ខេត្តតាកែវ៖ មន្ត្រីជាន់ខ្ពស់ក្រសួងវប្បធម៌ និងវិចិត្រសិល្បៈ បានចាត់ទុកការបណ្តុះអប់រំយុវជនជំនាន់ក្រោយ ឱ្យមានការយល់ដឹង ឱ្យចេះច្រៀង ចេះសម្តែងល្ខោនយីកេ គឺជាការបណ្តុះទឹកចិត្តដល់ពួកគេ ឱ្យចេះស្រឡាញ់ ចូលរួមថែរក្សា…
ខេត្តតាកែវ៖ មន្ត្រីជាន់ខ្ពស់ក្រសួងវប្បធម៌ និងវិចិត្រសិល្បៈ បានចាត់ទុកការបណ្តុះអប់រំយុវជនជំនាន់ក្រោយ ឱ្យមានការយល់ដឹង ឱ្យចេះច្រៀង ចេះសម្តែងល្ខោនយីកេ គឺជាការបណ្តុះទឹកចិត្តដល់ពួកគេ ឱ្យចេះស្រឡាញ់ ចូលរួមថែរក្សា ជួយឱ្យរស់ឡើងវិញ ជួយផ្សព្វផ្សាយ ជួយធ្វើឲ្យល្ខោនយីកេ មានរូបភាពទាន់សម័យកាល ជួយសាកល្បងបង្កើតថ្មី និងបង្កើតថ្មី ពិសេសគឺនឹងចូលរួមលើកស្ទួយសិល្បៈ ប្រពៃណីជាតិរបស់ខ្មែរយើង ផ្នែកយីកេដែលជាទម្រង់ល្ខោនខ្មែរឲ្យនៅគង់វង្សជានិរន្តរ៍ ។
ថ្លែងនៅក្នុងឱកាសបើកសិក្ខាសាលាស្តីពី ល្ខោនយីកេ លើកទី១ រៀបចំធ្វើឡើងនៅសាលមហោស្រពខេត្តតាកែវ នាព្រឹកថ្ងៃទី១៩ ខែតុលា ឆ្នាំ២០២០ ដែលមានសិក្ខាកាមជាសិល្បករ សិល្បការិនី និងមន្ត្រីនៃមន្ទីរវប្បធម៌ និងវិចិត្រសិល្បៈទាំង២៥រាជធានី-ខេត្តចូលរួមផងនោះ ឯកឧត្តមសំរាំង កំសាន្ត រដ្ឋលេខាធិការក្រសួងវ្បធម៌ និងវិចិត្រសិល្បៈ បានមានប្រសាសន៍ថា ប្រាកដណាស់សិល្បៈល្ខោនយីកេ ក៏ដូចជាសិល្បៈប្រពៃណីជាតិខ្មែរយើងដទៃទៀត ។
បើយើងពុំខិតខំសិក្សា ស្រាវជ្រាវ ចងក្រងរក្សាទុក និងថែរក្សាឱ្យបានគត់មត់ទេ នោះសិល្បៈវប្បធម៌ សាកលភាវូបយីកម្ម នឹងលេបត្របាក់សិល្បៈវប្បធម៌ប្រពៃណីជាតិយើង ឱ្យរលាយសូន្យសុងពុំខានឡើយ ដូច្នោះហើយបេសកកម្មរបស់យើង គឺត្រូវបន្តការសិក្សា ស្រាវជ្រាវ រកឱ្យឃើញពីតម្លៃពិតនៃសិល្បៈល្ខោនយីកេ ដើម្បីថែរក្សាតម្លៃនោះឱ្យគង់វង្ស តាមរយៈការបណ្តុះផ្នត់គំនិតយុវជនជំនាន់ក្រោយ ឱ្យស្រឡាញ់ និងថែរក្សាសិល្បៈប្រពៃណីជាតិខ្មែរ និងល្ខោនយីកេនេះ ។
ឯកឧត្តមសំរាំង កំសាន្ត បានបន្ថែមទៀតថា យុវជនជំនាន់ក្រោយ គឺជាទំពាំងស្នងឫស្សី ជាអ្នកបន្តវេនសម្រាប់សង្គមជាតិទៅថ្ងៃអនាគត ហើយអ្វីដែលយុវជនត្រូវមានតួនាទីនៅក្នុងសិល្បៈវប្បធម៌ខ្មែរនោះ គឺការចូលរួមចំណែកថែរក្សា សិក្សា ស្រាវជ្រាវ និងចងក្រងទុករាល់ឯកសារនានាទាក់ទងនឹងល្ខោនយីកេនេះ ហើយរួមគ្នាសាបព្រោះទៅដល់យុវជនដទៃទៀតឱ្យយល់ពីគុណតម្លៃរបស់សិល្បៈវប្បធម៌ជាតិរបស់ខ្លួន ដើម្បីកុំឲ្យវប្បធម៌បរទេសជ្រាបចូលទៅក្នុងស្រទាប់យុវវ័យខ្លាំងពេក ។
ឯកឧត្តមរដ្ឋលេខាធិការសំរាំង កំសាន្ត សង្ឃឹមជឿជាក់ថា អង្គសិក្ខាសាលានេះនឹងរកឃើញពីបញ្ហាប្រឈមចំពោះមុខរបស់សិល្បៈល្ខោនយីកេដែលត្រូវដោះស្រាយ តម្លៃពិត ទាំងក្នុងរូបភាព និងខ្លឹមសារ នៃសិល្បៈល្ខោនយីកេដែលចាំបាច់ត្រូវថែរក្សាឱ្យបានគង់វង្ស តួនាទី និងភារកិច្ចរបស់យើងជាកូនខ្មែរគ្រប់រូប ក្នុងការលើកកម្ពស់ថែរក្សា និងការអភិវឌ្ឍសិល្បៈល្ខោនយីកេ តាមរយៈការផ្សារភ្ជាប់បានល្អ រវាងយីកេបុរាណ និងយីកេសម័យ ។
លោកសំរាំង កំសាន្ត ថ្លែងនេះនៅមុនពេលបើកមហោស្រពសិល្បៈល្ខោនយីកេលើកទី១ នៅថ្ងៃទី២០ តុលា ។ ក្នុងមហោស្រពនោះក្រុមសិល្បៈមន្ទីរវប្បធម៌ និងវិចិត្រសិល្បៈខេត្តតាកែវបានសម្ដែងយីកេរឿង «វាសនាធីតានាគ » ៕
ចែករំលែកព័តមាននេះ