បាងកក ៖ នាយករដ្ឋមន្ត្រីថៃ លោក ប្រាយុទ្ធ ចាន់អូចា កាលពីរាត្រីថ្ងៃពុធ បានស្នើសុំមនុស្សគ្រប់រូបដកឃ្លាថយក្រោយមួយជំហានសិននៅក្នុងជម្លោះរវាងរដ្ឋាភិបាលនិងចលនាប្រឆាំងរដ្ឋាភិបាល ។ លោកនាយករដ្ឋមន្ត្រីក៏បានស្នើឱ្យលុបចោល នូវការប្រកាសដាក់ប្រទេសក្នុងស្ថានភាពអាសន្ន ប៉ុន្តែលោកក៏បានស្នើឱ្យគូប្រជែងរបស់លោកផ្អាកនូវការធ្វើសុន្ទរកណាមួយដែលគួរឱ្យស្អប់និងបែកបាក់។ នេះបើយោងតាមការចុះផ្សាយរបស់កាសែតបាងកកប៉ុស្តិ៍ ចុះថ្ងៃទី ២២ ខែតុលានេះ ។
លោកប្រាយុទ្ធ បាននិយាយនៅក្នុងកម្មវិធីចាក់ផ្សាយតាមទូរទស្សន៍មួយនៅរាត្រីថ្ងៃពុធថា «ខ្ញុំនឹងធ្វើការផ្លាស់ប្តូរជាលើកដំបូងដើម្បីកាត់បន្ថយស្ថានភាពនេះ។ បច្ចុប្បន្នខ្ញុំកំពុងត្រៀមដើម្បីលុបចោលនូវការប្រកាសដាក់ស្ថានភាពអាសន្នធ្ងន់ធ្ងរនៅទីក្រុងបាងកក ហើយនឹងចាត់វិធានការភ្លាមៗបែបនេះប្រសិនបើមិនមានឧប្បត្តិហេតុហិង្សាណាមួយនោះ» ។លោកបានមានប្រសាសន៍បន្តថា «ខ្ញុំសូមស្នើឱ្យក្រុមបាតុករដោយស្មោះត្រង់ សូមផ្អាកនូវការបំពងសម្លេងនិងការនិយាយដែលគួរអោយស្អប់និងការនិយាយនាំឲ្យមានការបែងចែកបែកបាក់» ។
លោកឧត្តមសេនីយ៍ ប្រាយុទ្ធ បានមានប្រសាសន៍បន្ថែមថា «យើងត្រូវគោរពច្បាប់និងលទ្ធិប្រជាធិបតេយ្យរបស់សភា ហើយអនុញ្ញាតឱ្យទស្សនៈរបស់យើងត្រូវបានបង្ហាញតាមរយៈតំណាងរបស់យើងនៅក្នុងសភា» ។ ត្រង់នេះលោកចង់សំដៅទៅលើសេចក្តីសំរេចរបស់គណៈរដ្ឋមន្ត្រីក្នុងការគាំទ្រសំណើរកោះប្រជុំសភាពិសេស ដើម្បីពិភាក្សាពីវិធីដើម្បីសម្រួលស្ថានការណ៍នយោបាយដែលកំពុងបន្តមានជម្លោះឲ្យបានល្អ ។
លោកនាយករដ្ឋមន្ត្រីរូបនេះបានបន្តថា ក្នុងនាមជាមេដឹកនាំរដ្ឋាភិបាលលោកមានទំនួលខុសត្រូវក្នុងការផ្សះផ្សាទស្សនៈផ្ទុយគ្នា ជាពិសេសអ្នកជ្រុលនិយមដើម្បីឱ្យប្រជាជនថៃអាចរស់នៅជាមួយគ្នាដោយសន្តិភាពក្នុងប្រទេសដែលជាកម្មសិទ្ធិរបស់មនុស្សគ្រប់គ្នា ។
លោកបានមានប្រសាសន៍ថា «ឥឡូវនេះក្រុមបាតុករបានបញ្ចេញសំលេងនិងទស្សនៈរបស់ពួកគេហើយការទាមទាររបស់ពួកគេត្រូវបានថ្នាក់ដឹកនាំបានលឺ ហើយពេលនេះពួកគេគួរតែអនុញ្ញាតិឲ្យមាននូវការ ផ្សះផ្សាជាមួយនឹងទស្សនៈនៃផ្នែកផ្សេងទៀតនៃសង្គមថៃ តាមរយៈតំណាងរបស់ពួកគេនៅក្នុងសភា» ។
ក្រុមបាតុករនៅថៃដែលភាគច្រើនជានិស្សិតនិងយុវវ័យបានធ្វើបាតុកម្មជាបន្តបន្ទាប់រហូតមានការដាក់ញ្ញាតិស្នើឲ្យកលោកប្រាយុទ្ធលាលែងពីតំណែងផងដែរ ៕
ចែករំលែកព័តមាននេះ