រាជធានីភ្នំពេញ៖ ស្របពេលដែលសហគមន៍កសិកម្ម និងម្ចាស់កសិដ្ឋានប្រមាណ៤៨បានដាក់ពាក្យស្នើសុំនាំចេញស្វាយស្រស់ទៅកាន់ប្រទេសចិន អគ្គនាយកនៃអគ្គនាយកដ្ឋានកសិកម្មនៃក្រសួងកសិកម្មរុក្ខាប្រមាញ់និងនេសាទ បាននឹងកំពុងអនុវត្តសកម្មភាពសំខាន់ចំនួន៥ ដើម្បីឱ្យស្វាយកែវរមៀតរបស់កម្ពុជាអាចនាំចេញទៅប្រទេសចិនបាននៅពេលខាងមុខ។
លោក ងិន ឆាយ អគ្គនាយកនៃអគ្គនាយកដ្ឋានកសិកម្មនៃក្រសួងកសិកម្ម រុក្ខាប្រមាញ់និងនេសាទបានឱ្យដឹងតាមរយៈបណ្តាញទំនាក់ទំនងសង្គមតេឡេក្រាមថា គិតមកដល់ថ្ងៃទី១៩ ខែតុលា ឆ្នាំ២០២០ មានក្រុមហ៊ុន សហគមន៍កសិកម្ម និងម្ចាស់កសិដ្ឋាន សរុបចំនួន ៤៨ ដែលបានដាក់ពាក្យស្នើសុំនាំចេញផ្លែស្វាយស្រស់កម្ពុជាទៅកាន់ប្រទេសចិន។
លោកអគ្គនាយកបានបន្តថា ដើម្បីបំពេញតាមលក្ខខណ្ឌតម្រូវភូតគាមអនាម័យសម្រាប់ការនាំចេញផ្លែស្វាយស្រស់ទៅកាន់ប្រទេសចិន ផ្លែស្វាយត្រូវតែចុះបញ្ជីនៅអគ្គនាយកដ្ឋានកសិកម្ម និងទទួលស្គាល់ដោយអគ្គរដ្ឋបាលគយនៃប្រទេសចិន (GACC) ហើយការអនុវត្តកសិកម្មល្អ (GAP) និងត្រូវឆ្លងកាត់ការធ្វើប្រព្រឹត្តិកម្មសម្លាប់សមាសភាពចង្រៃដោយប្រើចំហាយទឹកក្តៅ (Vapor Heat Treatment – VHT) ឬប្រព្រឹត្តិកម្ម ទឹកក្តៅ (Hot Water Treatment – HWT) ដើម្បីធានាថា ផ្លែស្វាយស្រស់ទាំងនោះ ពុំជាប់ជាមួយនូវសមាសភាពចង្រៃភូតគាមអនាម័យដូចមានចែងក្នុងពិធីសារ។
លោក ងិន ឆាយ គូសបញ្ជាក់ថា«បច្ចុប្បន្ន អគ្គនាយកដ្ឋានកសិកម្ម បាននិងកំពុងអនុវត្តសកម្មភាពសំខាន់ៗមួយចំនួនរួមមាន៖១)- ចុះបណ្តុះបណ្តាលបច្ចេកទេសស្តីពីការអនុវត្តកសិកម្មល្អ,២)- ចុះបណ្តុះបណ្តាលបច្ចេកទេសស្តីពីការគ្រប់គ្រងសមាសភាពចង្រៃ,៣)- ចុះបណ្តុះបណ្តាលបច្ចេកទេសស្តីពីលក្ខខណ្ឌតម្រូវភូតគាមអនាម័យសម្រាប់នាំចេញផ្លែស្វាយស្រស់,៤)- ចុះអង្កេតតាមដាននិងរៀបចំប្រព័ន្ធព្យាករណ៍សមាសភាពចង្រៃនៅតាមចម្ការដែលបានចុះបញ្ជីនាំចេញ និង៥)- ចុះត្រួតពិនិត្យ គុណភាព និងសុវត្ថិភាពដំណាំស្វាយ។ បន្ទាប់ពីសកម្មភាពទាំង៥ខាងលើ បានដំណើរការចប់សព្វគ្រប់ ក្រុមការងារជំនាញនៃអគ្គនាយកដ្ឋានកសិកម្មនឹងវាយតម្លៃចម្ការស្វាយដើម្បីចុះបញ្ជីកសិដ្ឋានការអនុវត្តកសិកម្មល្អ និងចុះបញ្ជីជាកសិដ្ឋានសម្រាប់នាំចេញស្វាយទៅកាន់ប្រទេសចិន រួចផ្ញើជូនភាគីចិនដើម្បីចុះពិនិត្យ និងវាយតម្លៃបញ្ចប់ចុងក្រោយ»។
គួររម្លឹកផងដែរក្នុងចំណោមសហគមន៍កសិកម្ម និងម្ចាស់កសិដ្ឋានប្រមាណ៤៨ដាក់ពាក្យស្នើសុំនាំចេញស្វាយស្រស់ទៅប្រទេសចិន ក្នុងនោះម្ចាស់ចំការមកពីសហគមន៍ស្វាយកែវរមៀតគិរីរម្យមាន២៩នាក់។
លោក អ៊ុ សាវឿន ប្រធានសហគមន៍ស្វាយកែវរមៀតគិរីរម្យធ្លាប់បានឱ្យដឹងថា« ក្នុងចំណោម សមាជិតសហគមន៍ស្វាយកែវរមៀតគិរីរម្យជាង៤០គ្រួសារ បានទៅដាក់ពាក្យស្នើសុំនាំចេញផ្លែស្វាយស្រស់ទៅប្រទេសចិន បាន២៩នាក់ហើយ ។សម្រាប់អ្នកផ្សេងមិនទាន់បានទៅដាក់ពាក្យដោយសារ អ្នកខ្លះមានចំការស្វាយតិចតួចពេក ហើយអ្នកខ្លះទៀតដាំស្វាយចម្រុះលាយគ្នា។តែសម្រាប់ម្ចាស់ចំការ២៩នាក់នេះ គឺសុទ្ធតែដាំស្វាយសុទ្ធ ហើយម្នាក់ៗមានផ្ទៃដីចំការពី៥០ហិកតាដល់១០០ហិកតាឡើង។ជាក់ស្តែសម្រាប់គ្រួសារខ្ញុំ មានដីចំការ១៨០ហិកតា ក្នុងនោះប្រមាណ១០០ហិកតាបាននិងកំពុងផ្តល់ផល»។
ពាក់ព័ន្ធនិងផ្ទៃដីចំការស្វាយនៅកម្ពុជាបើតាម លោក ងិន ឆាយ លើកឡើងថាយោងតាមស្ថិតិរបស់អគ្គនាយកដ្ឋានកសិកម្ម ក្នុងឆ្នាំ២០១៩ កម្ពុជាមានផ្ទៃដីដាំដុះដំណាំស្វាយកែវរមៀតចំនួនប្រមាណជា ១២៤. ៣១៩ហិកតា និងមានបរិមាណផលប្រមាណជា ១. ៤៤៨ .៦៧៧តោន៕
ចែករំលែកព័តមាននេះ