ព័រទុយហ្គាល់ ៖ កីឡាករ Lewis Hamilton បានបំបែកកំណត់ត្រាដ៏អស្ចារ្យ និងកម្ររបស់អតីតកីឡាករសញ្ជាតិអាល្លឺម៉ង់លោក Michael Schumacher ដើម្បីក្លាយជាកំពូលអ្នកប្រណាំងរថយន្ត…
ព័រទុយហ្គាល់ ៖ កីឡាករ Lewis Hamilton បានបំបែកកំណត់ត្រាដ៏អស្ចារ្យ និងកម្ររបស់អតីតកីឡាករសញ្ជាតិអាល្លឺម៉ង់លោក Michael Schumacher ដើម្បីក្លាយជាកំពូលអ្នកប្រណាំងរថយន្ត Formula 1 ដែលឈ្នះការប្រកួត Grand Prix ច្រើនបំផុតក្នុងប្រវត្តិសាស្ត្រ។
Hamilton បានយកឈ្នះ Grand Prix លើកទី១២ក្នុងព្រឹត្តិការណ៍ Formula One World Championship 2020 ដែលធ្វើឡើងនៅទីលាន Algarve International Circuit ក្នុងតំបន់ Algarve ប្រទេសព័រទុយហ្គាល់កាលពីម្សិលមិញ។ បន្ទាប់ពីបានចំណាយពេល ១ម៉ោង ២៩នាទី និង៥៦វិនាទី ដើម្បីកាន់កំណត់ត្រាឈ្នះ ៩២លើកក្នុងអាជីពរបស់ខ្លួន។
ជ័យជម្នះកាលពីម្សិលមិញ បានធ្វើឱ្យកីឡាករសញ្ជាតិអង់គ្លេសវ័យ ៣៥ឆ្នាំរូបនេះ បំបែកកំណត់ត្រាឈ្នះ ៩១លើកក្នុងអាជីពរបស់អតីតម្ចាស់ជើងឯកពិភពលោកច្រើនបំផុត ៧សម័យកាល Michael Schumacher ដែលចូលនិវត្តន៍កាលពីឆ្នាំ២០១២។
ម្ចាស់ជើងឯកពិភពលោក ៦សម័យកាល Lewis Hamilton បានបង្ហោះសារក្រោយជ័យជម្នះរបស់ខ្លួនថា «៩២ឈ្នះថ្ងៃនេះ គឺជាក្តីសុបិន្តដ៏ធំបំផុតរបស់ខ្ញុំ។ ខ្ញុំមិនអាចឈានដល់ចំណុចនេះទេ ប្រសិនបើគ្មានវត្តមានសមាជិកទាំងអស់ក្នុងក្រុមរបស់ខ្ញុំ។ ខ្ញុំមានសេចក្តីរីករាយណាស់ ដែលមានអ្នកគ្រប់គ្នានៅក្បែរខ្ញុំ»៕
ចែករំលែកព័តមាននេះ