ្នាំ១៩៨២) ។
-ឱ្យបងធ្វើអ្វីបងធ្វើដែរ ប្រលោមលោក,ភ្នំពេញ ១៩៦៩ ។
-មរណដួងចិត្ត ប្រលោមលោក, ភ្នំពេញ ១៩៧៣ ។
-អ្នកមេម៉ាយនៅអិល-អេ ប្រលោមលោក, អិលអេ សហរដ្ឋអាមេរិក ១៩៩៣ ។
-Dictionnaire français-khmer, Phnom Penh, s.d (réédité á Paris, Christian and Missionary Alliancc. 1975 ).
-La composition Française au D.E.S.P.C (en coll, avec Ke Sokhan et To Chhun), Phnom Pcnh. 1964) :
-Contes cambodgiens, en Français, Phnom Penh, 1965.
-L’anarchiste, roman en Français, paris, Table ronde, 1980.
ចែករំលែកព័តមាននេះ