រាជធានីភ្នំពេញ ៖ បើទោះជាមានការណែនាំ និងបណ្ដុះបណ្ដាលយ៉ាងណាក៏ដោយ ក៏កីឡាករមួយចំនួននៅក្នុងវិស័យប្រដាល់សេរី ឬ ហៅថាប្រដាល់គុនខ្មែរ នៅតែមានបញ្ហាវិន័យ និងក្រមសីលធម៌កើតឡើងដដែល ។ ពាក់ព័ន្ធនឹងបញ្ហានេះ ថ្នាក់ដឹកនាំកីឡាប្រដាល់គុនខ្មែរក៏បានទទួលស្គាល់ផងដែរ។
យោងតាមការលើកឡើងរបស់ប្រធានសហព័ន្ធកីឡាប្រដាល់គុនខ្មែរ ដែលបានជំរុញឲ្យ កីឡាករជម្រើសជាតិគុនខ្មែរខិតខំប្រតិបត្តិនូវវិន័យ ក្រមសីលធម៌ និងមានឆន្ទៈខ្ពស់ទាំងក្នុង ការហ្វឹកហាត់ និងការប្រកួតទាំងក្នុងក្របខណ្ឌ ជាតិ និងអន្តរជាតិ គឺបានបង្ហាញយ៉ាងច្បាស់ថា លោកមានការព្រួយបារម្ភដោយសារតែនៅក្នុងវិស័យប្រដាល់ គឺមានកីឡាករដែលជ្រកនៅក្នុងវិស័យមួយនេះ នៅតែមានបញ្ហាខ្វះវិន័យ និងឆេវឆាវ ដែលអាចនិយាយបានថា មិនទាន់មានក្រមសីលធម៌ក្នុងពេលឡើងប្រកួត។
លោកឧត្ដមសេនីយ៍ឯក តែម ម៉ឺន ប្រធាន សហព័ន្ធកីឡាប្រដាល់គុនខ្មែរ ទទួលស្គាល់ថា បើទោះជាចាប់ផ្ដើមមានសភាពល្អប្រសើរជាងមុន ប៉ុន្តែនៅតែមានកីឡាករប្រដាល់អាជីពមួយចំនួនគ្មានទម្លាប់ល្អក្នុងនាមជាកីឡាករដោយខ្លះចុះពីប្រកួតទៅផឹក ឬដើរលេងបណ្ដាលឱ្យការដេកពួនមិនគ្រប់គ្រាន់ និងបណ្ដាលឱ្យខ្សោយកម្លាំងជាដើម ។
លោកថា កីឡាករល្អម្នាក់ គឺសំខាន់ណាស់ សម្រាប់ការថែរក្សាសុខភាព មានរបបអាហារ និងត្រូវមានពេលវេលាហ្វឹកហាត់ច្បាស់លាស់ ប្រសិនបើគ្មានវិន័យគឺស្មើនឹងមិនមានឆន្ទៈធ្វើជាកីឡាករតាមក្បួនខ្នាត ។ លោកថាកីឡាករត្រូវមានវិន័យជាមុន ដោយត្រូវដឹងថាក្នុងមួយថ្ងៃត្រូវហាត់ប៉ុន្មានម៉ោង ត្រូវទម្លាប់ខ្លួនក្នុងការរស់នៅដូចម្ដេច និងសំខាន់ជាងគេ គឺត្រូវដឹងថាខ្លួនឯងត្រូវសម្រាកប៉ុន្មានម៉ោង ដោយមិនមែនមានលុយដើរលេង ហើយទាល់តែកៀកថ្ងៃប្រកួត ទើបប្រឹងប្រែងហ្វឹកហាត់នោះទេ។
ក្នុងនោះសម្រាប់ក្រមសីលធម៌វិញ ក៏លោកទទួលស្គាល់ថា អ្នកប្រដាល់មួយចំនួននៅមិនទាន់ល្អផងដែរ ដោយអ្នកខ្លះបានយកការប្រដាល់ ធ្វើជាសង្វៀនសងសឹកគ្នា ខ្លះឌឺដងគ្នា និងខ្លះបានទាំងបង្ហាញភាពឆេវឆាវ ធ្វើឱ្យបាត់បង់តម្លៃក្នុងនាមជាកីឡាករនោះផង ។ លោកថា នេះគឺជារឿងប៉ះពាល់ ហើយមិនមែនតែកីឡាករមិនទាន់ល្បីនោះទេ ដែលមានបញ្ហាបែបនេះ អ្នកល្បីមួយចំនួន ក៏នៅខ្វះក្រមសីលធម៌ក្នុងនាមជាកីឡាករផងដែរ ។
