ខេត្តបន្ទាយមានជ័យ ៖ លោក ឌៀប ឈួន អភិបាលស្រុកថ្មពួកបានឱ្យដឹងថា ស្រុកថ្មពួករងគ្រោះដោយទឹកជំនន់ហូរធ្លាក់ពីថៃ បណ្តាលឱ្យលិចលង់ចំនួន៥ឃុំ ក្នុងស្រុកថ្មពួក ដែលបង្កផលប៉ះពាល់ចំនួន៤.២៣៦គ្រួសារ…
ខេត្តបន្ទាយមានជ័យ ៖ លោក ឌៀប ឈួន អភិបាលស្រុកថ្មពួកបានឱ្យដឹងថា ស្រុកថ្មពួករងគ្រោះដោយទឹកជំនន់ហូរធ្លាក់ពីថៃ បណ្តាលឱ្យលិចលង់ចំនួន៥ឃុំ ក្នុងស្រុកថ្មពួក ដែលបង្កផលប៉ះពាល់ចំនួន៤.២៣៦គ្រួសារ ស្មើនឹងចំនួន១១.៧៥៦នាក់ (ស្រី៦.០៤៩នាក់) ត្រូវបានជម្លៀសរកទីទួលសុវត្ថិភាពចំនួន៩៦គ្រួសារ និងមានអ្នកលង់ទឹកបាត់បង់ជីវិតចំនួន៣នាក់ លិចស្រូវ៥.២២៩ហិកតា ដំឡូងមី៧.៥០២ហិកតា ដំណាំរួមផ្សំលិចចំនួន២១ហិកតា លិចសាលារៀនចំនួន២៦កន្លែង វត្តមានចំនួន៨កន្លែង លិចផ្លូវទឹកហូរកាត់ច្រោះដាច់ចំនួន១១៣កន្លែង ស្មើនឹង៧២.៧៦២ម៉ែត្រ និងដាច់ទំនប់និងអាង៧កន្លែង ប្រវែង១,៩១៥ម៉ែត្រ។
លោក គឹម វណ្ណៈ អភិបាលរងខេត្តបន្ទាយមានជ័យ បានបញ្ជាក់ថា នៅស្រុកថ្មពួកត្រូវបានទឹកជំនន់ជន់លិចចាប់ពីថ្ងៃទី៤ រហូតដល់១៨ ខែតុលា ឆ្នាំ២០២០ កន្លងមកនេះ បង្កផលប៉ះពាល់យ៉ាងធ្ងន់ធ្ងរនៅពេលទឹកជំនន់ហូរធ្លាក់ពីថៃបានជន់លិចផ្ទះសំបែងបងប្អូនប្រជាពលរដ្ឋ និងលិចខូចខាងដាំណាំកសិកម្ម ព្រមទាំងផ្លូវ។
លោកបានបញ្ជាក់ថា ក្រោយទឹកជំន់បានជន់លិច និងប៉ះពាល់ប្រជាពលរដ្ឋ ហើយជាការខិតខំប្រឹងប្រែងអាជ្ញាធរត្រូវពិនិត្យស្ថានភាពប្រជាពលរដ្ឋ បើសិនជាលិចលង់ក្នុងស្ថានភាពធ្ងន់ ត្រូវជម្លៀសប្រជាពលរដ្ឋទៅរកទីទួលសុវត្ថិភាព ហើយជាក់ស្តែងត្រូវជួយសម្រួលចរាចរណ៍ជូនប្រជាពលរដ្ឋដែលរងគ្រោះដោយទឹកជំនន់។ ចំណែកផ្លូវជាតិតភ្ជាប់ពីស្រុកថ្មពួក ខេត្តបន្ទាយមានជ័យ ទៅកាន់ខេត្តឧត្តរមានជ័យត្រង់ចំណុចភូមិសាស្គ្រឃុំថ្មពួក ស្រុកថ្មពួក ដែលមានប្រវែងជាង១.០០០ម៉ែត្រត្រូវទឹកហូរកាត់ផ្តាច់ហើយត្រូវបានផ្អាកចរាចរណ៍ឆ្លងកាត់នៅពេលមានទឹកហូរកាត់ខ្លាំង។
លោក សុខ ចាន់ថា ប្រធានមន្ទីសារធារណៈការនិងដឹកជញ្ជូនខេត្តបានបញ្ជាក់ថា៖ជាការជូនដំណឹងស្តីពីផ្អាកចរាចរណ៍ជាបណ្តោះអាសន្នយានយន្តដឹកជញ្ជូនធុនធំគ្រប់ប្រភេទដែលធ្វើដំណើរឆ្លងកាត់តាមផ្លូវជាតិលេខ៥៦, ៥៨ និងផ្លូវខេត្តលេខ១៥៦ដេ ២៥៦៣ បន្ទាប់ពីទទួលរងឥទ្ធិពលព្យុះនិងភ្លៀងធា្លក់ជាប់បន្តបន្ទាប់បានបង្កអោយមានជំនន់ទឹកភ្លៀងជន់លិច និងហូរកាត់ផ្លូវមួយចំនួនក្នុងភូមិសាស្គ្រខេត្តបន្ទាយមានជ័យ៕ (កែសម្រួលដោយ ៖ ធីតា)
ចែករំលែកព័តមាននេះ