ពីអតីតកាលមក អ្នកដឹកនាំទូទៅមានតួនាទីក្នុងការចេញបទបញ្ជា និងគ្រប់គ្រងមនុស្សដែលធ្វើការក្រោមខ្លួនឲ្យបំពេញកិច្ចការតាមអ្វីដែលបានបញ្ជា។ ប៉ុន្តែបច្ចុប្បន្ននេះ ភាពដឹកនាំបែបនេះមិនមានប្រសិទ្ធភាពទៀតឡើយ ជាពិសេសបន្ទាប់ពីមានការផ្ទុះជំងឺកូវីដ ១៩។
ក្នុងពេលដែលបរិស្ថានជុំវិញខ្លួនពោរពេញទៅដោយភាពមិនប្រាកដប្រជា អ្នកដឹកនាំមានតួនាទីធ្វើឲ្យមនុស្សជុំវិញខ្លួនមានអារម្មណ៍ល្អប្រសើរជាងមុន និងជួយដល់ពួកគេក្នុងការបង្កើតយុទ្ធសាស្ត្រសម្រាប់បំពេញតួនាទីរបស់ពួកគេរៀងៗខ្លួនដើម្បីសម្រេចបានគោលដៅធំៗរបស់ស្ថាប័ន។ខាងក្រោមគឺជាគោលការណ៍សំខាន់ៗដែលអ្នកដឹកនាំអាជីវកម្មធំៗប្រើដើម្បីដឹកនាំមនុស្សក្នុងពេលនេះ៖
១. ពន្យល់ពីគោលការណ៍របស់អ្នក និងជួយដល់អ្នកដឹកនាំដទៃធ្វើការសម្រេចចិត្តឲ្យបានត្រឹមត្រូវ
តើអ្នកជ្រើសរើសបុគ្គលិកដែលឆ្លាតវៃ និងមានបទពិសោធន៍ច្រើនធ្វើអ្វីប្រសិនបើអ្នកយកពួកគេមកបញ្ជាតាមចិត្តអ្នក? ក្នុងនាមជាអ្នកដឹកនាំ អ្នកត្រូវតែបកស្រាយពីគោលការណ៍របស់អ្នក និងគោលការណ៍ក្នុងក្រុមហ៊ុន មុននឹងអនុញ្ញាតឲ្យអ្នកដឹកនាំនីមួយៗក្នុងស្ថាប័នមានអំណាច និងសមត្ថភាពក្នុងការធ្វើការសម្រេចចិត្តនិងចេញសកម្មភាពដែលស្របទៅតាមគោលការណ៍ទាំងនោះ។
២. កុំបង្ខំឲ្យអ្នកដទៃស្តាប់ពីគំនិតរបស់អ្នក
ការផ្ទុះជំងឺកូវីដ ១៩ ក៏ទាមទារឲ្យអ្នកដឹកនាំយល់ដឹងពីកម្រិតសមត្ថភាពរបស់ខ្លួនដែរ។ មានន័យថាអ្នកត្រូវតែទទួលស្គាល់ពីអ្វីដែលអ្នកមិនដឹង និងស្តាប់អ្នកដទៃ ខណៈដែលរៀនសូត្រពីពួកគេផងដែរដើម្បីដោះស្រាយបញ្ហាប្រឈមថ្មីៗ។
អ្នកដឹកនាំត្រូវតែរកមនុស្សដែលមានសក្តានុពលក្នុងការមានតួនាទីកាន់តែសំខាន់ជាងមុន មិនមែនយកការងារទាំងអស់មកដាក់លើខ្លួនទេ។
៣. យកខ្លួនធ្វើជាគំរូ
នេះជាគោលការណ៍មួយដែលលោកមហាសេដ្ឋីប៊ីល ហ្គេតស៍ (Bill Gates) ដែលជាសហស្ថាបនិកក្រុមហ៊ុន Microsoft គាំទ្រ។ អ្នកដឹកនាំជាច្រើនចូលចិត្តប្រាប់អ្នកដទៃពីអ្វីដែលពួកគេត្រូវធ្វើ និងមិនត្រូវធ្វើខណៈដែលខ្លួនឯងមិនអាចគោរពតាមគោលការណ៍នេះផង។
ការយកខ្លូនជាគំរូសម្រាប់បុគ្គលិកដទៃមានប្រសិទ្ធភាពណាស់ ជាពិសេសក្នុងពេលដែលមនុស្សជាច្រើនកំពុងប្រឈមនឹងវិបត្តិមួយដែលមិនធ្លាប់កើតមានឡើងទាល់តែសោះ ៕
ចែករំលែកព័តមាននេះ