ខេត្តកំពង់ឆ្នាំង ៖ ផ្ទះឈើប្រក់ដំបូលហ្វីប្រូស៊ីម៉ង់ត៍មួយខ្នង មានទំហំ៨ម៉ែត្រគុណនឹង៦ម៉ែត្រ ត្រូវបានអគ្គីភ័យឆាបឆេះខ្ទេចអស់ទាំងស្រុង កាលពីវេលាម៉ោង៧និង៣០នាទីព្រឹក ថ្ងៃទី២២ ខែតុលា ឆ្នាំ២០២០ នៅក្នងភូមិអូតានេស ឃុំរលាប្អៀរ ស្រុករលាប្អៀរ ខេត្តកំពង់ឆ្នាំង ។
តាមសមត្ថកិច្ចមូលដ្ឋានបានអោយដឹងថា ផ្ទះមួយខ្នងដែលត្រូវអគ្គីភ័យឆាបឆេះខាងលើនោះ មានម្ចាស់ឈ្មោះ កុប ម៉ាត់ អាយុ៣២ឆ្នាំ និងប្រពន្ធឈ្មោះ ម៉ូត ស៊ីមៈ អាយុ៣០ឆ្នាំ រស់នៅក្នុងភូមិឃុំកើតហេតុខាងលើ ។
តាមប្រភពដដែលបានបន្តថា មុនពេលកើតហេតុ ម្ចាស់ផ្ទះបាននាំគ្នាចុះមកក្រោមអស់ គ្មាននរណានៅលើផ្ទះនោះទេ ស្រាប់តែមានអណ្តាតភ្លើងបានឆាបឆេះនៅលើផ្ទះយ៉ាងសន្ធោសន្ធៅ ភ្លាមៗនោះម្ចាស់ផ្ទះបានស្ទុះចូលទៅពន្លត់ជាមួយអ្នកជិតខាងដែរ ប៉ុន្តែមិនអាចទៅរួចឡើយ ព្រោះភ្លើងបានឆេះខ្លាំងណាស់ទៅហើយ ។ ចំណែករថយន្តពន្លត់អគ្គីភ័យបានត្រឹមតែជួយបាញ់ទឹកពន្លត់ទប់ស្កាត់មិនឱ្យភ្លើងឆ្លងរាលដាលទៅផ្ទះអ្នកជិតខាងប៉ុណ្ណោះ។
ក្នុងករណីខាងលើនេះបណ្តាលអោយម្ចាស់ផ្ទះរងរបួសធ្ងន់ពេលព្យាយាមចូលទៅពន្លត់ ហើយត្រូវបានបញ្ជូនទៅសង្គ្រោះនៅមណ្ឌលសុខភាពព្រៃខ្មែរ ។ ចំពោះការបាត់បង់ទ្រព្យសម្បត្តិ រួមមាន អង្ករ១បេ, ទូរទស្សន៍១គ្រឿង, លុយចំនួន២លាន៥០ម៉ឺនរៀល និងសម្ភារៈប្រើប្រាស់នៅក្នុងផ្ទះមួយចំនួនធំ។
សមត្ថកិច្ចបានបញ្ជាក់ថា មូលហេតុបណ្តាលមកពីការដុតធូបមុសទុកចោលនៅលើផ្ទះ ទើបបង្កជាអគ្គិភ័យឆាបឆេះបែបនេះតែម្តង ៕ (កែសម្រួលដោយ ៖ ធីតា)
ចែករំលែកព័តមាននេះ