រាជធានីភ្នំពេញ ៖ សពបុរសម្នាក់ដែលមានសភាពហើមស្អុយទៅហើយនោះ ត្រូវបានក្រុមសង្គ្រោះអង្គភាព៧១១ល្បាតតាមអូប័រប្រទះឃើញអណ្ដែតទឹកជំនន់នៅត្រង់ចំណុចក្បែរបុរីឡាផាម ស្ថិតនៅក្នុងភូមិព្រែកជ្រៃ សង្កាត់ស្ពានថ្ម ខណ្ឌដង្កោ រាជធានីភ្នំពេញ និងបង្កឲ្យមានការភ្ញាក់ផ្អើលកាលពីវេលាម៉ោង១០និង៣០នាទីព្រឹកថ្ងៃទី២០ ខែតុលា ឆ្នាំ២០២០ ។
ជនរងគ្រោះខាងលើមិនទាន់ត្រូវបានស្គាល់អត្តសញ្ញាណនៅឡើយទេ គ្រាន់តែដឹងថាគឺជាជនជាតិខ្មែរ ស្លៀកខោជើងខ្លីពណ៍ឈាមជ្រូកលាយខ្មៅ ពាក់អាវកីឡាដៃខ្លី ពណ៌បៃតងមានអក្សថា «Fly mirates »ហើយមានបង់កក្រមាពណ៍ឆ្នូតខៀវលាយផ្កាឈូកនិងទឹកប៉ិច មានកម្ពស់ប្រហែល១,៦០ម៉ែត្រ មានចាក់សាក់រូបនាគពណ៌ខៀវនៅនឹងដៃខាងឆ្វេងផងដែរ។ ម្យ៉ាងទៀតមិនទាន់ដឹងថាតើជនរងគ្រោះមានផ្ទះសម្បែងនៅទីណាទេ ប៉ុន្តែប្រហែលពុំមែនជាអ្នកនៅក្នុងភូមិសាស្ត្រខណ្ឌដង្កោឡើយអាចជាអ្នកនៅឆ្ងាយ ហើយត្រូវអណ្ដែតមកតាមខ្សែទឹកហូរ។
នគរបាលបានឲ្យដឹងថា នៅមុនពេលកើតហេតុការភ្ញាក់ផ្អើលខាងលើ កម្លាំងក្រុមសង្គ្រោះអង្គភាព៧១១ បានចេញល្បាតតាមអូប័រនៅតាមផ្ទះប្រជាពលរដ្ឋដែលកំពុងលិចលង់ក្រែងមានជនឆក់ឱកាសចូលទៅធ្វើសកម្មភាពគាស់ទ្វារនិងបង្អួចចូលលួចយកទ្រព្យសម្បត្តិ ។ លុះពេលទៅដល់ត្រង់ចំណុចខាងលើ ស្រាប់តែប្រទះឃើញសពបុរសម្នាក់ខាងលើស្ថិតក្នុងសភាពហើមស្អុយទៅហើយនោះអណ្ដែតទឹកជំនន់។
តាមប្រភពដដែលបានបន្តទៀតថា ខណៈនោះក្រុមសង្គ្រោះក៏បានរាយការណ៍ជូននគរបាលឲ្យចុះទៅពិនិត្យមើលជាក់ស្ដែង ហើយកម្លាំងនគរបាលនិងកងរាជអាវុធហត្ថខណ្ឌដង្កោបានចុះទៅនាំយកសពនោះតម្កល់ទុកនៅឈាបនដ្ឋានវត្តឫស្សីសាញ់ សង្កាត់ព្រៃស ខណ្ឌដង្កោ ។ បន្ទាប់មកបានរាយការណ៍បន្តទៅកាន់នគរបាលការិយាល័យបច្ចេកទេនៃស្នងការដ្ឋាននគរបាលរាជធានីភ្នំពេញព្រមទាំងគ្រូពេទ្យតុលាការរាជធានីភ្នំពេញ គឺលោកឧកញ៉ាវេជ្ជបណ្ឌិត នង សុវណ្ណរ័ត្ន ចុះទៅធ្វើកោសល្យវិច័យ ហើយជាលទ្ធផលបញ្ជាក់ថាបុរសរងគ្រោះម្នាក់ខាងលើបានបាត់បង់ជីវិតដោយសារលង់ទឹក មិនជាប់ពាក់ព័ន្ធនឹងករណីឃាតកម្មឡើយ៕ (កែសម្រួលដោយ ៖ ធីតា)
ចែករំលែកព័តមាននេះ