រាជធានីភ្នំពេញ ៖ ទឹកជំនន់ស្ទឹងព្រែកត្នោតបានវាយលុកខណ្ឌដង្កោ រាជធានីភ្នំពេញ ក្នុងមួយរយៈពេលនេះបណ្ដាលឲ្យសង្កាត់ចំនួន១១ ក្នុងចំណោម១៣សង្កាត់ របស់ខណ្ឌមួយនេះរងការលិចលង់ ក្នុងនោះមានភូមិជាង៤០ ផ្ទះជិត៥ពាន់ខ្នង មានប្រជាពលរដ្ឋជាង៥ពាន់គ្រួសារស្មើរនឹងសមាជិកជាង២ម៉ឺននាក់ ព្រមទាំងសត្វចិញ្ចឹម និងផ្ទៃដីស្រែរាប់រយហិកតា ។
គិតរហូតមកដល់ថ្ងៃទី២០ ខែតុលា ឆ្នាំ២០២០ ទឹកស្ទឹងព្រែកត្នោតនៅតែមានកម្ពស់ជាង៤ម៉ែត្រដដែលមិនទាន់ថយចុះមកក្រោម៥ម៉ែត្រនៅឡើយទេ ដែលជាហេតុធ្វើឲ្យផ្ទះសម្បែងប្រជាពលរដ្ឋដែលស្ថិតនៅជាប់ផ្ទាល់នឹងមាត់ស្ទឹងតែម្ដងនោះនៅតែបន្តការលិចលង់ដដែល ។ ដោយឡែកកំណាត់ផ្លូវលេខ២១៧ ហៅផ្លូវចំការដូងចាប់ពីចំណុចផ្សារព្រែកជ្រៃ ភូមិព្រែកជ្រៃ សង្កាត់ស្ពានថ្ម រហូតដល់ចំណុចរង្វង់មូលកួរស្រូវ ក្នុងសង្កាត់រលួស ខណ្ឌដង្កោ រួមជាមួយបុរីផ្ទះល្វែង និងភូមិនានានៅតំបន់នោះក៏នៅតែលិចលង់ដដែល ប៉ុន្តែទឹកបានស្រកចុះច្រើនហើយ រីឯក្រុមសង្គ្រោះអង្គភាព៧១១ កំពុងប្រចាំការជួយចម្លងប្រជាពលរដ្ឋពីកន្លែងមួយទៅកន្លែងមួយនៅឡើយ។
យោងតាមរបាយការណ៍ដែលកោះសន្តិភាពទទួលបានពីសមត្ថកិច្ចគឺខណ្ឌដង្កោមានចំនួន១៣សង្កាត់ ក្នុងនោះបានទទួលរងការលិចលង់ចំនួន១១សង្កាត់មានភូមិចំនួន៤២ភូមិ ផ្ទះចំនួន៤,៩៦៥ខ្នង ប្រជាពលរដ្ឋចំនួន៥,៥៩៩គ្រួសារ ដែលមានសមាជិកចំនួន២៣,៥២០នាក់។
ក្នុងនោះរួមមាន ទី១-សង្កាត់ដង្កោ រងគ្រោះ១ភូមិមានចំនួន១៦៣ខ្នងផ្ទះមនុស្សចំនួន១៦៣គ្រួសារស្មើរនិង៨២៣នាក់ ទី២-សង្កាត់ក្រាំពង្រ ចំនួន២ភូមិមានចំនួន២៧៤ខ្នងផ្ទះ មនុស្សចំនួន២៦៩គ្រួសារស្មើរនិងចំនួន១,៤៨៦នាក់ ទី៣-សង្កាត់គងនយ ចំនួន០៤ភូមិមានចំនួន៣៩៥ខ្នងផ្ទះមនុស្សចំនួន៤៥៥គ្រួសារស្មើរនិងចំនួន១,៩៣១នាក់ ទី៤-
សង្កាត់សាក់សំពៅ ចំនួន៦ភូមិមានចំនួន៤២៧ខ្នងផ្ទះ មនុស្សចំនួន៤២៧គ្រួសារស្មើ នឹង១,០២៤នាក់ ទី៥-សង្កាត់ទៀន ចំនួន០៦ភូមិ មានចំនួន៥៥៣ខ្នងផ្ទះមនុស្សចំនួន៦៧៦គ្រួសារស្មើរនិង៣,០០៤នាក់ ទី៦-សង្កាត់ព្រែកកំពឹស ចំនួន០៦ភូមិ មានចំនួន១,២៩៤ខ្នងផ្ទះ មនុស្សចំនួន១,៣៤០គ្រួសារស្មើរនិង៥,៤៩៩នាក់ ។
ទី៧-សង្កាត់ស្ពានថ្ម ចំនួន០៨ភូមិមានចំនួន៨០៦ខ្នងផ្ទះមនុស្សចំនួន៨៩៨គ្រួសារស្មើនិង៣,៦៨៦នាក់ ទី៨-សង្កាត់ព្រៃស ចំនួន២ភូមិ មានចំនួន១៧០ខ្នងផ្ទះមនុស្សចំនួន២២០គ្រួសារស្មើរនិង៨៦៥នាក់ ទី៩-សង្កាត់ជើងឯក ចំនួន០៣ភូមិ មានចំនួន១២៨ខ្នងផ្ទះមនុស្សចំនួន១២៨គ្រួសារស្មើរនិង៥៤១នាក់ ទី១០-សង្កាត់ព្រៃវែង ចំនួន០២ភូមិមានចំនួន១៣៥ខ្នងផ្ទះមនុស្ស១៤២គ្រួសារស្មើរនិង៨០០នាក់ និងទី១១-សង្កាត់រលួស ចំនួន០៣ភូមិ មានចំនួន៦២០ខ្នងផ្ទះ មនុស្សចំនួន៨៦៣គ្រួសារស្មើរនិង៣,៨៦១នាក់។
របាយការណ៍ដដែលបានបញ្ជាក់ថា នៅក្នុងការសង្គ្រោះប្រជាពលរដ្ឋដែលរងគ្រោះដោយទឹកជំនន់នេះបានប្រើប្រាស់កម្លាំងចុះជួយប្រជាពលរដ្ឋសរុប៩០០នាក់ រួមមានកម្លាំងនគរបាលខណ្ឌខណ្ឌដង្កោ ២១៥នាក់, នគរបាលរាជធានីភ្នំពេញ៦០នាក់ កម្លាំងកងអង្គរក្សសម្តេចតេជោចំនួន១៤៥នាក់, កងរាជអាវុធហត្ថខណ្ឌដង្កោចំនួន៥០នាក់ ,កងរាជអាវុធហត្ថលើផ្ទៃប្រទេសចំនួន១០០នាក់,កងរាជអាវុធហត្ថរាជធានីភ្នំពេញចំនួន១០០នាក់,កងពលតូចលេខ៧០ចំនួន១២២នាក់,ប្រជាការពារចំនួន៨៨នាក់ និងក្រុមយុវជន ចំនួន៣០នាក់៕ (កែសម្រួលដោយ ៖ ធីតា)
ចែករំលែកព័តមាននេះ