ខេត្តកណ្តាល ៖ ពិតជាមិនខ្លាចបាបមែន សូម្បីតែក្នុងវត្តក៏ហ៊ានចូលលួចកាច់សោកម៉ូតូ របស់លោកតា ម្នាក់ជិះគេចខ្លួនបាត់ដោយសុវត្ថិភាព ខណៈម្ចាស់ម៉ូតូយកចង្ហាន់ឡើងទៅលើសាលាឆាន់ ដើម្បីប្រគេនដល់ព្រះសង្ឃចំថ្ងៃសីល ស្រាប់តែចុះមកវិញបាត់ម៉ូតូតែម្តង។ ហេតុការណ៍បាត់ម៉ូតូនេះបង្កឲ្យមានការភ្ញាក់ផ្អើលឡើង កាលពីវេលាម៉ោង៧ និង៣០នាទីព្រឹក ថ្ងៃទី២៤ ខែតុលា ឆ្នាំ២០២០ នៅត្រង់ចំណុចក្បែរសាលាឆាន់វត្តគគីរធំ(ហៅវត្តចាស់) ឃុំគគីរធំ ស្រុកកៀនស្វាយ ខេត្តកណ្តាល។
ម៉ូតូដែលចោរ លួចកាច់សោកយកទៅនោះម៉ាក ហុងដាឌ្រីមសង់ប្រភេទស្រី ស៊េរីឆ្នាំ២០១៩ ពណ៌ខ្មៅ ពាក់ស្លាក់លេខ កណ្តាល 1AC-0689 ជាកម្មសិទ្ធរបស់ឈ្មោះ មិន សួស អាយុប្រហែល៦៩ឆ្នាំ រស់នៅភូមិពោធិ៍មៀវ ឃុំគគីរធំ ស្រុកកៀនស្វាយ។ ហើយបើតាមកូនស្រីរបស់ម្ចាស់ម៉ូតូ បានបញ្ជាក់ប្រាប់អ្នកសារព៌ត៌មានថា បន្ទាប់ពីបាត់ម៉ូតូភ្លាមឪពុករបស់គាត់ក៏បានទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលគគីរធំ ហើយកម្លាំងនគរបាលប៉ុស្តិ៍ និងប្រជាការពារភូមិខំជួយតាមរុករកមុខសញ្ញាដែរ តែរហូតមកដល់ថ្ងៃទី២៥ ខែតុលា នេះនៅមិនទាន់មានតម្រុយនោះទេ។
ប្រភពព័ត៌មាននិយាយថា មួយរយៈពេលកន្លងមកនេះ នៅក្នុងស្រុកកៀនស្វាយ កើតមានករណីចោរលួចកាច់សោកម៉ូតូ របស់ប្រជាពលរដ្ឋយកទៅបាត់ដោយសុវត្ថិភាពជាបន្តបន្ទាប់អស់ជាច្រើនគ្រឿងមកហើយ តែសមត្ថកិច្ចពុំដែលចាប់បានមុខសញ្ញាចោរលួចម្តងណាទេ «បាត់ឈឹង បាត់ឈឹង»។ ប្រភពបានដាក់ការសង្ស័យថា ការកើតមានឡើងចោរកម្មបែបនេះ គឺដោយសារសព្វថ្ងៃ គេសង្កេតឃើញល្បែងស៊ីសងដូចជា បៀអាប៉ោង កន្ទុយលេខ ជល់មាន់ និងគ្រឿងញៀន នៅតែបន្តកើតមានយ៉ាងគគ្រឹកគគ្រេង ក្នុងអាណាចក្រស្រុកកៀនស្វាយគួរឲ្យព្រួយបារម្ភជាខ្លាំង៕ ដោយ ៖ ស៊ឹម សាន់
ចែករំលែកព័តមាននេះ