បំណុល គឺជាកត្តាបង្កការស្ត្រេសធំជាងគេរបស់មនុស្សភាគច្រើន ប៉ុន្តែមិនមានមនុស្សច្រើនទេដែលសុខចិត្តបោះបង់ចោលផ្នែកមួយចំនួននៃការរស់នៅរបស់ពួកគេដើម្បីសងបំណុលឲ្យអស់ពីខ្លួន។ ប្រសិនបើការចង់រំដោះខ្លួនគឺជាគោលដៅធំជាងគេរបស់អ្នក អ្នកចាំបាច់ត្រូវលះបង់ខ្លះៗដើម្បីសម្រេចបានគោលដៅនេះ ។ ខាងក្រោមគឺជាការចាយវាយមួយចំនួនដែលអ្នកត្រូវលះបង់ប្រសិនបើអ្នកចង់សងបំណុលដែលអ្នកមានជាប់ខ្លួន៖
១. ទម្លាប់ទទួលទានអាហារក្រៅផ្ទះ
ការទទួលទានអាហារនៅក្រៅផ្ទះអាចបង្កឲ្យអ្នកធ្វើការចាយវាយច្រើនណាស់។ ប្រសិនបើអ្នកចំណាយអស់២ដុល្លារក្នុងមួយព្រឹកសម្រាប់បាយពេលព្រឹក នោះមួយសប្តាហ៍អ្នកចាយអស់១៤ដុល្លារទៅហើយ ហើយក្នុងមួយខែអ្នកត្រូវចាយអស់៥៦ដុល្លារទៅហើយ។ នេះមិនទាន់បូកថ្លៃបាយថ្ងៃត្រង់ និងល្ងាចផង។ ការវេចខ្ចប់អាហារពីផ្ទះអាចជួយសន្សំថវិកាអ្នកជាច្រើន។
២. ការទិញទំនិញបោះដុំ
មនុស្សជាច្រើនគិតថាការទិញទំនិញបោះដុំអនុញ្ញាតឲ្យពួកគេសន្សំថវិកាបានច្រើន ប៉ុន្តែការពិតជាក់ស្តែងវាមិនតែងតែដូច្នេះទេ។ ផ្ទុយមកវិញ អ្នកគួរតែគិតពីចំនួនដែលអ្នកត្រូវការ និងទិញតាមចំនួននោះវិញ។ ការទិញទំនិញទុកនៅផ្ទះមានតែជំរុញមនុស្សឲ្យប្រើសម្ភារៈទាំងនោះច្រើនជាងមុនទេ ហើយប្រសិនបើអ្នកមិនចេះទុកដាក់វាទេនោះ វាអាចខូចឬបាត់ថែមទៀតផងដែលបង្ខំឲ្យអ្នកត្រូវចំណាយថែមទៀត។
៣. ផលិតផលប្រេនៗ
នរណាក៏ចង់ទិញផលិតផលដែលមានប្រេនល្អៗដែរ តែប្រសិនបើវាមិនមែនជាឧបករណ៍ឬផលិតផលដែលអ្នកនឹងត្រូវប្រើក្នុងរយៈពេលយូរទេនោះ អ្នកមិនចាំបាច់ចំណាយច្រើនពេកលើប្រេនថ្លៃៗឡើយ។ អ្នកអាចត្រួតពិនិត្យលើការចាយវាយរបស់អ្នកឡើងវិញនិងមើលថាមានផលិតផលណាដែលអ្នកអាចជំនួសជាមួយនឹងជម្រើសដែលមានតម្លៃទាបជាងទេ?
៤. ការចាយវាយព្រោះតែប្រព័ន្ធសង្គម
ពិភពប្រព័ន្ធសង្គមពោរពេញទៅដោយមនុស្សធ្វើការចែករំលែកពីផ្ទះថ្លៃៗ និងសម្ភារៈប្រេនៗរបស់ពួកគេ។ ជាលទ្ធផល មនុស្សជាច្រើនមានសម្ពាធក្នុងការទិញរបស់ទាំងនោះដែរ។ វាជាបញ្ហាធំមួយជាពិសេសសម្រាប់មនុស្សដែលនៅមានបំណុលច្រើនជាប់ខ្លួន។ ប្រសិនបើអ្នកចង់ជៀសវាងធ្លាក់ខ្លួនក្នុងបញ្ហានេះ អ្នកត្រូវតែដឹងច្បាស់ពីគោលដៅដែលអ្នកចង់សម្រេចបាន មិនមែនគោលដៅដែលមិត្តភក្តិ និងសង្គមឲ្យទៅអ្នកទេ ៕
ចែករំលែកព័តមាននេះ