ប្រេស៊ីល ៖ ស្តេចបាល់ទាត់ Pelé នៅតែបង្ហាញស្នាមញញឹម រួមជាមួយភាពកំប្លុកកំប្លែង ក្នុងថ្លែងទៅកាន់អ្នកគាំទ្រនៅថ្ងៃខួបកំណើតគម្រប់ ៨០ឆ្នាំរបស់លោកនៅថ្ងៃសុក្រ ទី២៣ ខែតុលា (ពេលវេលានៅប្រទេសប្រេស៊ីល) ដែលធ្វើឡើងក្នុងផ្ទះរបស់លោកផ្ទាល់តែម្តង។
វីរបរុសបាល់ទាត់ប្រេស៊ីល ដែលកើតនៅថ្ងៃទី២៣ ខែតុលា ឆ្នាំ១៩៤០ បានទទួលរងពីបញ្ហាសុខភាពជាច្រើននៅក្នុងពេលប៉ុន្មានឆ្នាំថ្មីៗនេះ។ ប៉ុន្តែទោះយ៉ាងណា លោកនៅតែមិនបាត់បង់ភាពទាក់ទាញ និងស្នាមញញឹម រួមជាមួយការនិយាយបែបកំប្លុកកំប្លែងរបស់លោកនោះទេ តាមរយៈវីដេអូមួយផ្ញើទៅកាន់អ្នកគាំទ្រ ដើម្បីជាការថ្លែងអំណរគុណ ក៏ដូចជាការបញ្ជាក់ពី ស្ថានភាពសុខភាពល្អប្រសើររបស់លោកនាពេលបច្ចុប្បន្ន។
គេសង្កេតឃើញថា នៅតាមដងផ្លូវមួយចំនួនក្នុងទីក្រុងសៅប៉ូឡូ ក៏មានការតែងលំអ ជាពិសេសរូបគំនូររបស់លោក ដែលត្រូវបានរចនាឡើងដោយវិចិត្រករតាមដងផ្លូវដ៏ល្បីល្បាញ Kobra ដើម្បីជាការចូលរួមអបអរថ្ងៃដ៏ពិសេសមួយនេះ។
សូមបញ្ជាក់ជូនថា Pelé គឺជាកីឡាករបាល់ទាត់តែម្នាក់គត់ក្នុងប្រវត្តិសាស្ត្រ ដែលឈ្នះពានរង្វាន់បាល់ទាត់ពិភពលោក (World Cup) ចំនួន៣លើកនៅក្នុង ១៩៥៨, ១៩៦២ និង ១៩៧០ ហើយក៏កំពុងកាន់កាប់កំណត់ត្រាអ្នកស៊ុតបញ្ចូលទីច្រើនបំផុត សម្រាប់ក្រុមជម្រើសជាតិប្រេស៊ីលផងដែរ ពោលចំនួន ៧៧គ្រាប់អំឡុងពេលការបង្ហាញខ្លួនរបស់លោក ចន្លោះឆ្នាំ១៩៥៧ ដល់ឆ្នាំ១៩៧១៕ (ដកស្រង់ចេញពី AFP)
ចែករំលែកព័តមាននេះ