អីុរ៉ង់ហាមយុវជនកាត់សក់យកទម្រង់ដូច «សត្វប្រមា»
សារព័ត៌មាន «ឌឹអីុនឌីផេនដេន» របស់អង់គ្លេសផ្សាយកាលពីពេល ថ្មីៗនេះថា អាជ្ញាធរអីុរ៉ង់បានប្រកាសហាមមិនឱ្យបុរសកាត់សក់ក្នុងទម្រង់ «ស្បៃគី» ឬយកទម្រង់ជារូបសត្វប្រមា
សារព័ត៌មាន «ឌឹអីុនឌីផេនដេន» របស់អង់គ្លេសផ្សាយកាលពីពេល ថ្មីៗនេះថា អាជ្ញាធរអីុរ៉ង់បានប្រកាសហាមមិនឱ្យបុរសកាត់សក់ក្នុងទម្រង់ «ស្បៃគី» ឬយកទម្រង់ជារូបសត្វប្រមា ព្រោះចាត់ទុកជានិមិត្តរូបនៃបិសាច ។ ក្រៅពីដាក់បម្រាមមិនឱ្យមានជែល(Gel) លាបសក់នោះ ការសាក់ និងទូស្អំស្បែកក៏ចាត់ទុកថាជារឿងខុសច្បាប់ដែរ ។
ជនជាតិអីុរ៉ង់ផ្នែកអភិរក្សនិយមដែលប្រឆាំងនឹងវប្បធម៌ថ្មីនោះ ពិសេសលើម៉ូដសក់សត្វប្រមាដែលទទួលការពេញនិយមចំពោះក្រុមយុវវ័យ បានរិះគន់ថាវាជានិមិត្តរូបនៃបម្រែបម្រួលនៅលោកខាងលិច និងជាទម្រង់សក់លើកស្ទួយផ្នែកបិសាចដោយប្រឆាំងនឹងសាសនា ។
លោកម៉ូស្តាហ្វា កូវ៉ាហ៊ី ប្រធានសមាគមជាងកាត់សក់អីុរ៉ង់និយាយថា បច្ចុប្បន្នទម្រង់សក់នោះកំពុងស្ថិតនៅក្នុងបម្រាម ដូច្នេះជាងកាត់សក់ខុសច្បាប់ស្ថិតនៅក្រៅសមាគមគួរប្រតិបត្តិតាមបម្រាមនោះ ។ ចំណែកជាងសក់ដែលមានលិខិតអនុញ្ញាត ប្រសិនបើល្មើសនឹងត្រូវដកហូតសិទ្ធិអាជីវកម្ម ។
កាលពីខែមីនាកន្លងមកអាជ្ញាធរអីុរ៉ង់ព្រមានថា នឹងធ្វើឱ្យស្ត្រីក្លាយជា «រោងចក្រផលិត កូន» តាមរយៈការចេញច្បាប់ហាមមិនឱ្យបុរសក្រៀវ និងហាមផ្សព្វផ្សាយពាណិជ្ជកម្មទាក់ទិននឹងការពន្យារកំណើត ។
កាលពីមុននេះ អីុរ៉ង់ព្យាយាមបន្ធូរបន្ថយច្បាប់ទម្លាប់ ផ្សេងៗដែលតឹងរ៉ឹង ដោយលុបចោលការហាមស្ត្រីចូលទស្សនាកីឡាដែលបុរសលេង ប៉ុន្តែមានលក្ខខណ្ឌដ៏តឹងរ៉ឹងសម្រាប់ដាក់គំនាបដល់ស្ត្រី ។
ជាក់ស្តែងកាលពីខែកញ្ញា២០១៤ អាជ្ញាធរអីុរ៉ង់បានចាប់ខ្លួនបុរស និងស្ត្រីចំនួន៧នាក់ដែលថត និងច្រៀងដោយយកលំនាំតាមបទចម្រៀងដ៏ល្បី «Happy»របស់លោកហ្វារ៉េស វីល្លៀម ដោយពួកគេត្រូវសម្រេចដោយព្យួរទោសពីការជាប់គុក និងវាយនឹងរំពាត់ចំនួន៩១លើក ៕
ចែករំលែកព័តមាននេះ