ប្រេស៊ីល ៖ វីរបុរសបាល់ទាត់ក្រុមជម្រើសជាតិប្រេស៊ីលលោក Ronaldinho បានអះអាងដោយផ្ទាល់មាត់ថា គាត់បានធ្វើតេស្តវិជ្ជមាន Covid-19 ហើយកំពុងដាក់ខ្លួននៅក្នុងភាពឯកោ។ គួររំលឹកថា ទីបំផុត! Ronaldinho ត្រូវបានដោះលែងឱ្យសេរីភាពហើយ
អតីតខ្សែប្រយុទ្ធក្រុម Barcelona និង Paris Saint-Germain វ័យ ៤០ឆ្នាំរូបនេះ កំពុងស្ថិតនៅទីក្រុង Belo Horizonte ប្រទេសប្រេស៊ីល ហើយក៏ទទួលបានការធ្វើរោគវិនិច្ឆ័យវិជ្ជមានវីរុសតែម្តង។
ម្ចាស់ជើងឯកពានរង្វាន់បាល់ទាត់ពិភពលោកឆ្នាំ ២០០២ រូបនេះបានថ្លែងនៅលើបណ្តាញសង្គម Instagram កាលពីថ្ងៃអាទិត្យថា «ខ្ញុំបានមកដល់ Belo Horizonte កាលពីម្សិលមិញ និងទទួលបានលទ្ធផលវិជ្ជមាន Covid-19 ហើយឥឡូវនេះ ខ្ញុំត្រូវស្នាក់នៅក្នុងសណ្ឋាគាររហូតដល់ស្ថានភាពរបស់ខ្ញុំបានជាសះស្បើយ»។
សូមរំលឹកថា Ronaldinho រួមនិងបងប្រុស Roberto de Assis Moreira ទើបតែត្រូវ ដោះលែងឱ្យមានសេរីភាពកាលពីចុងខែសីហា ឆ្នាំ២០២០ កន្លងទៅ បន្ទាប់ពីចំណាយពេល៥ខែ ក្នុងការឃុំខ្លួននៅពន្ធនាគារ ១ខែ និងរយៈពេល ៤ខែទៀតបន្តឃុំខ្លួននៅសណ្ឋាគារមួយក្នុងរដ្ឋធានី Asuncion ប្រទេសប៉ារ៉ាហ្គាយ ក្រោយរងការចោទប្រកាន់ពីបទប្រើប្រាស់លិខិតឆ្លងដែនក្លែងក្លាយ ដើម្បីចូលក្នុងប្រទេសនេះ៕ (ដកស្រង់ចេញពី Reuters)
ចែករំលែកព័តមាននេះ