ប្រទេសថៃ ៖ តាមព័ត៌មានចុងក្រោយនាថ្ងៃទី២២តុលាថា នាយករដ្ឋមន្ត្រីថៃលោកប្រាយុទ្ធ ចាន់អូចា ទីបំផុតបានប្រកាសពីការលុបចោលវិញ ការប្រកាសអាសន្ននៅក្រុងបាងកក ដែលនោះជាជោគជ័យមួយសម្រាប់ពួកបាតុករ។
លោកប្រាយុទ្ធចាន់អូចាដើម្បីរំងាប់ចិត្តពួកបាតុករ ថ្លែងកាលពីថ្ងៃទី២១តុលាថា រដ្ឋាភិបាលរបស់លោកត្រៀមលុបចោលការប្រកាសអាសន្ន ដែលបានធ្វើកាលពីសប្ដាហ៍មុននៅក្រុងបាងកកនិងថា ជម្លោះជាមួយពួកបាតុករដែលទាមទារជាពិសេសឲ្យលោកលាលែងចេញពីតំណែងនឹងត្រូវដោះស្រាយក្នុងសភា ។
ការប្រកាសវិធានការនោះកាលពីថៃ្ងទី១៥ តុលា បង្កឲ្យមានបាតុកម្មកាន់តែធំៗ ក្រោយមានបាតុកម្មចាប់តាំងពី៣ខែមកហើយ ។ បាតុកម្មទាមទារឲ្យលោកប្រាយុទ្ធចាន់អូចាចាកចេញពីតំណែងឲ្យមានការកែទម្រង់នានា ដែលសំដៅកម្រិតអំណាចរបស់ព្រះមហាក្សត្រមហាវេជីរ៉ាឡុងកន ។
ក្នុងសុន្ទរកថាមួយទៅកាន់ប្រជាជាតិ លោកប្រាយុទ្ធថ្លែងថា ខ្ញុំនឹងបោះជំហានទៅមុខមួយ ដើម្បីដោះស្រាយសភាពការណ៍ ។ ពេលនេះខ្ញុំរៀបចំសម្រាប់ការលុបចោលវិញ ការប្រកាសអាសន្ននៅក្រុងបាងកកហើយខ្ញុំនឹងធ្វើដោយឆាប់រហ័ស ប្រសិនបើគ្មានឧប្បត្តិហេតុហិង្សានានា ។
វិធានការប្រកាសអាសន្នហាមឃាត់ជាពិសេសការប្រមូលផ្ដុំគ្នាបែបនយោបាយលើសពី៥នាក់ និងហាមផ្សព្វផ្សាយព័ត៌មាននានាដែលយល់ថា គំរាមកំហែងដល់សន្តិសុខជាតិ ។
ពួកបាតុករទាមទារឲ្យមានរដ្ឋធម្មនុញ្ញថ្មីមួយសម្រាប់ជំនួសរដ្ឋធម្មនុញ្ញតាក់តែងដោយរបបយោធាដែលដណ្ដើមអំណាចក្នុងការធ្វើរដ្ឋប្រហារមួយកាលពីឆ្នាំ២០១៤ ។ លោកប្រាយុទ្ធ ចាន់អូចា បានក្លាយទៅជាប្រមុខរដ្ឋាភិបាលស៊ីវិលមួយ ក្រោយការបោះឆ្នោតសភាកាលពីឆ្នាំ២០១៩មក។
ពេលដែលលោកប្រាយុទ្ធថ្លែងសុន្ទរកថានោះ បាតុករច្រើនសិបពាន់នាក់បានលើកគ្នាដើរហែក្បួនឆ្ពោះមកកាន់វិមានរដ្ឋាភិបាលដើម្បីឲ្យគេបំពេញតាមការទាមទាររបស់ពួកគេ ។ បាតុករម្នាក់និយាយថាបែបនេះនៅមិនទាន់គ្រប់គ្រាន់ទេ លោកប្រាយុទ្ធត្រូវតែចាកចេញពីតំណែង ។
លោក TATTEP RUANGPRAPAIKITSEREE មេខ្លោងបាតុករមួយរូបក៏ទាមទារជាថ្មីឲ្យនាយករដ្ឋមន្ត្រីចាកចេញពីតំណែង តែដោយយល់ស្របថាការទាមទាររបស់ពួកអ្នកតវ៉ា អាចពិភាក្សាគ្នានៅក្នុងសភា ។ សំខាន់លោកប្រាយុទ្ធត្រូវតែលាលែងនោះជារឿងងាយធ្វើបំផុត ៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