រាជធានីភ្នំពេញ ៖ តាមសេចក្តីរាយការណ៍បឋមបានឱ្យដឹងថា មានករណីបុរសម្នាក់ធ្វើការនៅអង្គភាពសណ្តាប់ធ្នាប់សាធារណការ មិនដឹងមានវិបត្តិអ្វីនោះទេ បានជិះម៉ូតូមួយគ្រឿងធ្វើដំណើរមកលោតទឹកពីលើស្ពានជ្រោយចង្វា តែត្រូវបាននគរបាល និងប្រជានេសាទបានចេញទូកនេសាទទៅជួយសង្គ្រោះទាន់ពេលវេលា រួចផុតពីគ្រោះថ្នាក់ដល់ជីវិត ។ បន្ទាប់ពីស្រង់បុរសរងគ្រោះឡើងមកលើគោករួចមក ត្រូវបានក្រុមគ្រួសារនាំយកត្រឡប់ទៅផ្ទះវិញហើយ ដោយអ្នកសារព័ត៌មានមិនបានជួបសួរនាំអ្វីទាំងអស់ ។
ហេតុការណ៍ខាងលើនេះបានបង្កឱ្យមានការភ្ញាក់ផ្អើលកាលពីវេលាម៉ោង១២និង១៥នាទីថ្ងៃត្រង់ថ្ងៃទី២៦ តុលា នៅចំណុចស្ពានជ្រោយចង្វាចាស់ សង្កាត់ជ្រោយចង្វា ខណ្ឌជ្រោយចង្វា ។
បុរសម្នាក់ដែលលោតពីលើស្ពានជ្រោយចង្វាខាងលើមិនត្រូវបានស្គាល់អត្តសញ្ញាណនោះទេ គ្រាន់តែដឹងថា បុរសរូបនោះបម្រើការងារនៅអង្គភាពសណ្តាប់ធ្នាប់សាធារណការ ។
តាមសេចក្តីរាយការណ៍បានបន្តថា មុនពេលកើតហេតុ គេឃើញបុរសម្នាក់ខាងលើបានជិះម៉ូតូមួយគ្រឿងម៉ាកហុងដា ពណ៌ខ្មៅ ពាក់ស្លាកលេខ ភ្នំពេញ ១BV-០០៥២ ធ្វើដំណើរឡើងស្ពានជ្រោយចង្វា ហើយគេមិនដឹងថា បុរសរូបនោះមានវិបត្តិអ្វីនោះទេ ស្រាប់តែលោតទឹកពីលើស្ពានចូលទឹកទន្លេ ចំណែកម៉ូតូបានចតទុកចោលនៅកណ្តាលស្ពានត្រូវបាននគរបាលប៉ុស្តិ៍ជ្រោយចង្វាយកទៅរក្សាទុក ។
តាមសេចក្តីរាយការណ៍បានបន្តទៀតថា បន្ទាប់ពីឃើញបុរសរូបនោះលោតពីលើស្ពានបែបនេះ ប្រជានេសាទ និងនគរបាលដែលប្រចាំការនៅគោលដៅទី៣បានចេញទូកនេសាទទៅជួយសង្គ្រោះទាន់ពេលវេលា ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕ (កែសម្រួលដោយ ៖ ធីតា)
ចែករំលែកព័តមាននេះ