រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា កម្លាំងសមត្ថកិច្ចនគរបាលការិយាល័យទី៤ នៃមន្ទីរប្រឆាំងគ្រឿងញៀនក្រសួងមហាផ្ទៃ កាលពីថ្ងៃទី២១ ខែតុលា ឆ្នាំ២០២០ បានចុះបង្ក្រាបករណីជួញដូរគ្រឿងញៀន ដោយធ្វើការឃាត់ខ្លួនជនសង្ស័យម្នាក់ និងចាប់យកថ្នាំញៀនជាង១គីឡូ នៅចំណុចផ្លូវបេតុង ស្ថិតក្នុងសង្កាត់ចោមចៅ២ ខណ្ឌពោធិ៍សែនជ័យ ខណៈពេលជនសង្ស័យរូបនោះបាននិងកំពុងដឹកជញ្ជូនថ្នាំញៀនយកទៅលក់ តែប៉ះចំសមត្ថកិច្ច។
ក្នុងកិច្ចបង្ក្រាបខាងលើនេះដឹកនាំដោយលោកឧត្តមសេនីយ៍ទោ ឃឹង សារ៉ាត់ នាយករងមន្ទីរប្រឆាំងគ្រឿងញៀន ក្រោមការសម្របសម្រួលពីលោក សឿន មុនីរ័ត្ន ព្រះរាជអាជ្ញារងអមសាលាដំបូងរាជធានីភ្នំពេញ ។
ជាលទ្ធផលនៃបង្ក្រាបនេះ សមត្ថកិច្ចបានឃាត់ខ្លួនជនសង្ស័យម្នាក់ឈ្មោះ គិត សុខា ភេទប្រុស អាយុ៣១ឆ្នាំ មុខរបរ និងស្នាក់នៅមិនពិតប្រាកដ ។
ជាមួយគ្នានោះ សមត្ថកិច្ចចាប់យកសារធាតុញៀន ប្រភេទម៉េតំហ្វេតាមីន (ICE) ទម្ងន់សុទ្ធ១០៣៥.៤១ ក្រាម ។ ក្រោយពេលឃាត់ខ្លួនជនសង្ស័យរួចហើយ ត្រូវបានសមត្ថកិច្ចកសាងសំណុំរឿង ដើម្បីបញ្ជូនទៅកាន់សាលាដំបូងរាជធានីភ្នំពេញចាត់ការតាមនីតិវិធី ៕
ចែករំលែកព័តមាននេះ