អាជីវករចាំបាច់ត្រូវការជំនួយផ្នែកទីផ្សារដើម្បីឆ្លើយតបទៅនឹងការផ្លាស់ប្តូរនានាក្នុងសេដ្ឋកិច្ចព្រោះតែកូវីដ ១៩។ អ្នកស្រី ជេនីហ្វឺ ខេម (Jennifer Kem) ដែលជានាយកប្រតិបត្តិរបស់ The Master Brand Institute បានឆ្លងកាត់ឧបសគ្គនេះហើយនៅពេលដែលសហរដ្ឋអាមេរិកប្រឈមមុខនឹងវិបត្តិសេដ្ឋកិច្ចក្នុងឆ្នាំ ២០០៨ និង ២០០៩។
អាជីវកម្មរបស់អ្នកស្រីបានប្រកាសក្ស័យធុន អ្នកស្រីបានខ្ចីលុយពីម្តាយ និងអ្នកដទៃដើម្បីចាប់ផ្តើមសាជាថ្មីសម្រាប់ខ្លួនឯង និងកូនស្រីទាំងពីររបស់អ្នកស្រី។ បច្ចុប្បន្នអ្នកស្រីជានាយកប្រតិបត្តិរបស់ក្រុមហ៊ុនពីរដែលមានជំនាញផ្នែកបង្កើតប្រេន និងផ្តល់ទីប្រឹក្សាផ្នែកផ្សព្វផ្សាយ។ខាងក្រោមគឺជារូបមន្តសំខាន់ៗដែលអ្នកស្រីបានបង្កើតដើម្បីជួយដល់អ្នកដឹកនាំអាជីវកម្មដទៃក្នុងការបង្កើនប្រាក់ចំណូលមិនថាសេដ្ឋកិច្ចកំពុងមានស្ថានការបែបណា។
១. ផ្នត់គំនិត
ជំហានដំបូងក្នុងរូបមន្តខាងលើនេះគឺការមានផ្នត់គំនិតជាអ្នកដឹកនាំអាជីវកម្មពិតប្រាកដ។ ក្នុងពេលដែលជួបនឹងបញ្ហាអ្នកមានជម្រើសពីរ ចុះចាញ់ ឬគិតថាវាជាឱកាសក្នុងការដឹកនាំ។ ប្រេនធំៗជាច្រើនដែលអ្នកអាចមើលឃើញក្នុងថ្ងៃនេះបានជោគជ័យក្នុងពេលដែលសេដ្ឋកិច្ចមានវិបត្តិ។ Microsoft បានជោគជ័យបន្ទាប់ពីមានវិបត្តសេដ្ឋកិច្ចក្នុងឆ្នាំ ១៩៧៣។
ទោះជាប្រាក់ចំណេញរបស់អ្នកទទួលរងការប៉ះពាល់ពិតមែនក្តី អ្នកគួរផ្តោតស្មារតីលើការចូលរួមរបស់អ្នកទៅវិញព្រោះអតិថិជនរបស់អ្នកនៅតែចងចាំអំពើល្អៗ ឬសេវា និងផលិតផលល្អៗដែលអ្នកបានផ្តល់ជូនពួកគេ។
២. ការទំនាក់ទំនង
ក្នុងពេលដែលមានវិបត្តិ អតិថិជនរបស់អ្នកក៏ត្រូវការជំនួយដែរ ដូច្នេះអ្នកត្រូវតែរក្សាការទំនាក់ទំនងជាមួយអតិថិជនរបស់អ្នកដោយយកសហគមន៍ជាធំ។ បើអ្នកមានសមត្ថភាព អ្នកក៏អាចចូលរួមជួយបរិច្ចាគនិងចេញមុខធ្វើសកម្មភាពដែលជួយដល់សហគមន៍របស់អ្នកដែរ។
ជាមួយគ្នានេះដែរ យោងតាមបទពិសោធន៍ផ្ទាល់ខ្លួន និងក្នុងការងាររបស់អ្នក តើអ្នកបានសម្រេចបានអ្វី និងរៀនបានអ្វីដែលអាចធ្វើឲ្យអតិថិជនរបស់អ្នកជឿទុកចិត្តអ្នកបាន?
៣. ការផ្សព្វផ្សាយ
អ្នកអាចចាប់ផ្តើមគិតពីវិធីក្នុងការយកអ្វីដែលអ្នក ឬអាជីវកម្មរបស់អ្នកទៅលក់លើប្រព័ន្ធសង្គម។ បន្ទាប់មកផ្សព្វផ្សាយពីអ្វីដែលអ្នកមាន និងអ្វីដែលអ្នកអាចជួយអ្នកដទៃបាន។ ប្រសិនបើអ្នកមិនទាន់មានជំនឿចិត្តលើផលិតផល ឬសេវាកម្មថ្មីទាំងស្រុងទេ អ្នកអាចធ្វើការសាកល្បងជាមុនសិនដើម្បីជៀសវាងការខាតបង់ធ្ងន់ធ្ងរ ៕
ចែករំលែកព័តមាននេះ