រាជធានីភ្នំពេញ ៖ ប្រិយមិត្តជាច្រើនដឹងរួចមកហើយថា ឈីន រតនៈ ជាតារាចម្រៀងដែលតស៊ូជាច្រើនឆ្នាំមកហើយក្នុងការបោះជំហ៊ានសិល្បៈ។ នាងបានឆ្លងកាត់រសជាតិ ប្រឡងចម្រៀងសំខាន់ៗ២ ដែលធ្វើឱ្យមហាជនទទួលស្គាល់ថា ជាជើងខ្លាំងម្នាក់។…
រាជធានីភ្នំពេញ ៖ ប្រិយមិត្តជាច្រើនដឹងរួចមកហើយថា ឈីន រតនៈ ជាតារាចម្រៀងដែលតស៊ូជាច្រើនឆ្នាំមកហើយក្នុងការបោះជំហ៊ានសិល្បៈ។ នាងបានឆ្លងកាត់រសជាតិ ប្រឡងចម្រៀងសំខាន់ៗ២ ដែលធ្វើឱ្យមហាជនទទួលស្គាល់ថា ជាជើងខ្លាំងម្នាក់។ យ៉ាងណា២លើក ឈីន រតនៈ ដ្បិតតែហក់ចូលដល់វគ្គចុងក្រោយ តែនាងបរាជ័យមិនបានកាន់ពាននោះទេ។ អារម្មណ៍មួយនេះនាងមិនខ្លាចនោះទេ តែនាងចង់សម្រេចបំណងជូនម្តាយ ព្រោះគាត់ចង់ឃើញណាស់។
ឈីន រតនៈ បានបង្ហូរទឹកភ្នែកក្នុងកម្មវិធីទូរទស្សន៍មួយ ដោយពោលពាក្យថា «ជាកូនសិស្សតែងតែចង់រៀន ឬប្រឡងឱ្យបានលេខ១យកពាន។ ប៉ុន្តែសម្រាប់នាងមិនបានសម្រេចបំណងនេះនៅឡើយទេ។ បើបីទោះជានាងចូលមកប្រឡងចម្រៀង២លើក តែនៅតែធ្វើមិនបានដល់គោលដៅ។
ជាក់ស្តែងកាលពីកន្លងទៅ នាងប្រឡងចុងក្រោយថ្ងៃប្រកាសអ្នកណាលើកពានគ្រានោះ ម្តាយនាងមកមើលផ្ទាល់ ហើយអង្គុយចំពីមុខឆាកតែម្តង។ ប៉ុន្តែពេលប្រកាសបានលើអ្នកផ្សេង នាងមើលទៅម្តាយហើយញញឹម តែអារម្មណ៍ពិបាកយកណាស់ ព្រោះស្នាមបែបនេះប៉ះម្តងហើយ។ នាងមិនខ្លាចចាញ់នោះទេ ប្រឡងមានឈ្នះ និងមានចាញ់។ ខ្លាចតែធ្វើទៅមិនដូចបំណងនាំឱ្យម្តាយពិបាកចិត្ត។ នាងមិនចង់ឱ្យម្តាយទុកចិត្តពេក ខ្លាចធ្វើមិនដល់គោលដៅ។
រតនៈ ដែលរស់នៅជាមួយម្តាយជាស្ត្រីមេម៉ាយតាំងពីតូច បានថ្លែងទៀតថា ម្តាយនាងមានជំងឺប្រចាំកាយតាំងពីនាងនៅក្មេង ប្រើថ្នាំពេទ្យរាប់ខែរាប់ឆ្នាំ។ មានពេលមួយ នាងមកពីរៀនគាត់ដួលសន្លប់ក៏ឃើញ។ គាត់តែងតែប្រាប់នាងថា ពិបាកណាស់ ថ្នាំពេទ្យលេបដូចហូបបាយហើយ បើថ្ងៃក្រោយបែបណា កូនមិនដឹងផ្ញើនៅនឹងអ្នកណា។
ជាមួយទឹកភ្នែក នាងនិយាយលួងម្តាយវិញថា កុំបារម្ភកូនស្រីនឹងរកលុយទិញថ្នាំ ផ្តល់អ្វីៗឱ្យម៉ាក់សប្បាយចិត្ត។ ពេលនោះហើយ ទើបនាងសម្រេចចិត្តបោះបង់ឯកសណ្ឋានសិស្សសាលាតាំងពីក្មេងទាំងស្តាយ ដើររកការងារធ្វើ និងច្រៀងតាមហាង។ រឿងខោអាវជាសិស្សសាលានេះ នាងមានក្តីស្រម៉ៃចង់ស្លៀកពាក់ដូចគេរហូតចប់ជានិស្សិត តែវាសនាកំណត់ឱ្យនាងរៀនមិនចប់ ព្រោះតែជីវភាព។ ដូចនេះហើយនាងក៏សោកស្តាយចំពោះការសិក្សានេះខ្លាំងណាស់។
ឈីន រតនៈ ធ្វើឱ្យគេស្គាល់កម្មវិធីប្រឡងចម្រៀងធំមួយលំដាប់ពិភពលោក ដោយវគ្គដំបូងនាងច្រៀងបទ «សាក់ហ្សូហ្វូនបាត់ស្នេហ៍» ច្រៀងស្រែកយ៉ាងរំពង រហូតគណៈកម្មាការចុចប៊ូតុងទាំង៤។ ចាប់តាំងពីពេលនោះមក នាងបានក្លាយជាផ្ទាំងស៊ីបការតាមដាន រហូតជាប់ដល់វគ្គចុងក្រោយប្រកាសពានបានទៅ ថែល ថៃ។
ដោយឡែកចូលប្រឡងចម្រៀងវគ្គ២ នាងក៏ខ្លាំងក្នុងការប្រើបច្ចេកទេសចម្រៀងច្រៀងដោយបទខ្លះតារាល្មមៗច្រៀងមិនបានទេ។ ម្ល៉ោះហើយនាងក៏ទាញការចាប់អារម្មណ៍ជាថ្មីខ្លះថា រវាង វី ឌីណែត និងនាងម្នាក់ណាលើកពានទៀតផង។
ចុងក្រោយ បានទៅលើ វី ឌីណែត ដោយ រតនៈ បានត្រឹមញញឹមសោកស្តាយ។ ទាំងអស់នេះជាបទពិសោធន៍មួយដល់តារាក្រោយៗទៀតឱ្យចេះពុះពាររឿងតស៊ូជាមួយអាជីពចម្រៀង ឬសិល្បៈសម្តែង។
ការងារសិល្បៈមិនមែនធ្វើមួយខែ២ខែល្បីល្បាញបាននោះទេ ប្រើពេលតស៊ូណាស់ទំរាំមានគេស្គាល់។ ចំណែកប្អូនៗនៅមានឱកាសសិក្សា គួរតែព្យាយាមរៀនឱ្យដល់គោលដៅ នៅពេលមានម្តាយឪពុកចាំមើលថែចំណាយទ្រព្យឱ្យរៀន មិនត្រូវឱ្យគាត់ខកបំណងឡើយ។
ចែករំលែកព័តមាននេះ