សារព័ត៌មាន «ញូវសូហ៊ូ»របស់ចិនកាលពីពេល ថ្មីៗកន្លងមកផ្សាយថា លោកចាវ និងនាងសៀ បានរៀបអាពាហ៍ពិពាហ៍ជាមួយគ្នាកាលពីដើមខែឧសភា ប៉ុន្តែពិធីដែលគួរតែនាំមកនូវសេចក្តីសុខក្នុងជីវិត បែរជាបញ្ចប់ដោយការទាស់ទែងគ្នាទៅវិញ ។
ហេតុការណ៍នោះកើតឡើងក្រោយពីលោកចាវ និងនាងសៀបញ្ចប់ពិធីស្បថស្បែរបស់ខ្លួនដែលរៀបចំឡើងនៅក្រុងសឺយៀន ខេត្តហ៊ូប៉ើយ ដោយអ្នកទាំង២ទាស់ទែងគ្នាខ្លាំងលើរឿងម្ហូបអាហារក្រោយពិធីជប់លៀងភ្ញៀវរួចនៅសល់ច្រើន ។ លោកចាវ បានស្នើឱ្យប្រមូលអាហារដែលនៅសល់យកទៅផ្ទះ ប៉ុន្តែខាងកូនក្រមុំមិនឱ្យយកទៅ ព្រោះបារម្ភខ្លាចអាកាសធាតុក្តៅធ្វើឱ្យផ្អូម ដូច្នេះនាងឱ្យបោះចោល ។
ពួកគេទាំង២នាក់ ចាប់ផ្តើមឈ្លោះទាស់ទែងគ្នាខ្លាំងនៅឯផ្ទះក្រោយចាកចេញពីទីតាំងរៀបអាពាហ៍ពិពាហ៍បានបន្តិច ។ លុះនៅវេលាម៉ោង១០យប់នាងសៀ បានទូរស័ព្ទប្តឹងប៉ូលិសឱ្យទៅដោះស្រាយ ។ នៅពេលប៉ូលិសទៅដល់ចំណុចកើតហេតុក៏បានដឹងរឿងហេតុដែលកើតឡើង។ នាងសៀនិយាយថា នាងចង់ឱ្យប៉ូលិសដាក់ទោសប្តី និងចង់លែងលះគ្នា ។ ចំណែកប៉ូលិសគិតតែព្យាយាមបញ្ចុះបញ្ចូល និងសម្របសម្រួល ព្រោះថ្ងៃនោះជាថ្ងៃសិរីមង្គលរបស់អ្នកទាំង២ ។
សមត្ថកិច្ចហួសចិត្តព្រោះមិនធ្លាប់ជួបរឿងក្តីបែបនេះតាំងពីមុនមក ។ ចំណែកអ្នកស្រុកគាំទ្រឱ្យគូអាពាហ៍ពិពាហ៍នោះលែងគ្នា ព្រោះយល់ថា ទោះជាសម្របសម្រួលគ្នាហើយក្តី នៅពេល ឆាប់ៗខាងមុខពួកគេនឹងឈ្លោះគ្នាទៀតមិនខាន ៕
ចែករំលែកព័តមាននេះ