រាជធានីភ្នំពេញ ៖ លោក ករុណា ពេជ្រ បើទោះជាស្ងប់បង្ហាញវត្តមានចម្រៀង តែតារាប្រុសធ្លាប់ល្បីឈ្មោះរូបនេះ នៅតែបង្ហាញសកម្មភាពជាមួយការងារសង្គមដែរ។ លោកត្រូវបានគេលើកសរសើរថា ចិត្តអំណត់…
រាជធានីភ្នំពេញ ៖ លោក ករុណា ពេជ្រ បើទោះជាស្ងប់បង្ហាញវត្តមានចម្រៀង តែតារាប្រុសធ្លាប់ល្បីឈ្មោះរូបនេះ នៅតែបង្ហាញសកម្មភាពជាមួយការងារសង្គមដែរ។ លោកត្រូវបានគេលើកសរសើរថា ចិត្តអំណត់ ព្រោះជាកូនប្រុសទេ តែខំរកលុយព្យាបាលជំងឺឪពុកឱ្យលោកកក់ក្តៅសឹងថា កូនស្រីខ្លះមិនដូចគាត់ផង។ ម្ល៉ោះហើយ ថ្ងៃសំខាន់ករុណា ពេជ្រសម្រេចបង្ហាញអ្វីល្អៗជួយដល់សេចក្តីមេត្តា។
តារាចម្រៀង ករុណា ពេជ្រ កាលពីពេលថ្មីៗនេះ ក្រោយពេលបានកៀរគរអំណោយទាំងក្នុង និងក្រៅស្រុក ដើម្បីយកទៅចែកជូនបងប្អូនដែលរងគ្រោះដោយសារតែទឹកជំនន់នៅខេត្តកំពង់ស្ពឺ មិនទាន់បាត់ហត់ផង ស្រាប់តែប្រកាសថា នាប៉ុន្មានថ្ងៃខាងមុខទៀតនេះ លោកនឹងនាំយកអំណោយទៅចែកជូនកុមារកំព្រាបន្ថែមទៀតទុកជាកាដូសម្រាប់ខ្លួនឯងនៅថ្ងៃខួបកំណើត។
តារាចម្រៀងរូបនេះបានប្រកាសថា ឆ្នាំនេះ មិនបានរៀបចំកម្មវិធីធំដុំអ្វីទេ ពោលគឺលោកបានចំណាយថវិកាសម្រាប់ជប់លៀង យកទៅបង្វែរមកជាកម្មវិធីចែកអំណោយដល់កុមារកំព្រាវិញម្តង ព្រោះតែលោកបានមើលឃើញថា ការជួយគ្នាក្នុងគ្រាលំបាក គឺជាសេចក្តីសុខផ្លូវចិត្តដែលលោកត្រូវតែធ្វើ។
លោកបានសរសេររៀបរាប់នៅលើបណ្តាញសង្គមថា «រួមគ្នា ដើម្បីកំពង់ស្ពឺ ចាស់ហើយ ចង់ធ្វើបុណ្យ… សម្រេចចិត្តក្នុងថ្ងៃទី២០.១០.២០២០ នេះតែម្តង… ឆាប់ៗនេះខ្ញុំនឹងនាំសម្ភារៈ ស្បៀងអាហារ អង្ករ និងថវិកាមួយចំនួន ដើម្បីចុះផ្ទាល់ផ្តល់ជូនប្អូនៗដែលជាកុមារកំព្រា ដែលកំពុងរស់នៅមណ្ឌលកុមារកំព្រា នួន អក ព្រៃជុំ នៅខាងក្រោយវត្តព្រៃជុំ ភូមិព្រៃជុំ ឃុំយុទ្ធសាមគ្គី ស្រុកឧដុង្គ ខេត្តកំពង់ស្ពឺ… បងប្អូនអាចចូលរួមជាសម្ភារៈ និងថវិកាជាមួយខ្ញុំបាទ…»។
លោក ករុណា ពេជ្រ បានប្រាប់ថា នេះជាទឹកចិត្តបន្តិចបន្តួច ដើម្បីផ្តល់ភាពកក់ក្តៅដល់កុមារកំព្រា ម្យ៉ាងក៏ចង់ធ្វើបុណ្យសន្សំកុសលឱ្យបានច្រើន ព្រោះមនុស្សម្នាក់ៗមិនទៀងទាត់ពេលវេលានោះទេ អ៊ីចឹងទាន់មានពេលវេលាឱកាស ត្រូវតែចែករំលែកឱ្យហើយ៕
ចែករំលែកព័តមាននេះ