អាជ្ញាធរជាតិអប្សរាដកហូតដើមឈើដែលមានហានិភ័យខ្ពស់ ក្នុងបរិវេណប្រាសាទបន្ទាយស្រី!
ខេត្តសៀមរាប ៖ នៅថ្ងៃទី ២២ ខែ តុលា ឆ្នាំ ២០២០ ក្រុមការងារគ្រប់គ្រងព្រៃឈើ ទេសភាពវប្បធម៌…
ខេត្តសៀមរាប ៖ នៅថ្ងៃទី ២២ ខែ តុលា ឆ្នាំ ២០២០ ក្រុមការងារគ្រប់គ្រងព្រៃឈើ ទេសភាពវប្បធម៌ និងបរិស្ថាន នៃអាជ្ញាធរជាតិអប្សរា កំពុងកាត់ដកហូតដើមឈើដែលមានហានិភ័យខ្ពស់ក្នុងបរិវេណប្រាសាទបន្ទាយស្រី។
ដើម្បីឆ្លើយតបចំពោះដើមឈើដែលកំពុងមានហានិភ័យខ្ពស់មកលើប្រាង្គប្រាសាទបន្ទាយស្រី អាជ្ញាធរជាតិអប្សរា បានកាត់ដកហូតដើមឈើទាលមួយដើម ដែលមានមុខកាត់១០០ស.ម និងកំពស់ប្រហែល៤០ម៉ែត្រ ដុះជាប់នឹងកំពែងខាងត្បូងក្នុងប្រាសាទបន្ទាយស្រី មានលក្ខណៈទ្រេតខ្លាំងទៅលើកំពែង និងថ្មចម្លាក់ សណ្ឋានដីជ្រាយ និងមានប្រព័ន្ធឫសខ្សោយ។
អាជ្ញាធរជាតិអប្សរា បានបន្ថែមថា ដោយសារទីតាំងដើមឈើនោះកៀកនឹងប្រាសាទ និងមានកម្ពស់ខ្ពស់ផង មិនអំណោយផលដល់រថយន្តស្ទូចដើម្បីចូលទៅកាត់ ដែលតម្រូវឲ្យក្រុមការងារត្រូវប្រើប្រាស់រន្ទាដែកជំនួសវិញ ជាហេតុត្រូវប្រើពេលវេលាយូរបន្តិចក្នុងការដំឡើង ប៉ុន្តែផ្តល់សុវត្ថិភាពខ្ពស់ចំពោះប្រាសាទផង និងមនុស្សផង។
ក្រៅពីដើមឈើទាលមួយដើមនេះ ក្រុមការងារក៏បានសិក្សាពីហានិភ័យដើមឈើផ្សេងទៀត ស្ថិតក្នុង និងក្រៅបរិវេណប្រាសាទបន្ទាយស្រី ដែលអាចនឹងបង្កគ្រោះថ្នាក់ដល់ប្រាសាទ និងមនុស្ស និងបានរៀបចំជាផែនទីហានិភ័យដើមឈើរួចហើយ ដែលក្នុងនោះមានដើមឈើសរុបចំនួន៥០ដើម ដោយចែកចេញជា៣កម្រិតហានិភ័យគឺ៖ ហានិភ័យខ្លាំងមានចំនួន១០ដើម(ត្រូវកាត់ដកហូតចេញ) ហានិភ័យមធ្យមចំនួន៣០ដើម(កាត់ក្រីមែកខ្លះ) និងហានិភ័យខ្សោយចំនួន១០ដើម(កាត់ក្រីមែកខ្លះ)។
ជាវិធានការដើម្បីបង្ការហានិភ័យដើមឈើទាំងអស់នេះមកលើប្រាសាទបន្ទាយស្រី អាជ្ញាធរជាតិអប្សរា នឹងដាក់ជូនសុំយោបល់ពីអ្នកជំនាញនៃគណៈកម្មាធិការអន្តរជាតិ សម្របសម្រួលកិច្ចគាំពារ និងអភិវឌ្ឍន៍តំបន់អង្គរ (ICC-Angkor) ដើម្បីពិនិត្យ និងផ្តល់អនុសាសន៍បន្តទៀត ដើម្បីការងារនេះអនុវត្តបានទាន់ពេលវេលា និងមានប្រសិទ្ធភាពខ្ពស់៕
ចែករំលែកព័តមាននេះ