រាជធានីភ្នំពេញ ៖ អគ្គិភ័យមួយបានលេបត្របាក់អតីតក្លិបកម្សាន្ត«៥៥»ដោយសារក្រុមជាងកាត់ដែក ដែលបង្កឲ្យមានការភ្ញាក់ផ្អើលយ៉ាងខ្លាំងទៅដល់កម្លាំងមានសម្ថកិច្ច និងរថយន្តពន្លត់អគ្គិភ័យរាប់សិបគ្រឿងទៅធ្វើអន្តរាគមន៍បាញ់ទឹកពន្លត់ ។ ហេតុការណ៍នេះ បានកើតឡើងកាលពីវេលាម៉ោង៥និង៣០នាទីល្ងាចថ្ងៃទី២១ ខែតុលា ឆ្នាំ២០២០…
រាជធានីភ្នំពេញ ៖ អគ្គិភ័យមួយបានលេបត្របាក់អតីតក្លិបកម្សាន្ត«៥៥»ដោយសារក្រុម
ជាងកាត់ដែក ដែលបង្កឲ្យមានការភ្ញាក់ផ្អើលយ៉ាងខ្លាំងទៅដល់កម្លាំងមានសម្ថកិច្ច និងរថយន្តពន្លត់អគ្គិភ័យរាប់សិបគ្រឿងទៅធ្វើអន្តរាគមន៍បាញ់ទឹកពន្លត់ ។ ហេតុការណ៍នេះ បានកើតឡើងកាលពីវេលាម៉ោង៥និង៣០នាទីល្ងាចថ្ងៃទី២១ ខែតុលា ឆ្នាំ២០២០ ដែលក្លិបខាងលើស្ថិតនៅចំណុចកែងរវាងផ្លូវលេខ៥៥និងផ្លូវលេខ២៤០ ក្នុងសង្កាត់ចតុមុខ ខណ្ឌដូនពេញ។
តាមប្រភពព័ត៌មានឲ្យដឹងថា មុនពេលកើតហេតុ គេឃើញមានកម្មករមួយក្រុមដោយមានអេស្កាវ៉ាទ័រមួយគ្រឿងផង ប្រដាប់ដោយញញួរ ពូថៅ រួមទាំងឧបករណ៍ផ្សេងៗជាច្រើនទៀត នាំគ្នាមកធ្វើការវាយកម្ទេចក្លិបកម្សាន្តយីហោ«៥៥ »នេះចោល ។ ចំណែកក្រុមជាងកាត់ដែក បានប្រើម៉ាសុីនអេឡិចទ្រិកកាត់ដែក ធ្វើឲ្យផ្កាភ្លើងខ្ទាតបង្កជាអគ្គិភ័យឆាបឆេះតែម្តង ដោយសារសំណង់ក្លិបនេះសម្បូរទៅដោយគ្រឿងជ័រ ពូកអេ
ប៉ុង ឬក៏របស់របរប្រើប្រាស់ចាស់ៗដែលគេទុកចោល ទើបបង្កជាអណ្តាតភ្លើងឆាបឆេះយ៉ាងសន្ធោសន្ធៅតែម្តង។
តាមប្រភពព័ត៌មានថា ពេលមានអណ្តាតភ្លើងឆាបឆេះឡើងយ៉ាងសន្ធោសន្ធៅនោះ ក្រុុមជាងក៏នាំគ្នាប្រវេប្រវាយកទឹកមកជះពន្លត់ដែរតែមិនអាចធ្វើឲ្យភ្លើងរលត់បានទេ ។ ខណះនោះ ក៏បណ្តាលឲ្យមានការភ្ញាក់ផ្អើលទៅដល់កម្លាំងសមត្ថកិច្ចកិច្ចខណ្ឌដូនពេញ ដឹកនាំដោយលោកសុខ ពេញវុធ អភិបាលខណ្ឌ នាំកម្លាំងយ៉ាងច្រើនមកដល់កន្លែងកើតហេតុ និងទាក់ទងហៅរថយន្តពន្លត់អគ្គិភ័យរាប់សិបគ្រឿងមកធ្វើអន្តរាគមន៍បាញ់ទឹកពន្លត់ ។
ពាក់ព័ន្ធទៅនឹងករណីកើតមានអគ្គិភ័យឆាបឆេះអតីតក្លិបកម្សាន្ត«៥៥»នេះ ទំនងជាកើតឡើងដោយសារតែក្រុមអ្នកវាយកម្ទេចក្លិប វាយឬកាត់ដែកធ្នឹមធ្លាក់ផ្កាភ្លើងទៅលើពូកអេប៉ុងឬក៏របស់របរចាស់ៗដែលគេទុកចោលនៅក្នុងនោះ ទើបបានជាឆេះងាយបែបនេះ ។ការបាញ់ទឹកពន្លត់ រហូតមកដល់ម៉ោងប្រមាណ៦និង៣០នាទីល្ងាចថ្ងៃដដែល ទើបគ្រប់គ្រងស្ថានការណ៍បាន និងមិនបង្កឲ្យឆបឆេះរាលដាលទៅដល់ផ្ទះនៅក្បែរខាង ឬមនុស្សណាម្នាក់រងគ្រោះថ្នាក់ឡើយ ៕
ចែករំលែកព័តមាននេះ