លោកបានផ្តល់អនុសាសន៍ ឱ្យកីឡាករទាំងអស់មានទំនួលខុសត្រូវខ្ពស់ ដោយការលើកឡើងនេះ គឺលោកបញ្ជាក់ដដែលជាដដែល និងបានលើកឡើងដោយសង្កត់ធ្ងន់ម្ដងទៀតនៅក្នុងកិច្ចប្រជុំជាមួយគ្រូបង្វឹក និង កីឡាករជម្រើសជាតិគុនខ្មែរ កាលពីល្ងាចថ្ងៃទី ២១ កញ្ញា ២០២០ កន្លងទៅ នៅស្នាក់ការសហព័ន្ធក្នុងពហុកីឡដ្ឋានជាតិ។
ប្រធានសហព័ន្ធកីឡាប្រដាល់គុនខ្មែរ លោក ឧត្ដមសេនីយ៍ឯក តែម ម៉ឺន បានមានប្រសាសន៍ថា ការប្រតិបត្តិវិន័យ ក្រមសីលធម៌ និងមាន ឆន្ទៈខ្ពស់ ជាប្រការដ៏សំខាន់បំផុតរបស់កីឡាករ ជម្រើសជាតិគុនខ្មែរ ដែលត្រូវតែខិតខំប្រតិបត្តិ ឲ្យបានខ្ជាប់ខ្ជួនជានិច្ច ដើម្បីរក្សាភាពថ្លៃថ្នូរ ជ័យជម្នះ សក្ដិសមជាកីឡាករតំណាងប្រទេសជាតិ ។
លោកសង្កត់ធ្ងន់ថា ជាក្រុមកីឡាករជម្រើសជាតិគុនខ្មែរ ត្រៀមខ្លួនចូលរួមព្រឹត្តិការណ៍ការប្រកួតកីឡាស៊ីហ្គេមលើកទី៣១ នៅ ប្រទេសវៀតណាម នាខែវិច្ឆិកា ខាងមុខនេះ ។
ជាមួយនឹងការផ្តល់អនុសាសន៍ លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ ក៏បានចែកសម្ភារដល់កីឡាករជម្រើសជាតិទាំង៨នាក់ម្នាក់ៗទទូលបាននូវខោប្រដាល់គុនខ្មែរ ២ និងកាបូប១ ។ យ៉ាងណាក៏ដោយលោកទទួលស្គាល់ថា កីឡាករដែលមានបញ្ហាបែបនេះ គឺមានមិនច្រើនទៀតទេ ។ កីឡាករដែលបានឮប្រសាសន៍ សុទ្ធតែបានប្តេជ្ញាចិត្ត គោរព និងអនុវត្តន៍តាមគោលការណ៍ណែនាំរបស់ ប្រធានសហព័ន្ធ ១០០ ភាគរយ ។ ក្នុងនោះ កីឡាករដែលមានកង្វះខាតលើផ្នែកវិន័យ និង ក្រមសីលធម៌ ក៏ត្រូវបានគេបញ្ឈរជើងមិនឱ្យប្រកួតនោះផង ទើបបញ្ហាដែលបានលើកឡើងនេះ កាន់តែត្រូវបានកាត់បន្ថយ ។
សូមបញ្ជាក់ថា កាលពីពីរសប្តាហ៍មុនលោកឧត្ដមសេនីយ៍ឯកតែម ម៉ឺន បានណែនាំដល់កីឡាករប្រដាល់គុនខ្មែរ ដែលស្ថិតក្នុងក្រុមជម្រើសជាតិឈុតធំឆ្នាំ២០២០ គឺកីឡាករ ឡៅ ចិន្ត្រា និងកីឡាករ យ៉េន ឌីណា ដើម្បីពង្រឹងវិន័យ ក្រមសីលធម៌ប្រកួតឲ្យសក្ដិសមជាកីឡាករថ្នាក់ជាតិ ៕
ចែករំលែកព័តមាននេះ