ពលរដ្ឋខេត្តកំពង់ធំងាកមកប្រកបរបរ ដាល់អំបុកលក់ដើម្បីបង្កើនជីវភាព
- កំពង់ធំ
ខេត្តកំពង់ធំ ៖ ពាក់ព័ន្ធនឹងមុខរបរដាល់អំបុកលក់ កញ្ញា ដាលី អាយុ២៩ឆ្នាំ រស់នៅភូមិក្រសាំង(ខ) ឃុំសាន់គរ ស្រុកកំពង់ស្វាយ បានរៀបរាប់ឲ្យដឹងថា…
ខេត្តកំពង់ធំ ៖ ពាក់ព័ន្ធនឹងមុខរបរដាល់អំបុកលក់ កញ្ញា ដាលី អាយុ២៩ឆ្នាំ រស់នៅភូមិក្រសាំង(ខ) ឃុំសាន់គរ ស្រុកកំពង់ស្វាយ បានរៀបរាប់ឲ្យដឹងថា នាងមានបងប្អូនចំនួន៤នាក់ ប្រុសម្នាក់ ស្រីបី នាងជាកូនទីពីរក្នុងគ្រួសារ ក្រៅពីរូបនាង បងប្អូនៗរបស់នាងពួកគេរៀបការអស់ហើយ។ នាងប្រាប់ថាក្រុមគ្រួសាររបស់នាង ក្រៅពីធ្វើស្រែ និងចិញ្ចឹមជ្រូកនោះ ដើម្បីបំពេញសេចក្តីត្រូវការក្នុងជីវភាពគ្រួសាររស់នៅប្រចាំថ្ងៃ នាងបានប្រកបមុខរបរដាល់អំបុកលក់បន្ថែមទៀតនៅមុខផ្ទះរបស់នាងស្ថិតនៅតាមបណ្តោយផ្លូវជាតិលេខ៦។
កញ្ញា ដា លីន ប្រាប់ថា ចំពោះស្រូវដែលនាងយកមកលីងដាល់អំបុកលក់រាល់ថ្ងៃនេះ គឺមានម៉ូយគេដឹកយកមកដាក់ឲ្យរាល់ថ្ងៃដល់ៗកន្លែង ទៅតាមតម្រូវការដែលអ្នកទិញកុម្មង់ឲ្យគេដាក់ឲ្យ ហើយក្នុងតម្លៃស្រូវ១គីឡូថ្លៃ១៤០០រៀល យកមកលីងដាល់អំបុករួចរែង ហើយយកមកអុំបន្ថែមឲ្យស្អាត ដាក់លើតុលក់ នាងបន្ថែមថា ចំពោះតម្លៃលក់នោះ មិនបានថ្លៃស្មើគ្នានោះទេ សម្រាប់ប្រជាពលរដ្ឋក្នុងភូមិ លក់បាន១កំប៉ុងតម្លៃ១០០០រៀល បើលក់ឲ្យអ្នកជិះតាមរថយន្តដែលតែងតែមកឈប់ទិញបានថ្លៃបន្តិចគឺ៣កំប៉ុងតម្លៃ៥០០០រៀល។ ឆ្លើយនឹងសំណួរដែលអ្នកសារព័ត៌មានយើងសួរថា តើកញ្ញាអាចរកចំណូលបានគិតជាមធ្យមប៉ុន្មានម៉ឺនដែរក្នុង១ថ្ងៃៗនោះ?
នាងហាក់ដូចជាប្រែទឹកមុខបែរជាស្រពោនបន្តិច រួចនិយាយថា ថ្វីត្បិតតែឥឡូវនេះ មុខរបរដាល់អំបុកលក់របស់នាង មិនសូវជាប្រើកម្លាំងមនុស្សច្រើននាក់ដូចពីមុនក្តី តាមរយៈនៃការកែច្នៃមកប្រើម៉ាស៊ីនជំនួសកម្លាំងមនុស្សក៏ដោយ ពីមុនមុខរបរដល់អំបុកប្រើមនុស្ស៣ ទៅ៤នាក់ ឥឡូវប្រើមនុស្សតែម្នាក់ក៏ដោយ ក៏រកចំណូលមិនសូវបានដូចពីពេលមុននោះដែរ។ នាងបន្តថា កាលពីឆ្នាំ២០១៩ នាងដាល់អំបុកលក់អស់ស្រូវចំនួនពីរកូនបេ ស្មើនឹងទម្ងន់៤០គីឡូក្នុងមួយថ្ងៃៗ អាចចំណេញបានប្រាក់ចាប់ពី១០ម៉ឺនទៅជាង១០ម៉ឺនរៀលក្នុង១ថ្ងៃៗ ដល់មកដល់ឆ្នាំ២០២០នេះ ចាប់តាំងពីមានជំងឺកូវីតមក ធ្វើឲ្យពលរដ្ឋក្រីក្រ ចំណែកនាងលក់អំបុកក៏ពុំសូវដាច់ដូចពីមុននោះដែរ ដោយក្នុង១ថ្ងៃនាងដាល់អំបុកអស់ស្រូវយ៉ាងច្រើនតែ១កូនបេ ស្មើងនឹង ២០គីឡូ អាចរកចំណូលបានតែពី៤ទៅ៥ម៉ឺនរៀលតែប៉ណ្ណោះ ដោយមិនទាន់កាត់ថ្លៃប្រេងចាក់ម៉ាស៊ីនផង។
