ខេត្តបន្ទាយមានជ័យ ៖ ខ្នងអាងត្រពាំងថ្ម ស្រុកភ្នំស្រុក កំពុងតែប្រេះ និងទឹកហូរកាត់ខ្នងទំនប់ដែលអាចប្រឈមផលប៉ះពាល់ ហើយត្រូវបានប្រជាពលរដ្ឋ មន្ត្រីរាជការ និងកងកម្លាំងជិត២០០នាក់ នាំគ្នាច្រកដីខ្សាច់ក្នុងការ៉ុងដើម្បីដាក់ទប់ទឹកផងដែរ…
ខេត្តបន្ទាយមានជ័យ ៖ ខ្នងអាងត្រពាំងថ្ម ស្រុកភ្នំស្រុក កំពុងតែប្រេះ និងទឹកហូរកាត់ខ្នងទំនប់ដែលអាចប្រឈមផលប៉ះពាល់ ហើយត្រូវបានប្រជាពលរដ្ឋ មន្ត្រីរាជការ និងកងកម្លាំងជិត២០០នាក់ នាំគ្នាច្រកដីខ្សាច់ក្នុងការ៉ុងដើម្បីដាក់ទប់ទឹកផងដែរ កាលពីថ្ងៃទី២២ ខែតុលា ឆ្នាំ២០២០ នៅខាងកើតអាងឈម ស្ថិតក្នុងភូមិពង្រ ឃុំប៉ោយចារ ស្រុកភ្នំស្រុក។
បើតាមលោក យឹម សំណាង អភិបាលស្រុកភ្នំស្រុក បានប្រាប់ថា នៅពេលទឹកជំនន់បានជន់ឡើងខ្លាំងនៅអាងត្រពាំងថ្ម ស្រុកភ្នំស្រុក នៅថ្ងៃទី២២ ខែតុលាមានកម្រិតទឹកកម្ពស់១៨,៩៥ម៉ែត្រ ដែលចំណុចប្រកាសអាសន្ន១៨,៨០ម៉ែត្រ បើប្រៀបធៀបកាលពីថ្ងៃទី២១ ខែតុលា អាងត្រពាំងថ្ម ស្រុកភ្នំស្រុក មានកម្រិតទឹកកម្ពស់១៨,៦៥ម៉ែត្រ មានការកើនឡើង៣តឹក។
លោកបានបញ្ជាក់ថា ក្រោយពេលដែលទឹកជំនន់បានឡើងយ៉ាងកំហុក ឬឡើងលឿននៅអាងត្រពាំងថ្ម ស្រុកភ្នំស្រុក ឃើញទឹកកន្លែងខ្លះហូរកាត់ខ្នងទំនប់ និងប្រេះជាច្រើនកន្លែងជាហេតុធ្វើឱ្យមានការព្រួយបារម្ភ ហើយរដ្ឋបាលស្រុកភ្នំស្រុក សុំឱ្យមន្ត្រីរាជការ និងកងកម្លាំងទាំង៣ស្ថាប័ន និងប្រជាពលរដ្ឋរួមគ្នាជិត២០០នាក់ បានយកការ៉ុងច្រកដីខ្សាច់ ហើយយកទៅទប់ការពារទឹកហូរច្រុះដាច់ ដែលអាចបណ្តាលប៉ះពាល់ដល់ប្រជាពលរដ្ឋនៅផ្នែកខាងក្រោម នៅឃុំប៉ោយចារ ស្រុកភ្នំស្រុកផងដែរ។
លោក យឹម សំណាង ក៏ថ្លែងអំណរគុណចំពោះមន្ត្រីរាជការ និងកងកម្លាំងទាំង៣ស្ថាប័ននិងប្រជាពលរដ្ឋនៅពេលដែលទឹកជំនន់កំពុងគំរាមកំហែង បណ្តាលប្រេះអាង និងទឹកហូរកាត់ ត្រូវបានជួយគ្នាយកការ៉ុងច្រកដីខ្សាច់យកទៅទប់ទឹកការពារទឹកមិនឱ្យហូរកាត់ខ្នងអាង ដែលកំពុងប្រេះ ហើយដើម្បីការពារមិនឱ្យហូរចូលភូមិ បណ្តាលមានគ្រោះជន់លិចផ្ទះប្រជាពលរដ្ឋ៕
ចែករំលែកព័តមាននេះ