សារព័ត៌មាន «នីហ្សេរីយ៉ា ហេរ៉ល» របស់ប្រទេសនីហ្សេរីយ៉ា បានផ្សាយកាលពីពេល ថ្មីៗកន្លងមកថា នាងស៊ីដូ ហ្វ៊័រជូន មូថូនហូរី ជនជាតិស៊ីមបាវ៉េ បានប្តឹងទៅតុលាការនៅក្រុងប៊ូឡាវ៉ាយ៉ូ ទាមទារឱ្យគូស្នេហ៍លោកថាហ្វាតសាវ៉ា វ៉េវ៉េ បង់ប្រាក់សំណងជំងឺចិត្តដល់ខ្លួនចំនួន១៥.០០០ដុល្លារ ពីបទបំផ្លាញព្រហ្មចារី ព្រមទាំងធ្វើឱ្យខកចិត្ត និងអាម៉ាស់ដែលត្រូវបោះបង់ចោល ។
នាងស៊ីដូ ហ្វ៊័រជូន មូថូនហូរី បញ្ជាក់ថា លោកថាហ្វាតសាវ៉ា វ៉េវ៉េ បានបំផ្លាញព្រហ្មចារី និងធ្វើឱ្យនាងមានគភ៌ ។ បន្ទាប់មកគេមិនគោរពពាក្យសន្យាដែលថា នឹងរៀបការជាមួយនាង និងបង្កឱ្យអាប់អោនកិត្តិយស ព្រោះក្រៅពីបោះបង់ចោលនាងដោយមិនអើពើនោះ គេមានគូស្នេហ៍ថ្មីទៀត ។
នាងមូថូនហូរី រៀបរាប់ប្រាប់តុលាការថា នាង និងថាហ្វាតសាវ៉ា វ៉េវ៉េ បានភ្ជាប់ពាក្យនៅខែឧសភា ២០១៣ ហើយបានរួមរស់ជាមួយគ្នានៅខែមករា២០១៤ តែក្រោយមកនាងបានផ្លាស់ទៅរស់នៅក្រុងហារ៉ារ៉េ ជាផ្ទះរបស់ឪពុកម្តាយខាងប្រុស ខណៈលោកវ៉េវ៉េ បន្តស្នាក់នៅក្រុងប៊ូឡាវ៉ាយ៉ូ ដើម្បីមើលថែកិច្ចការផ្ទះ ។ នៅខែឧសភា ២០១៥ នាងឃើញលោកវ៉េវ៉េ មានគូស្នេហ៍ថ្មី និងមានគភ៌ដូចនាងដែរ ទើបសម្រេចចិត្តប្តឹងទារសំណងជំងឺចិត្តតែម្តង ៕
ចែករំលែកព័តមាននេះ