រាជធានីភ្នំពេញ ៖ ប៉ុន្មានថ្ងៃមកនេះទស្សនិកជនបានសម្តែងការភ្ញាក់ផ្អើលយ៉ាងខ្លាំងក្នុងពេលដែលគេបានឃើញរូបភាពមួយសន្លឹករបស់នាង ខ្លឹម ស្រីគា បានបង្ហាញពីភាពស្និតស្នាលយ៉ាងផ្អែមល្ហែមជាមួយតារាសម្តែងវ័យក្មេងលោក ម៉ឺន ឯកសុភារិទ្ធ ដែលត្រូវបានបង្ហោះតាមបណ្តាញសង្គមហ្វេសប៊ុក។
ជាមួយនឹងការបង្ហាញរូបភាពកៀកកិតគ្នាដូចស្ករតាំងម៉ែនោះ អ្នកទាំងពីរក៏ថែមទាំងរំលេចសារផ្អែមល្អែមជាមួយគ្នាផងដែរ ក្នុងនោះកញ្ញាឯក Miss Grand Cambodia ខ្លឹម ស្រីគា បានសរសេរថា «នៅក្បែរអូនបែបនេះរហូតបានទេ? មិនយូរទេ សុំត្រឹមមួយជីវិត Meun Ek Sophearith Privat យូរហើយ គ្រាន់តែសុំស្រឡាញ់គ្នាសោះចាំបាច់ខ្មាស់គេធ្វើអ្វី»។
ចំណែកលោក ម៉ឺន ឯកសុភារិទ្ធ ក៏បានបង្ហោះសារឆ្លើយតបវិញថា «បងសុំទោសដែលបងមិនក្លាហាន មិនហ៊ានបើកចំហ ដែលធ្វើឱ្យអូនមិនសប្បាយចិត្ត»។
តាមរយៈសារដ៏ផ្អែមល្ហែម និងចាក់ដោត ដែលអ្នកទាំងពីរបានឆ្លើយឆ្លងគ្នានេះ បានធ្វើឲ្យមហាជន ជាពិសេសបណ្តាអ្នកលេងហ្វេសប៊ុកបានសម្តែងការភ្ញាក់ផ្អើល និងសន្និដ្ឋានថា អ្នកទាំងពីរកំពុងតែសាងទំនាក់ទំនងក្រៅឆាកជាមួយគ្នាយ៉ាងពិតប្រាកដ ដោយមិនខុសពីតារាមួយចំនួនទៀតឡើយ។
យ៉ាងណាពាក់ព័ន្ធនឹងបញ្ហាខាងលើនេះ តារាសម្តែងរាងខ្ពស់ស្រឡះនាង ខ្លឹម ស្រីគា បានអះអាងប្រាប់កោះសន្តិភាពតាមសារអេឡិចត្រូនិចថា អ្វីដែលមហាជន និងសារព័ត៌មានបានចុះផ្សាយពីទំនាក់ទំនងរបស់នាង និងលោក ម៉ឺន ឯកសុភារិទ្ធ នាពេលនេះ គឺមិនមែនជាការពិតដូចការយល់ឃើញនោះឡើយ។
នាងបញ្ជាក់ថា ទំនាក់ទំនងរវាងនាង និងលោក ម៉ឺន ឯកសុភារិទ្ធ គឺគ្រាន់តែជាដៃគូសម្តែងប៉ុណ្ណោះ មិនមានអ្វីក្រៅពីនេះឡើយ ខណៈពេលដែលរូបភាពដែលទស្សនិកបានឃើញនេះ គឺគ្រាន់តែជារូបភាពលេងសើច និងជាចំណីភ្នែកប៉ុណ្ណោះ ពោលគឺមិនមែនជាទំនាក់ទំនងស្នេហាអ្វីនោះឡើយ។
យ៉ាងណាក៏ដោយ បើតាមនាង ខ្លឹម ស្រីគា ទាំងរូបភាព និងសារឆ្លើយឆ្លងរបស់ពួកនាងនាពេលនេះ គឺគ្រាន់តែជាការលេងសើចប៉ុណ្ណោះ ហើយនាងក៏សុំធ្វើការបដិសេធចោលទាំងស្រុងនូវការចុះផ្សាយព័ត៌មានថា នាងមានទំនាក់ទំនងក្រៅឆាកសម្តែងជាមួយនឹងលោក ម៉ឺន ឯកសុភារិទ្ធ។
ជាការកត់សម្គាល់ ការបង្ហាញពីភាពស្និតស្នាលរបស់នាង ខ្លឹម ស្រីគា និងលោក ម៉ឺន ឯកសុភារិទ្ធ នាពេលនេះ បើទោះបីជាវាជារឿងពិត ឬមិនពិតក៏ដោយ ប៉ុន្តែចាត់ទុកថា នេះមិនមែនជារឿងមួយថ្មីឡើយ សម្រាប់តារានាពេលបច្ចុប្បន្នដែលភាគច្រើនតែងតែបង្ហាញពីទំនាក់ទំនងស្នេហ៍របស់ខ្លួនដោយបើកចំហរ និងមិនខ្លាចបាត់បង់ប្រជាប្រិយភាពនោះឡើយ។
មានអ្នកសិល្បៈមួយចំនួនក៏បានក្លាយជាដៃគ្នាយ៉ាងស្និតស្នាលទាំងក្នុងការសម្តែង និងក្រៅការសម្តែង ហើយមួយចំនួនទៀតក៏បានឈានដល់ការយល់ចិត្តគ្នា ហើយក៏បានដឹកដៃគ្នាចូលរោងការកសាងសុភមង្គលគ្រួសារ ដោយមិនខ្លាចធ្លាក់ប្រជាប្រិយភាពក្នុងអាជីពសិល្បៈនោះឡើយ។
ទោះជាយ៉ាងណា សម្រាប់ភាពស្និតស្នាលរវាងនាង ខ្លឹម ស្រីគា និងលោក ម៉ឺន ឯកសុភារិទ្ធ នាពេលនេះក៏ទទួលបានការសាទរផងដែរ ពីសំណាក់ប្រិយមិត្តគាំទ្រ បើទោះបីជាទៅថ្ងៃអនាគតពួកគេទាំងពីរអាចក្លាយជាដៃគូជីវិតពិតប្រាកដ ឬមិនមែនក៏ដោយ ប៉ុន្តែភាពស្និតស្នាលនោះក៏ត្រូវបានគេមើលឃើញថា ពិតជាមានភាពសាក់សមនឹងគ្នាផងដែរ៕
ចែករំលែកព័តមាននេះ