អភិបាលរាជធានីភ្នំពេញចាត់វិធានការសង្គ្រោះពលរដ្ឋនៅត្រពាំងថ្លឹង
- ភ្នំពេញ
រាជធានីភ្នំពេញ ៖ ក្នុងពេលដឹកនាំមន្ត្រីអាជ្ញាធរដែនដីនិងមន្ទីរជំនាញ ទៅពិនិត្យស្ថានភាព ទឹក ជំនន់ កាលពីល្ងាចថ្ងៃទី១៩ ខែតុលា ឆ្នាំ២០២០ ឯកឧត្តម…
រាជធានីភ្នំពេញ ៖ ក្នុងពេលដឹកនាំមន្ត្រីអាជ្ញាធរដែនដីនិងមន្ទីរជំនាញ ទៅពិនិត្យស្ថានភាព ទឹក ជំនន់ កាលពីល្ងាចថ្ងៃទី១៩ ខែតុលា ឆ្នាំ២០២០ ឯកឧត្តម…
រាជធានីភ្នំពេញ ៖ ក្នុងពេលដឹកនាំមន្ត្រីអាជ្ញាធរដែនដីនិងមន្ទីរជំនាញ ទៅពិនិត្យស្ថានភាព ទឹក ជំនន់ កាលពីល្ងាចថ្ងៃទី១៩ ខែតុលា ឆ្នាំ២០២០ ឯកឧត្តម ឃួង ស្រេង អភិបាលរាជធានីភ្នំពេញបានបញ្ជាឲ្យមន្ទីរសាធារណការនិងដឹកជញ្ជូនរាជធានីភ្នំពេញ លើកទំនប់ព័ទ្ធជុំវិញបុរីត្រពាំងថ្លឹង១ ស្ថិតក្នុងសង្កាត់ចោមចៅទី៣ ខណ្ឌពោធិ៍សែនជ័យ និងដាក់ម៉ាស៊ីនបូមទឹកចេញពីក្នុងបុរីឲ្យអស់ ខណៈដែលបុរីនេះកំពុងតែទទួលរងការលិចលង់នៅឡើយ ។
ក្រោយពីបូមទឹកស្រកអស់ហើយ មន្ទីរសុខាភិបាលរាជធានីភ្នំពេញ ក៏ត្រូវបាញ់ថ្នាំសម្លាប់មេរោគ
និងសត្វល្អិតនៅក្នុងបុរីនេះផងដែរ ដើម្បីសុខុមាលភាពប្រជាពលរដ្ឋ ។
ឯកឧត្តមអភិបាលរាជធានីភ្នំពេញ ថ្លែងថា ក្នុងនាមរដ្ឋបាលរាជធានីភ្នំពេញ មិនមែនមិនខ្វាយខ្វល់មិនជួយបងប្អូនប្រជាពលរដ្ឋដែលលិចលង់ដោយជំនន់ទឹកភ្លៀងនៅក្នុងខណ្ឌពោធិ៍សែនជ័យ
នេះទេ ។ ក្នុងរយៈពេលប្រមាណជា១សប្តាហ៍នេះ អាជ្ញាធររាជធានីភ្នំពេញ និងកងកម្លាំងប្រដាប់អាវុធ បានប្រើប្រាស់កម្លាំងសរុបទាំងអស់ដើម្បីជួយបងប្អូនប្រជាពលរដ្ឋដែលរងគ្រោះដោយជំនន់ទឹកស្ទឹងព្រែកត្នោតនៅសង្កាត់មួយចំនួនក្នុងខណ្ឌដង្កោ ដោយនៅទីនោះអាចមានគ្រោះថ្នាក់ធ្ងន់ធ្ងរជាងប្រជាពលរដ្ឋដែលលិចលង់ដោយជំនន់ទឹកភ្លៀងនៅក្នុងខណ្ឌពោធិ៍សែនជ័យនេះ។
ឯកឧត្តម ឃួង ស្រេង បន្តថា គ្រាន់តែនៅក្នុងសង្កាត់ចំនួន១២ក្នុងខណ្ឌដង្កោ គឺមានសង្កាត់
ចំនួន៩ទៅហើយដែលទទួលរងនូវការលិចលង់ដោយជំនន់ទឹកស្ទឹងព្រែកត្នោតនេះ ។ ខណៈដែលទឹកស្ទឹងព្រែកត្នោតកំពុងគំរាមកំហែងនៅសង្កាត់មួយចំនួនក្នុងខណ្ឌដង្កោនេះ គឺអាជ្ញាធររាជធានីភ្នំពេញ សហការជាមួយកងកម្លាំងប្រដាប់អាវុធ ពិសេសកងកម្លាំងយោធា បានប្រើប្រាស់គ្រឿងចក្រជាច្រើនគ្រឿងដើម្បីទប់ទឹក ។ ប៉ុន្តែដោយមិនអាចទៅរួច ទើបយើងដកថយយកកម្លាំងមកជម្លៀសប្រជាពលរដ្ឋដែលលិចលង់មកកាន់ទីទួលសុវត្ថិភាព ។ កិច្ចការនេះ យើងទទួលបានជោគជ័យហើយ ។
ឯកឧត្តមបញ្ជាក់ថា ក្រោយពីស្ថានភាពនៅក្នុងខណ្ឌដង្កោបានធូរស្រាលហើយនោះ ទើបឯកឧត្តមមានឱកាសងាកមកជួយបងប្អូនប្រជាពលរដ្ឋដែលលិចលង់លំនៅឋានដោយជំនន់ទឹកភ្លៀងនៅខណ្ឌពោធិ៍សែនជ័យនាពេលនេះ ។ សម្រាប់បុរីត្រពាំងថ្លឹងនេះ ឯកឧត្តមបានបញ្ជាឲ្យមន្ទីរសាធារណការនិងដឹកជញ្ជូនរាជធានីភ្នំពេញ ទប់ទំនប់ជុំវិញ ហើយប្រើម៉ាស៊ីនបូមទឹកចេញពីក្នុងបុរីតែម្ដង ខណៈដែលបុរីនេះកំពុងតែទទួលរងការលិចលង់នៅឡើយ ។
ក្រោយពីបូមទឹកស្រកអស់ហើយ ឯកឧត្តមនឹងបញ្ជាឲ្យមន្ទីរសុខាភិបាលរាជធានីភ្នំពេញបាញ់
ថ្នាំសម្លាប់មេរោគនិងសត្វល្អិតនៅក្នុងបុរីនេះ តែត្រូវសិក្សាឲ្យបានច្បាស់លាស់ក្នុងភូមិសាស្ត្រនេះ
គឺត្រូវដាក់លូរបៀបណា ទប់ទំនប់របៀបណាដើម្បីដោះទឹកចេញ ។
ក្នុងឱកាសនោះ ឯកឧត្តម ឃួង ស្រេង អភិបាលរាជធានីភ្នំពេញ បានអំពាវនាវដល់ប្រជាពលរដ្ឋទាំងអស់ កុំរំលោភប្រឡាយបង្ហូរទឹក ដែលធ្វើឲ្យស្ទះចរន្តទឹកហូរ ទើបបណ្តាលឲ្យលិចលង់លំនៅឋានបងប្អូនប្រជាពលរដ្ឋ ។ សម្រាប់ការងារចំពោះមុខ អាជ្ញាធររាជធានីភ្នំពេញនឹងការពារប្រឡាយឲ្យបានគង់វង្ស ជាមួយនឹងការស្ដារប្រឡាយ ជៀសវាងលិចលង់ដោយជំនន់ទឹកភ្លៀងទៀត ៕
ចែករំលែកព័តមាននេះ