ខេត្តប៉ៃលិន ៖ ស្ត្រីម្នាក់ និងកូនប្រសារប្រុស បានអង្គុយយំជូតទឹកភ្នែកដែលកំពុងហូរចុះរហាម ដោយមិនដឹងគិតយ៉ាងណានោះឡើយ ព្រោះតែនឹកស្តាយស្រណោះដល់ផ្ទះសម្បែងរបស់ខ្លួនដែលធ្លាប់ស្នាក់នៅជួបជុំក្រុមគ្រួសារ តែត្រូវជំនន់ទឹកភ្លៀងឆក់យកទៅ បណ្តាលឱ្យរសាត់អណ្តែតទាំងសម្ភារ: និងផ្ទះទៅតាមទឹកអស់រលីងគ្មានសេសសល់អ្វីសោះ…
ខេត្តប៉ៃលិន ៖ ស្ត្រីម្នាក់ និងកូនប្រសារប្រុស បានអង្គុយយំជូតទឹកភ្នែកដែលកំពុងហូរចុះរហាម ដោយមិនដឹងគិតយ៉ាងណានោះឡើយ ព្រោះតែនឹកស្តាយស្រណោះដល់ផ្ទះសម្បែងរបស់ខ្លួនដែលធ្លាប់ស្នាក់នៅជួបជុំក្រុមគ្រួសារ តែត្រូវជំនន់ទឹកភ្លៀងឆក់យកទៅ បណ្តាលឱ្យរសាត់អណ្តែតទាំងសម្ភារ: និងផ្ទះទៅតាមទឹកអស់រលីងគ្មានសេសសល់អ្វីសោះ សូម្បីតែបន្តិចបន្តួច ហើយអណ្តែតទៅទាំងកឿង និងវាលចំការចម្ងាយជាង២០០ម៉ែត្រ ក្បែរភូមិនោះទៀត ។
ហេតុការណ៍ស្ត្រីម្នាក់ និងកូនប្រុសបានរៀបរាប់ឱ្យដឹងពីទុក្ខលំបាកក្នុងការបាត់បង់ផ្ទះ២ខ្នងខាងលើនេះ បានកើតឡើងកាលពីម៉ោង១០និង៣០នាទីព្រឹក ថ្ងៃទី២១ ខែតុលា ឆ្នាំ២០២០ ស្ថិតនៅក្នុងភូមិដីស ឃុំស្ទឹងត្រង់ ស្រុកសាលាក្រៅ ។ ចំណែកផ្ទះ២ខ្នងដែលត្រូវទឹកហូររសាត់នាំយកទៅបាត់នោះ បានកើតឡើងកាលពីជាង១សប្តាហ៍មុន វេលាម៉ោង៨និង៣០នាទីព្រឹក ថ្ងៃទី១៥ ខែតុលា ស្ថិតនៅភូមិដីស ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ។
ប្រភពព័ត៌មានបានឱ្យដឹងថា ជនរងគ្រោះដោយសារទឹកជំនន់ឆក់ទាញយកផ្ទះនោះ មាន ឈ្មោះ ជា យ៉ាន អាយុ៥៩ឆ្នាំ មានប្តីឈ្មោះ ដើប ថា អាយុ៦០ឆ្នាំ មានកូន៣នាក់ ហើយផ្ទះ របស់គាត់ត្រូវជំនន់ទឹកភ្លៀងឆក់យកទៅអស់រលីងគ្មានសល់ ។ ចំណែកកូនប្រុសស្ត្រីរងគ្រោះឈ្មោះ យឿង រាត្រី អាយុ៣៣ឆ្នាំ មានប្រពន្ធឈ្មោះ ដើប សីហា មានកូនស្រីតូចម្នាក់នៅក្នុងបន្ទុក ក៏ត្រូវទឹកជំនន់ទាញផ្ទះយកទៅគ្មានសល់សម្ភារៈអ្វីនោះឡើយ ។
ប្រភពពីម្តាយនិងកូនប្រសារ បានរៀបរាប់ឱ្យដឹងទាំងទឹកភ្នែកថា ដោយសារតែភ្លៀងធ្លាក់ខ្លាំងអស់រយ:ពេលជាច្រើនថ្ងៃ និងច្រើនម៉ោង លុះនៅយប់ថ្ងៃកើតហេតុ រហូតដល់ពេលព្រឹកថ្ងៃបន្ទាប់ ភ្លៀងនៅតែបន្ថែមកាន់តែខ្លាំងឡើងៗ បណ្តាលឱ្យក្លាយទៅជាជំនន់ទឹកភ្លៀងហូរចាក់ពេញក្នុងចំការ បណ្តាលឱ្យហូរកាត់ផ្លូវកម្ពស់លិចត្រឹមក្បាលមនុស្សចាស់ ក៏ស្រាប់តែហូរទាញផ្ទះរបស់ពួកគាត់រសាត់អណ្តែតអស់ទាំង២ខ្នងតែម្តង ក្រោយមកក៏មានក្រុមការងារតំណាងរាស្ត្រមណ្ឌលប៉ៃលិន ដឹកនាំក្រុមយុវជន ស.ស.យ.កខេត្ត និងក្រុមយុវជនកាកបាទក្រហមចុះទៅជួយសង្គ្រោះផងដែរ ។
ប្រភពដដែលបន្តទៀតថា ពេលនោះពួកគាត់មានការភ័យតក់ស្លុតយ៉ាងខ្លាំង ស្ទើរតែចាប់ កូនចៅយកទៅទីទួលសុវត្ថិភាពមិនចង់ទាន់នោះឡើយ ព្រោះទឹកហូរបុកមកខ្លាំងពេក ហើយពួកគាត់ក៏មិនអាចចាប់យកចានឆ្នាំង ឬសម្លៀកបំពាក់ មុងភួយ បានសូម្បីតែបន្តិចនោះឡើយ ពោលគឺរសាត់ទៅតាមទឹកអស់រលីងតែម្តង ។ ទោះបីជាយ៉ាងណាក៏ដោយ រហូតមកដល់ពេលនេះ ពួកគាត់បានសុំផ្ទះអ្នកភូមិស្នាក់នៅបណ្តោះអាសន្ន ដើម្បីរង់ចាំសាងសង់ផ្ទះសារជាថ្មីឡើងវិញ ។
ប្រភពដដែលបញ្ជាក់ទៀតថា ក្រោយពេលទឹកជំនន់ ខាងសាលាកាកបាទក្រហមកម្ពុជា ខេត្តប៉ៃលិន ដឹកនាំដោយលោកជំទាវ បាន ស្រីមុំ អ្នកតំណាងរាស្ត្រមណ្ឌលប៉ៃលិន និងក្រុមការងារ បានយកអំណោយដូចជា សម្ភារ មុងភួយ សម្លៀកបំពាក់ និងថវិកាទៅចែកជូនពួកគាត់ ជាពិសេសម្ហូបអាហារ គឺបានទទួលចំនួន៣ដងរួចមកហើយ ។
រហូតមកដល់ពេលនេះ ខាងតំណាងរាស្ត្រមណ្ឌលប៉ៃលិន មានគម្រោងសាងសង់ផ្ទះឱ្យពួកគាត់ទាំងពីរនាក់ម្តាយ និងកូនផងដែរ តែមិនទាន់មានដីផ្ទាល់ខ្លួន ព្រោះដីកន្លែងទឹកលិចលង់បានប្រគល់ជូនអាជ្ញាធរខេត្ត ដើម្បីយកទៅធ្វើផ្លូវទៅហើយ ៕
ចែករំលែកព័តមាននេះ