រាជធានីភ្នំពេញ ៖ យ៉ុន យ៉ើន ដែលជាខ្សែប្រយុទ្ធជួរមុខរបស់ក្រុមបាល់ទាត់នារីកំពង់ស្ពឺណាហ្គាវើលដ៍ កំពុងទទួលការចាប់អារម្មណ៍យ៉ាងខ្លាំងពីសំណាក់អ្នកតាមដានបាល់ទាត់ ជាពិសេសបាល់ទាត់នារី បន្ទាប់ពីកីឡាការិនីរូបនេះបង្ហាញទម្រង់លេងលេចធ្លោខ្លាំងតាមរយៈការរកគ្រាប់បាល់បានដល់ទៅ២៣គ្រាប់ក្នុងចំណោមការប្រកួត៤លើក និងជួយឲ្យក្រុមកំពង់ស្ពឺណាហ្គាវើលដ៍ របស់នាងឈរកំពូលតារាងនៅក្នុងពេលនេះ។
កីឡាការិនីរូបនេះ បច្ចុប្បន្នកំពុងឈរនៅកំពូលតារាងនៃកីឡាការិនីរកគ្រាប់បាល់បានច្រើនជាងគេ បន្ទាប់ពីសប្ដាហ៍ទី១ នាងរកបាន៧គ្រាប់ ជួយឲ្យក្រុមឈ្នះក្រុមសមាគមកីឡាកងយោធពលខេមរភូមិន្ទ ០-១៩ ។ ប្រកួតសប្ដាហ៍ទី២ រកបាន៣គ្រាប់ជួយឲ្យក្រុមឈ្នះក្រុមព្រះខ័នរាជស្វាយរៀង ៥-៣ ។ ប្រកួតសប្ដាហ៍ទី៣ រកបាន៣គ្រាប់ទៀតជួយឱ្យក្រុមឈ្នះក្រុមបឹងកេត ៨-១ និងប្រកួតសប្ដាហ៍ទី៤រកបានដល់ទៅ១០គ្រាប់ម្នាក់ឯង ជួយឱ្យក្រុមឈ្នះក្រុមម្ចាស់ផ្ទះខេត្តកំពង់ធំ ០-១៦។
ជួបអ្នកសារព័ត៌មាន កីឡាការិនី យ៉ុន យ៉ើនបានប្រាប់ថា នាងស្រឡាញ់កីឡាបាល់ទាត់នេះតាំងពីនៅរៀនថ្នាក់បឋមសិក្សាម្ល៉េះ ។ ទោះបីត្រូវបានឪពុកម្ដាយជំទាស់មិនឱ្យលេងយ៉ាងណាក៏ដោយ ក៏នាងនៅតែលួចលេងរហូតបានក្លាយជាកីឡាការិនីបាល់ទាត់មួយរូបប្រចាំសាលានៅក្នុងខេត្តកំពង់ស្ពឺ ។ នាងបន្តថា សម្រាប់ការប្រឡូកនៅក្នុងវិស័យកីឡាបាល់ទាត់របស់នាងមកដល់ពេលនេះគឺមានរយៈពេលជាង១០ឆ្នាំមកហើយ និងបានជាប់នៅក្នុងក្រុមជម្រើសជាតិទៀតផង ។ នាងបានបញ្ចប់ការសិក្សានៅត្រឹមថ្នាក់បាក់ឌុបដោយសារតែមិនមានលទ្ធភាពរៀនបន្ត ។
បើទោះជាក្រុមគ្រួសារឱ្យនាងស្វែងរកការងារផ្សេងធ្វើ ក៏នាងមិនធ្វើដែរ គឺសុខចិត្តមកហាត់បាល់ទាត់ដោយក្ដីស្រឡាញ់ពេញបេះដូង ។ កីឡាការិនីជួរមុខរបស់ក្រុមកំពង់ស្ពឺណាហ្គាវើលដ៍រូបនេះបានប្ដេជ្ញាថា នាងនឹងខិតខំប្រឹងប្រែងហ្វឹកហាត់ជាបន្តទៀតដើម្បីឱ្យក្លាយជាកីឡាការិនីឆ្នើមប្រចាំប្រទេស ។
តាមរយៈសមត្ថភាពលេចធ្លោ និងការប្ដេជ្ញារបស់កីឡាការិនីរូបនេះ សង្ឃឹមថា សហព័ន្ធកីឡាបាល់ទាត់កម្ពុជា នឹងមិនមើលរំលងនាងក្នុងគម្រោងជ្រើសរើសកីឡាការិនីបាល់ទាត់មួយក្រុមសម្រាប់ទៅហ្វឹកហាត់នៅប្រទេសចិនត្រៀមប្រកួតកីឡាស៊ីហ្គេមឆ្នាំ២០២៣នោះទេ ព្រោះនាងក៏មានបំណងចង់ទៅហ្វឹកហាត់ដែរ បើសិនជាសហព័ន្ធផ្ដល់ឱកាសឱ្យនាងមែននោះ៕
ចែករំលែកព័តមាននេះ