រាជធានីភ្នំពេញ៖ ក្នុងរយៈពេល៣ឆ្នាំចុងក្រោយស្វាយស្រស់អាចថា ការផ្គត់ផ្គង់ឈានទៅដល់ដំណាក់កាលមួយលើសពីតម្រូវការ ហើយតម្លៃធ្លាក់ចុះនៅពេលស្វាយមានច្រើននៅលើទីផ្សារ ។ ដោយមើលឃើញពីបញ្ហានិងឱកាសក្រុមហ៊ុនឬម្ចាស់ចំការស្វាយកែវរមៀតដែលមានផ្ទៃដីធំៗបានដាក់ពាក្យស្នើសុំនាំចេញស្វាយស្រស់ទៅកាន់ទីផ្សារតាមរយៈក្រសួងកសិកម្មរុក្ខាប្រមាញ់និងនេសាទ។
បើតាមប្រធានសហគមន៍ស្វាយកែវរមៀតគិរីរម្យ លោក អ៊ុ សាវឿន បានឱ្យដឹងថាក្នុងចំណោមសមាជិកសហគមន៍សរុបជាង៤០នាក់ មាន២៩នាក់ហើយដែលបានដាក់ពាក្យស្នើសុំនាំចេញស្វាយស្រស់ទៅប្រទេសចិន ហើយនៅក្នុងនោះសុទ្ធតែម្ចាស់ចំការស្វាយធំៗឬមានផ្ទៃដីដាំដុះស្វាយចាប់ពី៣០ ឬ៥០ហិកតា។
លោក អ៊ុសាវឿន បានឱ្យដឹងថា « ក្នុងចំណោម សមាជិតសហគមន៍ស្វាយកែវរមៀតគិរីរម្យជាង៤០គ្រួសារ បានទៅដាក់ពាក្យស្នើសុំនាំចេញផ្លែស្វាយស្រស់ទៅប្រទេសចិន បាន២៩នាក់ហើយ ។សម្រាប់អ្នកផ្សេងមិនទាន់បានទៅដាក់ពាក្យដោយសារ អ្នកខ្លះមានចំការស្វាយតិចតួចពេក ហើយអ្នកខ្លះទៀតដាំស្វាយចម្រុះលាយគ្នា។តែសម្រាប់ម្ចាស់ចំការ២៩នាក់នេះ គឺសុទ្ធតែដាំស្វាយសុទ្ធ ហើយម្នាក់ៗមានផ្ទៃដីចំការពី៥០ហិកតាដល់១០០ហិកតាឡើង។ជាក់ស្តែសម្រាប់គ្រួសារខ្ញុំ មានដីចំការ១៨០ហិកតា ក្នុងនោះប្រមាណ១០០ហិកតាបាននិងកំពុងផ្តល់ផល»។
ស្របពេលការដាក់ពាក្យស្នើសុំនាំចេញស្វាយស្រស់របស់ម្ចាស់ចំការនៅរងចំការចុះវាយតម្លៃបញ្ជាក់ពីមន្ត្រីជំនាញពាក់ព័ន្ធ ការដាំដុះស្វាយនៅកម្ពុជាក្នុងរយៈពេល៣ឆ្នាំចុងក្រោយនេះការផ្គត់ផ្គង់ស្វាយស្រស់នៅក្នុងលើសពីតម្រូវការ។
លោកលើកឡើងថា «ស្វាយនៅពេលបច្ចុប្បន្ននេះ ចូលទៅដល់លើសតម្រូវការក្នុងស្រុកទៅហើយរយៈពេល៣ឆ្នាំកន្លងមកនេះ។ ពេលស្វាយបានផលគ្រប់គ្នា តម្លៃធ្លាក់ចុះមក៣០០ឬ៤០០រៀលក្នុងមួយគីឡូក្រាមក៏មានដែរ។អីចឹងបានជាយើងខិតខំពុះពាររកទីផ្សារធំរបស់ចិន ក្រែងគ្រាន់បានស្រង់ដើមបានខ្លះ» ។
លោកបន្តថា តម្រូវការនិងតម្លៃស្វាយនៅកម្ពុជានៅពេលកន្លងមកក៏ដូចជាសព្វថ្ងៃនេះ គឺស្ថិតនៅលើឈ្មួញដែលបានបោះទីតាំងនៅស្រុកខ្មែរ។ អីចឹងយើងមានតែលក់ទៅឱ្យគេ ដល់ពេលណាគេថាច្រើន តម្លៃធ្លាក់ចុះ ។តែបើនិយាយពីការផលិតក្នុងស្រុកនៅពេលកន្លងមកមានរោងចក្រកែច្នៃ២ឬ៣ ទទួលយកមួយថ្ងៃបានត្រឹម១០ឬ២០តោន ធ្វើម៉េចស្រូបយកស្វាយអស់ បើមួយថ្ងៃគិតជាមធ្យមមាន១០០តោន៕
ចែករំលែកព័តមាននេះ