ខេត្តបាត់ដំបង៖ ក្រោយពីជំនន់ទឹកភ្លៀងដែលមានរយៈជិត២សប្ដាហ៍កន្លងទៅនេះ រដ្ឋបាលស្រុកបវេល ដែលជាស្រុកកសិកម្មដ៏ធំសម្បើមមួយ នៅក្នុងខេត្តបាត់ដំបង បានបង្ហាញនូវភាពមហន្តរាយយ៉ាងធ្ងន់ធ្ងរ ទាំងដំណាំកសិកម្ម ទាំងហេដ្ឋារចនាផ្លូវថ្នល់ និង ប៉ះពាល់លំនៅឋានរបស់ពលរដ្ឋរាប់ម៉ឺនគ្រួសារ។…
ខេត្តបាត់ដំបង៖ ក្រោយពីជំនន់ទឹកភ្លៀងដែលមានរយៈជិត២សប្ដាហ៍កន្លងទៅនេះ រដ្ឋបាលស្រុកបវេល ដែលជាស្រុកកសិកម្មដ៏ធំសម្បើមមួយ នៅក្នុងខេត្តបាត់ដំបង បានបង្ហាញនូវភាពមហន្តរាយយ៉ាងធ្ងន់ធ្ងរ ទាំងដំណាំកសិកម្ម ទាំងហេដ្ឋារចនាផ្លូវថ្នល់ និង ប៉ះពាល់លំនៅឋានរបស់ពលរដ្ឋរាប់ម៉ឺនគ្រួសារ។ នេះបើតាមរបាយការណ៍បឋម ដែលកោះសន្តិភាពទទូលបានពីសមត្ថកិច្ចនិងរដ្ឋបាលស្រុកបវេល នៅព្រឹកថ្ងៃទី២១ តុលា នេះ ។
របាយការណ៍ស្ដីពី« គ្រោះមហន្តរាយដោយសារជំនន់ទឹកភ្លៀង» ដោយគិតត្រឹមថ្ងៃទី២០ តុលា ឆ្នាំ២០២០ ដែលមានរយៈពេលជិត០២សប្ដាហ៍ ។ យោងលើរបាយការណ៍ដីខ្ទេចខ្ទាំនេះ រដ្ឋបាលស្រុកបវេល បានបង្ហាញពីភាពធ្ងន់ធ្ងរ គឺលំនៅឋានរបស់ពលរដ្ឋ ដំណាំកសិកម្ម និងផ្លូវថ្នល់ ក្រោយពីជំនន់ទឹកភ្លៀងបានស្រកស្រុករលត់ទៅនូវប៉ុន្មានថ្ងៃចុងក្រោយនេះ។ អធិការស្រុកបវេល លោក សុខ សារិន បានប្រាប់កោះសន្តិភាព នៅព្រឹកថ្ងៃទី២១ តុលា នេះថា ជំនន់ទឹកភ្លៀង បានវាយលុកចូលគ្រប់បណ្ដាឃុំ នៃស្រុកបវេលទាំងមូល ដែលធ្វើឲ្យលិចលង់លំនៅឋានពលរដ្ឋជាង១ម៉ឺនខ្នង ជន្លៀសពលរដ្ឋជាង១ពាន់គ្រួសារ ខូចខាតផលដំណាំគ្រប់ប្រភេទរាប់ពាន់ហិចតា និង ផ្លូវថ្នល់រាប់ពាន់ម៉ែត្រ។
ប៉ុន្តែលោកបានបញ្ជាក់ថា បើគិតត្រិមព្រឹកនេះ ( ២១ ១០ ២០ ) ទឹកជំនន់បានស្រកអស់ស្ទើរគ្រប់កន្លែងហើយ លើកលែងតែនៅក្នុងឃុំព្រៃខ្ពស់ មួយប៉ុណ្ណោះ ដែលជំនន់ទឹកភ្លៀងនេះ នៅបន្តលិចលង់នៅឡើយ តែយ៉ាងណាពេលនេះទឹកបានចាប់ផ្លើមស្រកចុះជាបណ្ដើរៗហើយ ខណៈពលរដេ្ឋដែលរងគ្រោះរាប់ម៉ឺនគ្រួសារបាននិងកំពុងទទូលអំណោយពីអាជ្ញាធរ និង សប្បុរសជនជាបន្តបន្ទាប់ផងដែរ។
យោងលើរបាយការណ៍គ្រោះមហន្តរាយរបស់សមត្ថកិច្ច និងរដ្ឋបាលស្រុកបវេល បានឲ្យដឹងថា ជំនន់ទឹកភ្លៀងក្នុងរយៈពេលជិត០២សប្ដាហ៍កន្លងទៅនេះ បានធ្វើឲ្យប៉ះពាល់លំនៅឋានរបស់ប្រជាពលរដ្ឋនៅក្នុងឃុំទាំង០៨ នៃរដ្ឋបាលស្រុកបវេល ចំនួន១១,០៤៦គ្រួសារ ជន្លៀសពលរដ្ឋចេញពីលំនៅឋានទៅកាន់ទីទូលសុវត្ថិភាពចំនួន១,០៨៩គ្រួសារ ប៉ះពាល់សាលរៀនចំនួន៣៩ខ្នង វត្តអារ៉ាមចំនួន៣០កន្លែង។ ដោយឡែក ការខូចខាតផ្លូវថ្នល់ប្រវែង៤,២៧៥ម៉ ដំណាំស្រូវចំនួន៦,៣៤៤ហិចតា ដំឡូងមីចំនួន៦,១២៧ហិចតា ដំណាំពោតចំនួន១៧ហិចតា។ ប៉ុន្តែជាមួយគ្នានេះ សត្វគោ ក្របី និង សត្វជ្រូក ចំនួនជាង២,៥០០ក្បាល ក៏ត្រូវបានជន្លៀសចេញទៅកាន់ទីសុវត្ថិភាពផងដែរ។
យ៉ាងណាពេលនេះ ប្រជាពលរដ្ឋដែលភៀសខ្លួនដោយសារសង្គ្រាមទឹកជំនន់នេះ បានវិលត្រឡប់ទៅកាន់លំនៅឋានជាបណ្ដើរៗវិញហើយ។ ហើយពេលនេះពលរដ្ឋដែលរងគ្រោះ ក៏កំពុងទទូលអំណោយពីអាជ្ញាធរ សាខាកាកបាទក្រហម និង សប្បុរសជនជាបន្តបន្ទាប់ផងដែរ។ លោកសុខ សារិន អធិការស្រុកបវេល បានថ្លែងថា ពេលនេះប្រជាពលរដ្ឋដែលភៀសខ្លួនដោយសារទឹកជំនន់ បានវិលទៅកាន់លំនៅឋានវិញជាបណ្ដើរៗហើយ។ ជាមួយគ្នានេះ អាជ្ញាធរ និង សាខាកាកបាទក្រហមខេត្ត រួមទាំងសប្បុរសជននានាផង ក៏កំពុងចុះផ្ដល់អំណោយបឋមដល់គ្រួសាររងគ្រោះ ដើម្បីសង្គ្រោះបន្ទាន់ជាបន្តបន្ទាប់ផងដែរ ។
ចែករំលែកព័តមាននេះ