រាជធានីភ្នំពេញ ៖ វិនិយោគិនកូរ៉េខាងត្បូងបានចូលមកវិនិយោគនៅក្នុងប្រទេសកើនឡើងជាបន្តបន្ទាប់ ធ្វើអោយទុនវិនិយោគរបស់ប្រទេសនេះ នៅកម្ពុជាបានកើនឡើងដល់៥ពាន់លានដុល្លារអាមេរិក និងទំហំពាណិជ្ជកម្មនៃប្រទេសទាំងពីរក៏បានកើនឡើងដល់ជាង១ពាន់លានដុល្លារអាមេរិកផងដែរ គិតត្រឹមដំណាច់ឆ្នាំ ២០១៩ ។ នេះបើតាមការបញ្ជាក់ពី Park Heung-Kyeong ឯកអគ្គរដ្ឋទូតថ្មីនៃសាធារណរដ្ឋកូរ៉េ ប្រចាំព្រះរាជា ណាចក្រកម្ពុជាថ្លែងនៅក្នុងជំនួបជាមួយសម្ដេចហេង សំរិនប្រធានរដ្ឋសភាជាតិកម្ពុជា កាលពីព្រឹកថ្ងៃទី១៩ តុលា ២០២០ ។
លោក Park Heung-Kyeong បានមានប្រសាសន៍ឲ្យដឹងថា កម្ពុជា និងកូរ៉េ បានពង្រីកកិច្ចសហប្រតិបត្តិការរវាងគ្នាកាន់តែខ្លាំងឡើងពីមួយឆ្នាំទៅមួយឆ្នាំ ហើយនៅដើមខែវិច្ឆិកា ២០២០ខាងមុខនេះ ប្រធានរដ្ឋសភានៃសាធារណរដ្ឋកូរ៉េ លោក Park Byeong-seung នឹងអញ្ជើញមកទស្សនកិច្ចនៅព្រះរាជាណាចក្រកម្ពុជា ដើម្បីពង្រឹង និងពង្រីកក៏ដូចជាបង្កើននូវកិច្ចសហប្រតិបត្តិការរវាងរដ្ឋសភាប្រទេសទាំងពីរឲ្យកាន់តែរឹងមាំឡើង ។
លោកបានបន្តថា នៅក្នុងរយៈពេលប៉ុន្មានឆ្នាំចុងក្រោយនេះ ទំនាក់ទំនងខាងផ្នែកនយោបាយ សេដ្ឋកិច្ច ពាណិជ្ជកម្ម និងការផ្លាស់ប្តូរប្រជាជននៃប្រទេសទាំងពីរ មានការរីកចម្រើនខ្លាំងគួរឲ្យកត់សម្គាល់ ។ ទំហំពាណិជ្ជកម្មរវាងកម្ពុជា និងកូរ៉េក្នុងឆ្នាំ ២០១៩កន្លងទៅបានកើនឡើងដល់ជាង១ពាន់លានដុល្លារអាមេរិក ហើយ ទុនវិនិយោគមកពីប្រទេសកូរ៉េមកវិនិយោគនៅកម្ពុជាវិញមានតម្លៃប្រមាណ៥ពាន់លានដុល្លារអាមេរិកផងដែរ មកដល់ពេលបច្ចុប្បន្ននេះ និងបានធ្វើឲ្យកូរ៉េក្លាយជាប្រទេសទី២ ក្នុងការវិនិយោគនៅកម្ពុជា ។
លោកបានបន្ថែមថា មិនតែប៉ុណ្ណោះ បច្ចុប្បន្ន កម្ពុជានិងកូរ៉េ ក៏កំពុងនឹងចរចានូវកិច្ចព្រមព្រៀងពាណិជ្ជកម្មសេរី និងគ្រោងបញ្ចប់ការចរចានៅអំឡុងខែក្រោយនេះ ដើម្បីឈានទៅចុះហត្ថលេខាដាក់ដំណើរការកិច្ចព្រមព្រៀងនេះជាធរមាននៅពេលឆាប់ ។ លោកថា៖« នៅពេលកិច្ចព្រមព្រៀងប្រទេសទាំងពីរចូលជាធរមាន វានឹងជំរុញឲ្យទំហំពាណិជ្ជកម្ម និងការវិនិយោគកាន់តែមានការកើនឡើង ហើយវិនិយោគិនកូរ៉េនឹងមកកម្ពុជាបន្ថែម ដើម្បីស្វែងរកការវិនិយោគក្នុងវិស័យផ្សេងៗដែលមានសក្ដានុពល » ។
សម្តេចអគ្គមហាពញាចក្រី ហេង សំរិន ប្រធានរដ្ឋសភាជាតិកម្ពុជា បានលើកឡើងថា សាធារណរដ្ឋកូរ៉េ បាននិងកំពុងដើរតួយ៉ាងសំខាន់ក្នុងការចូលរួមអភិវឌ្ឍន៍ ប្រទេសកម្ពុជា ដូចជាហេដ្ឋារចនា សម្ព័ន្ធ សុខាភិបាល និងអភិវឌ្ឍន៍ជនបទជាដើម ។ សម្តេចបានស្នើសុំសាធារណរដ្ឋកូរ៉េបន្ថែមចំនួន កូតាពលរដ្ឋខែ្មរ ទៅធ្វើការងារនៅកូរ៉េទៀត ។
បច្ចុប្បន្ននេះ បើតាមការបញ្ជាក់ពីមន្ត្រីទូតកូរ៉េប្រចាំកម្ពុជាបានឲ្យដឹងពលករកម្ពុជាកំពុងបម្រើការនៅក្នុងប្រទេសកូរ៉េ មានចំនួនជាង៤ម៉ឺននាក់ ។
គួរបញ្ជាក់ថា គម្រោងវិនិយោគធំៗមួយចំនួននៅកម្ពុជា ក្រោមការវិនិយោគរបស់វិនិយោគិនកូរ៉េ បាននិង កំពុងពង្រីកខ្លួនបន្តិចម្ដងៗ ជាក់ស្ដែងគម្រោងទីក្រុង ប៊ូយ៉ុងនៅផ្លូវសហព័ន្ធរុស្ស៊ី គម្រោងទីក្រុងកាំកូស៊ីធី ក្រុមហ៊ុនលក់រថយន្ត ក្រុមហ៊ុនផ្គត់ផ្គង់ថាមពល និងក្រុមហ៊ុនជាច្រើនទៀតផងដែរ ៕
ចែករំលែកព័តមាននេះ