ត្រីនាគប្រវែងជាង4ម៉ែត្រទើរលើឆ្នេរសមុទ្រវៀតណាម
ត្រីចង្វាទូក (Oarfish ឬ Raddlefish) ឬត្រីនាគដ៏កម្រមួយក្បាលត្រូវរលកបោកបក់ទៅទើរលើឆ្នេរសមុទ្រនៅភាគកណ្តាលប្រទេសវៀតណាម កាលពីថ្ងៃទី១២ ឧសភា ២០១៥ ។ បណ្តាអ្នកស្រុក
ត្រីចង្វាទូក (Oarfish ឬ Raddlefish) ឬត្រីនាគដ៏កម្រមួយក្បាលត្រូវរលកបោកបក់ទៅទើរលើឆ្នេរសមុទ្រនៅភាគកណ្តាលប្រទេសវៀតណាម កាលពីថ្ងៃទី១២ ឧសភា ២០១៥ ។ បណ្តាអ្នកស្រុកដែលប្រទះឃើញបញ្ជាក់ថា ពីដំបូងត្រីនាគនោះនៅរស់ ប៉ុន្តែវាបានងាប់ខណៈពេលយកទៅដាក់ក្នុងទឹក ដោយសារវាទើរនៅលើឆ្នេរក្នុងរយៈពេលយូរពេក ។
កាសែតក្នុងស្រុករបស់វៀតណាម បញ្ជាក់ថា អ្នករស់នៅក្នុងស្រុកបូចាក ខេត្តគាំងប៊ីញ ប្រទះឃើញត្រីនាគនោះ ខណៈចុះងូតលេងទឹកសមុទ្រ។ នោះជាត្រីនាគទី២នៅក្នុងឆ្នាំ២០១៥នេះ ដែលប្រទះឃើញក្នុងសមុទ្រវៀតណាម ។ ត្រីនាគប្រទះឃើញលើកដំបូងមានប្រវែង៤,២ម៉ែត្រ ពេលជាប់ផ្លែសន្ទូចនៅភាគកណ្តាលប្រទេសកាលពីខែឧសភា ២០១៥ ។ សម្រាប់ត្រីនាគលើកក្រោយនេះមានប្រវែង៤,១ម៉ែត្រ ទម្ងន់៤០គីឡូក្រាម ។ អ្នកប្រទះឃើញត្រីនាគនោះបានរាយការណ៍ប្រាប់ ប៉ូលិស ។ ពេលប៉ូលិសទៅដល់ ហើយរួមជាមួយអ្នកស្រុកយកត្រីនាគទៅលែងក្នុងទឹកវិញ វាក៏ងាប់ព្រោះយឺតពេលទៅហើយ។
អំឡុងសម័យសង្គ្រាមវៀតណាម ត្រីនាគដែលទាហានអាមេរិកចាប់បាននៅក្នុងទន្លេមេគង្គ គេហៅថា «ត្រីរញ្ជួយដី» ព្រោះវារមែងបង្ហាញខ្លួនឱ្យឃើញនៅមុន ឬក្រោយការរញ្ជួយដីក្នុងមហាសមុទ្រ ។
ឱកាសដែលបានឃើញត្រីប្រភេទនោះមានតិចបំផុត ព្រោះជាត្រីរស់នៅក្នុងសមុទ្រចាប់ពីជម្រៅ១០០០ម៉ែត្រឡើងទៅ ។ សម្រាប់អ្នកដើរសមុទ្រតាំងពីបុរាណមកបានកត់ត្រាក្នុងសតវត្សទី១៨ដោយហៅត្រីប្រភេទនោះថាជា «ត្រីអសុរកាយនៅក្នុងសមុទ្រ» ព្រោះវាមានដងខ្លួនវែង ។
កាសែតក្នុងស្រុករបស់វៀតណាមបានចុះផ្សាយដោយយោងតាមសម្តីរបស់អ្នកស្រុកម្នាក់ដែលប្រទះឃើញត្រីនាគកាលពីថ្ងៃទី១២ ឧសភា នោះថា «ខ្ញុំឃើញវានៅលើវាលខ្សាច់ និងដកដង្ហើម តិចៗ ព្រោះខ្វះទឹក ហើយរូបខ្ញុំ និងអ្នកផ្សេងក៏នាំគ្នាយកវាទៅដាក់ក្នុងទឹកសមុទ្រ ប៉ុន្តែហួសពេលទៅហើយ ព្រោះវាបានផុតដង្ហើមក្នុងរយៈពេលមួយម៉ោងក្រោយ» ។
បណ្តាអ្នកស្រុកនាំគ្នាជីករណ្តៅកប់ត្រីនាគមួយក្បាលនៅលើឆ្នេរខ្សាច់ក្បែរចំណុចប្រទះឃើញស្របតាមជំនឿពីបុរាណថា ត្រីចម្លែកឬត្រីនាគនឹងជួយការពារជីវិតមនុស្សនៅលើឆ្នេរ និងនាំមកតែក្តីសុខ រួមទាំងលាភសំណាងដល់ពួកគេ ៕
ចែករំលែកព័តមាននេះ