រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ កាលពីរសៀលថ្ងៃទី១៨ ខែតុលា ឆ្នាំ២០២០ បានសម្រេចចេញដីកាឃុំខ្លួនជនសង្ស័យម្នាក់ដាក់ពន្ធនាគារជាបណ្តោះអាសន្ន ក្រោមការចោទប្រកាន់ពីបទផលិតនិងរក្សាទុក កាន់កាប់រូបភាពអាសអាភាស ពាក់ព័ន្ធនឹងជនរងគ្រោះជាកុមារអាយុក្រោម១៨ឆ្នាំ ។
ជនសង្ស័យឈ្មោះ នន់ និមល ភេទប្រុស អាយុ៣៧ឆ្នាំ ជាអតីតចៅអធិការវត្ត មានទីលំ
នៅក្នុងភូមិអូរតាប៉ាង ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ ។
តាមគេហទំព័រហ្វេសប៊ុកនាយកដ្ឋាននគរបាលប្រឆាំងបទល្មើសបច្ចេកវិទ្យា ក្រសួងមហាផ្ទៃបង្ហោះជាផ្លូវការឲ្យដឹងថា កាលពីថ្ងៃទី១៤ខែតុលា ឆ្នាំ២០២០ ក្រោមការចង្អុលបង្ហាញពីនាយឧត្តមសេនីយ៍ នេត សាវឿន អគ្គស្នងការនគរបាលជាតិ និងនាយឧត្តមសេនីយ៍អគ្គស្នងការរង កម្លាំងនាយកដ្ឋានប្រឆាំងបទល្មើសបច្ចេកវិទ្យា ដោយមានការដឹកនាំបញ្ជាផ្ទាល់ពីលោកឧត្តមសេនីយ៍ឯក ជា ពៅ ប្រធាននាយកដ្ឋាន ក្រោមការសម្របសម្រួលពីឯកឧត្តមព្រះរាជអាជ្ញានៃអយ្យការអមសាលាដំបូងរាជធានីភ្នំពេញ សហការជាមួយស្នងការដ្ឋាននគរបាលខេត្តព្រះសីហនុ និងមន្ទីរធម្មការនិងសាសនាខេត្ត បានឃាត់ខ្លួនជនសង្ស័យឈ្មោះ នន់ និមល ជាអតីតចៅអធិការវត្ត ពាក់ព័ន្ធនឹងករណីផលិត និងរក្សាកាន់កាប់រូបភាពអាសអាភាសកុមារអាយុក្រោម១៨ឆ្នាំ ។
ក្រោយពីឃាត់ខ្លួននាំទៅសាកសួរ និងស្តាប់ចម្លើយសារភាពរបស់ជនសង្ស័យ ពិតជាជាប់ពាក់ពន្ធបទល្មើស ដូច្នោះ ទើបបានសមត្តកិច្ចកសាងសំណុំរឿង បញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមផ្លូវច្បាប់ កាលពីថ្ងៃទី១៧ ខែតុលា ឆ្នាំ២០២០ សំណុំរឿងនេះបានស្ថិតនៅដៃលោក សឿ ឡង់ឌី ព្រះរាជអាជ្ញារងបើកការស៊ើបសួរ ។
បន្ទាប់ពីសាកសួររួច តំណាងអយ្យការបានចោទប្រកាន់ជនសង្ស័យជាផ្លូវការ និងចាត់បញ្ជូនទៅចៅក្រមស៊ើបសួរសម្រេចឃុំខ្លួនអតីតចៅអធិការវត្តរូបនោះដាក់ពន្ធនាគារជាបណ្តោះអាសន្ន ៕
ចែករំលែកព័តមាននេះ