ចំណែកលោក បៀ បន អាយុ៥៥ និងប្រពន្ធឈ្មោះ ឈាវ វឿន អាយុ៥៧ឆ្នាំ រស់នៅភូមិក្រសាំង(ខ) ដែលប្រកបរបរដាល់អំបុកលក់ដែរនោះ បានឲ្យដឹងថា លោកមានកូនចំនួន៧នាក់ ប្រុស៦នាក់ ស្រីម្នាក់ ប្រាប់ថា ក្រៅពីធ្វើស្រែលោកនឹងប្រពន្ធក៏ដាល់អំបុកលក់នឹងគេដែរ តែមិនសូវជាលក់ដាក់ប៉ុន្មាននោះទេ ក្នុងមួយថ្ងៃដាល់អំបុកអស់ស្រូវមិនបាន១កូនបេផង បានចំណេញប្រហែល៣ទៅ៤ម៉ឺនរៀលតែប៉ុណ្ណោះ បើចំថ្ងៃបុណ្យទានទៅ មនុស្សមនាដើរលេងច្រើន គេនាំគ្នាទិញអំបុកទទួលទាន លោកលក់ដាច់អាចបានចំណេញពី១០រៀលឡើងទៅក្នុង១ថ្ងៃ។
ពាក់ព័ន្ធនឹងមុខរបរដាល់អំបុកលក់ខាងលើ លោក អ៊ុន បុត្ត អភិបាលស្រុកកំពង់ស្វាយ បានឲ្យកោះសន្តិភាព ដឹងតាមទូរស័ព្ទនៅព្រឹកថ្ងៃទី១៩ ខែតុលា ឆ្នាំ២០២០ថា មុខរបរដាល់អំបុករបស់ប្រជាពលរដ្ឋនៅក្នុងឃុំសាន់គរ ស្រុកកំពង់ស្វាយរបស់លោក បានបង្កើនចំណូលមួយចំណែកទៀតដើម្បីបំពេញបន្ថែមនៅក្នុងជីវភាពគ្រួសាររបស់ពួកគាត់ បើទោះបីប្រទេសជាតិជួបនូវវិបត្តិជំងឺកូវីតក្តី ក៏ពលរដ្ឋដែលបានប្រកបរបរដាល់អំបុកលក់នេះ មិនធ្វើឲ្យប៉ះពាល់ដល់ជីវភាពរបស់ពួកគាត់ធ្ងន់ធ្ងរនោះដែរ ហើយខាងមន្ទីរពាណិជ្ជកម្មក៏មានគម្រោងសហការជាមួយនឹងអាជ្ញាធរកោះប្រជុំជាមួយនឹងពលរដ្ឋដែលប្រកបរបរដាល់អំបុកលក់នេះ ឲ្យពួកលោកចងក្រងជាសហគមន៍ដើម្បីបង្កើនគុណភាពអំបុក នឹងការវេចខ្ចប់ឲ្យបានត្រឹមត្រូវ មុននឹងដាក់លក់។
លោក ហៀវ វណ្ណា ប្រធានមន្ទីរពាណិជ្ជកម្មខេត្តកំពង់ធំ ប្រាប់ថា បងប្អូនប្រជាពលរដ្ឋដែលប្រកបមុខរបរដាល់អំបុកលក់នៅក្នុងឃុំសាន់គរ ស្រុកកំពង់ស្វាយ មានចំនួនជាង៨០គ្រួសារតែប៉ុណ្ណោះ ហើយពួកលោកភាគច្រើនដាល់អំបុកសម្រាប់លក់រាយឲ្យប្រជាពលរដ្ឋនៅតាមភូមិ និងអ្នកធ្វើដំណើរឆ្លងកាត់មកឈប់សំណតទិញ ចំណែកឯប្រជាពលរដ្ឋមួយចំនួនទៀតដែលរស់នៅក្នុងសង្កាត់ស្រយូវ ក្រុងស្ទឹងសែនវិញនោះ មានចំនួនជាង១០០គ្រួសារ ដែលប្រកបរបរដាល់អំបុកលក់សម្រាប់បោះឲ្យម៉ូយៗដែលមកទទួលទិញពីពួកគាត់យកទៅលក់ចែកចាយបន្ត។
លោកប្រធានមន្ទីរបន្តថា ពលរដ្ឋដែលប្រកបរបរដាល់អំបុកលក់ទាំងអស់មានប្រហែល២០០គ្រួសារ ហើយខាងមន្ទីររបស់លោក មានគម្រោងឲ្យពួកគាត់បង្កើតជាក្រុមសហគមន៍ឲ្យបានលឿននៅចុងខែតុលា ឆ្នាំ២០២០នេះ ក្នុងគោលបំណងឲ្យពួកគាត់បង្កើនពីគុណភាពអនាម័យ នឹងការវេចខ្ចប់អំបុកឲ្យបានត្រឹមត្រូវទៅតាមលក្ខណៈបច្ចេកទេស ដើម្បីយកអំបុកពីខេត្តកំពង់ធំរបស់យើងទៅតាំងពិព័រណ៍ប្រឡងប្រណាំនៅក្នុងព្រះរាជពិធីអំទូកអកអំបុក និងសំពះព្រះខែនៅកោះពេជ្រ រាជធានីភ្នំពេញ ដែលនឹងប្រព្រឹតទៅក្នុងពេលឆាប់ៗនៅឆ្នាំ២០២០ខាងមុខនេះ៕ ដោយ ៖ ថុក សុខា
ចែករំលែកព័តមាននេះ