រាជធានីភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានចេញបញ្ជារឲ្យរដ្ឋមន្ត្រីចំនួន ៤ រូបត្រូវចុះដោះស្រាយបញ្ហាជូនពលរដ្ឋរងគ្រោះជាបន្ទាន់ ជាពិសេសរដ្ឋមន្ត្រីទាំង ៤ រូបមកពីក្រសួងចំនួន…
រាជធានីភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានចេញបញ្ជារឲ្យរដ្ឋមន្ត្រីចំនួន ៤ រូបត្រូវចុះដោះស្រាយបញ្ហាជូនពលរដ្ឋរងគ្រោះជាបន្ទាន់ ជាពិសេសរដ្ឋមន្ត្រីទាំង ៤ រូបមកពីក្រសួងចំនួន ៤ ត្រូវដោះស្រាយបញ្ហា ជួសជុលផ្លូវ ស្ពាន និងទំនប់ទឹក ដែលខូចខាតដោយជំនន់ទឹកភ្លៀងនៅចំនួន ២០ ខេត្ត-រាជធានី ឲ្យបានរហ័ស ។
ថ្លែងក្នុងពិធីបើកការដ្ឋានសាងសង់ស្ពានបេតុងខ្សែកាបឆ្លងកាត់ទន្លេបាសាក់ តភ្ជាប់រាជធានីភ្នំពេញ ពីចំណុចទីក្រុងកោះពេជ្រ ទៅកាន់ទីក្រុងរណបថ្មីកោះនរា នៅព្រឹកថ្ងៃទី២៦ ខែតុលា សម្តេចតេជោ បានបញ្ជាឲ្យរដ្ឋមន្ត្រី ៤រូប រួមមាន៖ លោក វេង សាខុន រដ្ឋមន្ត្រីកសិកម្ម រុក្ខាប្រម៉ាញ់និងនេសាទ , លោក ស៊ុន ចាន់ថុល រដ្ឋមន្ត្រីសាធារការនិងដឹកជញ្ជួន, លោក អ៊ុក រ៉ាប៊ុន រដ្ឋមន្ត្រីអភិវឌ្ឍន៍ជនបទ និងលោក លឹម គានហោ រដ្ឋមន្ត្រីធនធានទឹករដ្ឋមន្ត្រីក្រសួងធនធានទឹក ត្រូវប្រជុំដោះស្រាយភ្លាម ដោះស្រាយបញ្ហាជូនពលរដ្ឋរងគ្រោះ ដោយចាត់កម្លាំងចុះជួសជុលផ្លូវ ស្ពាន និងទំនប់ទឹក ដែលខូចខាតដោយជំនន់ទឹកភ្លៀងកន្លងមកនោះ ។
សម្តេចតេជោ ហ៊ុន សែន បានថ្លែងថា «យើងមានសភាពការណ៍មិនធម្មតា ដូច្នេះយើងត្រូវមាននីតិវិធីដោះស្រាយ តាមវិធីមិនធម្មតាដែរ ដោយមិនត្រូវរង់ចាំមន្ត្រីចុះពិនិត្យ វាយតម្លៃអ្វីនោះទេ គឺត្រូវចាត់មន្ត្រីជំនាញ ចុះជួសជុលផ្លូវ ស្ពាន ដែលខូចដោយទឹកជំនន់នោះ ភ្លាមៗឡើងវិញ» ។
សម្តេចបានបន្តថា ជុំវិញបញ្ហាទាក់ទងខាងផ្នែកទឹក គឹត្រូវមានវិធីទប់ទឹក និងកន្លែងបែកបាក់ទំនប់ទឹក ក៏ត្រូវធ្វើជាបន្ទាន់ ដើម្បីឲ្យប្រជាកសិករយើង បង្កបង្កើនផលបាន និង ផ្នែកកសិកម្ម ក៏ត្រូវចែកពូជបន្លែ ពូជស្រូវ ដល់កសិករភ្លាម។ ដើម្បីឲ្យគាត់ធ្វើបាន ក៏ត្រូវមានទឹក ហើយក៏ត្រូវមានការដឹកជញ្ជូនកសិផលទាំងនោះដែរ។
សម្តេចនាយករដ្ឋមន្ត្រីបានមានប្រសាសន៍ បញ្ជាក់យ៉ាងដូច្នេះថា «កុំចាំមន្ទីររាយការណ៍ មកភ្នំពេញ។ យើងចាត់រដ្ឋលេខាធិការ ចុះទៅតាមគោលដៅ។ កន្លែងខ្លះ ត្រូវចាត់ច្រើនក្រុមចុះទៅ ពិសេសនៅបាត់ដំបង និងខេត្តបន្ទាយមានជ័យ។ កុំឲ្យប្រជាពលរដ្ឋយើង គាត់លំបាកមួយសាហើយ មកលំបាកមួយសាទៀត ក្រោយទឹកស្រក។ ត្រូវការចាយប៉ុន្មាន ស្នើទៅក្រសួងសេដ្ឋកិច្ច យើងមានខ្ទង់ថវិកា មិនទាន់បែងចែក។ យើងមានថវិកាត្រៀមបម្រុង ១៥០លានដុល្លារ ដើម្បីធ្វើការងារនេះ»។
សម្តេចបានថ្លែងបន្តថា រដ្ឋមន្ត្រីទាំង ៤ត្រូវធ្វើការឲ្យបានរហ័សកុំស្ពក់ស្រពន់ឲ្យសោះរឿងដោះស្រាយបញ្ហារងគ្រោះដោយជំនន់ទឹកភ្លៀងនេះ ដោយក្នុងនោះសម្តេចតេជោបានអះអាងថា «ខ្ញុំនឹងចាំមើល! បើសិនជាកន្លែង(រងគ្រោះ)ណាយឺត ខ្ញុំនឹងចុះទៅកន្លែងហ្នឹង ចាំមើលរដ្ឋមន្ត្រីធ្វើមុខយ៉ាងម៉េច» ៕
ចែករំលែកព័តមាននេះ