ខេត្តក្រចេះ ៖ កំពូលចោរ៤នាក់ ដែលបានធ្វើសកម្មភាពប្រដាប់ដោយកាំភ្លើងអាកា៤៧ ជាអាវុធដើរលួចបាញ់គោអ្នកស្រុក ពន្លះសាច់ដឹកតាមម៉ូតូ យកទៅលក់ ត្រូវកម្លាំងនគរបាលប៉ុស្តិ៍រដ្ឋបាលរលួសមានជ័យ ដែលកំពុងល្បាតក្នុងភូមិសាស្ត្រ ប្រទះឃើញក៏ក្របួចជាប់…
ខេត្តក្រចេះ ៖ កំពូលចោរ៤នាក់ ដែលបានធ្វើសកម្មភាពប្រដាប់ដោយកាំភ្លើងអាកា៤៧ ជាអាវុធដើរលួចបាញ់គោអ្នកស្រុក ពន្លះសាច់ដឹកតាមម៉ូតូ យកទៅលក់ ត្រូវកម្លាំងនគរបាលប៉ុស្តិ៍រដ្ឋបាលរលួសមានជ័យ ដែលកំពុងល្បាតក្នុងភូមិសាស្ត្រ ប្រទះឃើញក៏ក្របួចជាប់ កាលពីថ្ងៃទី២៣ ខែតុលា ឆ្នាំ២០២០ នៅភូមិរលួស ឃុំរលួស មានជ័យ ស្រុក
សំបូរ ។
ជនសង្ស័យទាំង៤នាក់ដែលត្រូវចាប់ខ្លួន៖
១-ឈ្មោះ ផេង ភ្លា ភេទប្រុស អាយុ៤៣ឆ្នាំ (ជាម្ចាស់អាវុធ) ។
២-ឈ្មោះ សុខ ខេង អូ ភេទប្រុស ។
៣-ឈ្មោះ ស្រើញ ហាង ភេទប្រុស អាយុ ៥០ឆ្នាំ ជនជាតិខ្មែរ ។
៤-ឈ្មោះ នួន សំណាង ភេទប្រុស អាយុ ២១ឆ្នាំ ជនជាតិខ្មែរ ។
ទាំង៤នាក់មានទីលំនៅភូមិស្រែជិះ ឃុំស្រែជិះ ស្រុកសំបូរជាមួយគ្នា ។ សមត្ថកិច្ចបានដកហូតកាំភ្លើងវែង (AK47) មួយដើម និងគ្រាប់ចំនួន១២គ្រាប់ ។ មន្ត្រីនគរបាលប៉ុស្ដិ៍រលួសមានជ័យ បានឲ្យដឹងថា មុនពេលចាប់ខ្លួនពួកគាត់ កម្លាំងនគរបាលប៉ុស្តិ៍ បានធ្វើការល្បាតក្នុងភូមិសាស្ត្រ បានប្រទះឃើញជនសង្ស័យឈ្មោះ ផេង ភ្លា កំពុងដឹកសាច់គោតាមម៉ូតូក៏បានសួរថា ដឹកសាច់អី ? ជនសង្ស័យបានឆ្លើយថា ជាសាច់ទន្សោង ។ ដោយដឹងថា ជនសង្ស័យបានឆ្លើយភូតកុហកក៏ឃាត់ខ្លួនឈ្មោះ ផេង ភ្លា នាំមកសាកសួរតែម្ដង ។
ដោយមិនអាចបំភាន់បានជនសង្ស័យបានឆ្លើយសារភាពថា ខ្លួនបានយកអាវុធAKមួយដើម រួមជាមួយបក្ខពួក៣នាក់ទៀត យកទៅបាញ់គោអ្នកភូមិនាមមួយក្បាល ។ ពេលគោត្រូវងាប់ ហើយបាននាំគ្នាពន្លះយកសាច់ដឹកតាមម៉ូតូទៅលក់ដោយកុហកគេថា ជាសាច់ទន្សោង ។
ក្រោយពីបានទទួលចម្លើយសារភាពរបស់ជនសង្ស័យឈ្មោះ ផេង ភ្លា កម្លាំងនគរបាលប៉ុស្តិ៍ក៏បានឃាត់ខ្លួនបក្ខពួកជនសង្ស័យចំនួន៣នាក់ទៀតយកមកអធិការដ្ឋានស្រុកកសាងសំណុំរឿងបញ្ជូនទៅសាលាដំបូងខេត្តក្រចេះដើម្បីចាត់ការតាមច្បាប់កាលពីថ្ងៃទី២៥ តុលា ៕
ចែករំលែកព័តមាននេះ