រាជធានីភ្នំពេញ ៖ សម្ដេចអគ្គមហាសេនាបតីតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជាបានប្រកាសដាក់ឲ្យប្រើប្រាស់បណ្ដោះអាសន្ននូវផ្លូវក្រោមដីត្រង់ចំណុចស្ពានអាកាសរង្វង់មូលថ្នល់បំបែកចោមចៅ ស្ថិតនៅក្នុងសង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ បន្ទាប់ពីផ្លូវនេះត្រូវបានស្ថាបនារួចរាល់កាលពីពេលថ្មីៗនេះ ដើម្បីកាត់បន្ថយការកកស្ទះចរាចរណ៍ និងសម្រួលដល់ការធ្វើដំណើររបស់ប្រជាពលរដ្ឋផងដែរ ។
កាលពីវេលាព្រឹកថ្ងៃទី២៦ ខែតុលា ឆ្នាំ២០២០ សម្ដេចតេជោនាយករដ្ឋមន្ត្រីអញ្ជើញទៅបើកការដ្ឋានសាងសង់ស្ពានបេតុងខ្សែកាប្លិ៍ឆ្លងកាត់ទន្លេបាសាក់ ពីតំបន់កោះពេជ្រទៅកាន់ទីក្រុងរណបកោះនរា និងពីកោះនរាទៅផ្លូវជាតិលេខ១ ។ ហើយនៅក្នុងខណៈពេលដែលសម្ដេចថ្លែងសុន្ទរកថា សម្រចក៏បានប្រកាសដាក់ឲ្យប្រើប្រាស់បណ្ដោះអាសន្ននូវផ្លូវក្រោមដីនេះ ដែលមាន ទទឹង៨,៥០ម៉ែត្រកន្លះ និងបណ្ដោយប្រវែង៤៨៨ម៉ែត្រតភ្ជាប់ពីផ្លូវជាតិលេខ៤និងមហាវិថីសហព័ន្ធរុស្ស៊ីដែលនេះ គឺសមិទ្ធិផលថ្មីមួយលើដីសន្តិភាពដែលរាជរដ្ឋាភិបាលសម្រេចបាន ។
សម្ដេចមានប្រសាសន៍ថា ផ្លូវក្រោមដីយើងមាននៅស្ពានអាកាសស្ទឹងមានជ័យ និងស្ពានអាកាស៥មករាស្តុបទួលគោកប៉ុន្តែខ្លីៗ ឥឡូវស្ពានក្រោមដីចោមចៅវែង ហើយពេល និងក៏ជាទេសចរណ៍មួយដែរប្រជាពលរដ្ឋអាចទៅលេង និងនាំឪពុកម្ដាយចាស់ៗទៅមើលឲ្យឃើញផ្លូវក្រោមដីនេះ តើគេដាក់ភ្លើងយ៉ាងម៉េច និងធ្វើដំណើរយ៉ាងម៉េចឲ្យគាត់បានឃើញផង ។
ជាមួយគ្នាសម្ដេចតេជោ នាយករដ្ឋមន្ត្រីក៏បានសុំឲ្យក្រុមហ៊ុនទូរស័ព្ទទាំងអស់ទៅភ្ជាប់សេវាទូរស័ព្ទនៅតាមផ្លូវក្រោមដីនោះ ដើម្បីកុំឲ្យដាច់សេវាពេលដែលប្រជាពលរដ្ឋធ្វើដំណើរឆ្លងកាត់ផ្លូវក្រោមដីនោះ និងសុំឲ្យក្រុមហ៊ុនទូរស័ព្ទសែលកាតធ្វើជាគំរូមុនគេ ។
សម្តេចតេជោបានបង្ហាញនូវក្តីមោទនភាពចំពោះភាពរីកចម្រើននៃទីក្រុងភ្នំពេញ ដែលក្រោយពីងើបពីសង្គ្រាមមក គឺជាទីក្រុងដែលមិនមានមនុស្សរស់នៅច្រើននោះទេ តែពេលនេះ មានមនុស្សរស់នៅរាប់លាននាក់ និងមានអគារខ្ពស់ៗរាប់រយអគារ ។
សម្តេចតេជោ បានមានប្រសាសន៍បន្តទៀតថា បច្ចុប្បន្ន ទីក្រុងភ្នំពេញបានពង្រីកផ្ទៃដីជាបន្តបន្ទាប់ ដែលមុននេះ ផ្ទៃដី ទីក្រុងភ្នំពេញគឺ មានចំនួន ៣០០គីឡូម៉ែត្រការរ៉េ ឥឡូវនេះផ្ទៃដីទីក្រុងភ្នំពេញបានកើនដល់ ជិត៧០០ម៉ែត្រគីឡូម៉ែត្រការ៉ែ ៕
ចែករំលែកព័តមាននេះ