មនុស្សជាច្រើនលើពិភពលោកមានក្តីសុបិនចង់ក្លាយជាសហគ្រិន ធ្វើជាចៅហ្វាយខ្លួនឯង កំណត់ម៉ោងធ្វើការដោយខ្លួនឯង និងអង្គុយចាំប្រាប់ឲ្យអ្នកដទៃធ្វើកិច្ចការជំនួសខ្លួនជាដើម។ ជាក់ស្តែងគឺវាមិនងាយស្រួលដូចការគិតខាងលើទេ។
ដំណើរជាសហគ្រិនមានហានិភ័យច្រើនណាស់ ហើយមិនមានមនុស្សច្រើនទេដែលជោគជ័យក្នុងផ្នែកនេះ។ មុនពេលសម្រេចចិត្តលាឈប់ពីការងារ និងធ្វើជាសហគ្រិនឬម្ចាស់អាជីវកម្មពេញម៉ោងនោះ អ្នកគួរពិនិត្យមើលថាអ្នកអាចប្រឈមមុខនឹងគ្រោះធំៗដែលសហគ្រិនជាច្រើនប្រឈមមុខឬទេជាមុនសិន។
១. ប្រាក់ចំណូលមិននឹងនរ
គ្រប់អាជីវកម្មទាំងអស់ត្រូវវិនិយោគមូលធនទៅកាន់អាជីវកម្មវិញដើម្បីបន្តឲ្យវារីកលូតលាស់។ ដូច្នេះអ្នកប្រហែលជាមិនមានប្រាក់ចំណូលនឹងនររាប់ខែឬឆ្នាំ។ មុនពេលសម្រេចចិត្តក្លាយជាម្ចាស់អាជីវកម្មពេញម៉ោង អ្នកគួរតែសន្សំថវិកាយ៉ាងតិចឲ្យស្មើប្រាក់ចំណូលទូទៅរបស់អ្នកប្រមាណ ៦ ខែជាមុនសិន។
២. តម្រូវការទីផ្សារ
ទីផ្សារអាចផ្លាស់ប្តូរលឿនណាស់ ដូច្នេះអ្នកត្រូវតែមានផែនការច្បាស់លាស់ និងមានភាពបត់បែនក្នុងការដឹកនាំអាជីវកម្មរបស់អ្នកដើម្បីសម្របខ្លួនទៅនឹងតម្រូវការក្នុងទីផ្សារផងដែរ។ ប្រសិនបើតម្រូវការសម្រាប់ផលិតផល ឬសេវាកម្មរបស់អ្នកស្រាប់តែធ្លាក់ចុះយ៉ាងខ្លាំង តើអ្នកមានផលិតផល ឬសេវាកម្មជំនួសទេ0x017d7 អាជីវករមិនត្រូវពឹងផ្អែកលើផលិតផល ឬសេវាកម្មតែមួយសម្រាប់ប្រាក់ចំណូលអាជីវកម្មខ្លួនឡើយ។
៣. ពេលវេលា
ក្នុងនាមជាម្ចាស់អាជីវកម្ម អ្នកងាយនឹងចំណាយពេលវេលារបស់អ្នកអស់ក្នុងពេលមួយរំពេចណាស់ ព្រោះអ្នកត្រូវចូលរួមក្នុងផ្នែកផ្សព្វផ្សាយ លក់ កាន់បញ្ជី និងពិនិត្យផលិតផលជាដើម។ មិនថាអ្នករវល់យ៉ាងណាទេ អ្នកត្រូវតែកំណត់ពេលវេលាសម្រាប់ឲ្យខ្លួនសម្រាក និងផ្តោតស្មារតីលើខ្លួនឯង និងលើក្រុមគ្រួសារ។ ប្រសិនបើអ្នកមានក្រុមការងារ អ្នកគួរតែចេះបែងចែកតួនាទីទៅអ្នកដទៃឲ្យបានច្បាស់លាស់។
៤. អារម្មណ៍
ការធ្វើជាចៅហ្វាយខ្លួនឯងជាឱកាសដ៏គួរឲ្យរំភើបមួយ ប៉ុន្តែអាជីវកម្មជាច្រើនក៏បានបរាជ័យនៅឆ្នាំដំបូងដែរ។ ជាក់ស្តែង អាជីវករប្រឈមមុខនឹងសម្ពាធទាំងផ្លូវកាយ និងផ្លូវចិត្តយ៉ាងខ្លាំង។ ដោយហេតុដូចនេះទើបអាជីវករត្រូវតែត្រៀមខ្លួនសម្រាប់ពេលស្ត្រេសដោយមានមនុស្សគាំទ្រមិនថាជាអ្នកណែនាំ ឬមិត្តភក្តិបងប្អូនទេ ៕
ចែករំលែកព័តមាននេះ