រាជធានីភ្នំពេញ ៖ ជនសង្ស័យម្នាក់ទើបតែចេញពីមណ្ឌលកែប្រែបន្សាបគ្រឿងញៀនបាន២ថ្ងៃ ក៏ត្រូវកម្លាំងនគរបាលប៉ុស្តិ៍ផ្សារថ្មីទី១ ចាប់ឃាត់ខ្លួន ក្រោយពីរូបគេបានធ្វើសកម្មភាពឆក់ទូរស័ព្ទដៃមួយគ្រឿងរបស់ស្ត្រីម្នាក់ដែលកំពុងតែឈររើសរកទិញខោអាវនៅតូបមួយកន្លែងនៅក្នុងផ្សារធំថ្មី បានសម្រេច ហើយព្យាយាមរត់គេចខ្លួន តែជនរងគ្រោះបានឃើញទាន់ក៏ស្រែកឆោឡោអោយគេឯងជួយដេញចាប់ផ្អើលពេញផ្សារ និងត្រូវបានកម្លាំងសមត្ថកិច្ចឈរជើងគោលដៅខាងក្រៅផ្សារជួយចាប់បាន។
ហេតុការណ៍ខាងលើនេះបានកើតឡើងកាលពីវេលាម៉ោង១០និង៣០នាទីព្រឹកថ្ងៃទី១៩ ខែ តុលា ឆ្នាំ ២០២០ នៅចំណុចក្នុងផ្សារធំថ្មី ស្ថិតក្នុងសង្កាត់ផ្សារថ្មីទី១ ខណ្ឌដូនពេញ។
តាមប្រភពព័ត៌មានពីនគរបាលបានប្រាប់ឱ្យដឹងថា ជនសង្ស័យដែលត្រូវឃាត់ខ្លួនខាងលើឈ្មោះ ទូច សុវណ្ណរតនៈ ភេទប្រុស អាយុ២៣ឆ្នាំ មុខរបមិនពីតប្រាកដ ស្នាក់នៅផ្ទះលេខ ៤៧E2 ផ្លូវលេខ ១២៦ (ក្បែរផ្សាថ្មី) ក្នុងសង្កាត់ផ្សារថ្មីទី១ ខណ្ឌដូនពេញ រាជធានីភ្នំពេញ ។ ចំណែកស្ត្រីរងគ្រោះជាម្ចាស់ទូរស័ព្ទមិនស្គាល់អត្តសញ្ញាណនោះទេ មានអាយុជិត៥០ឆ្នាំ ។
តាមប្រភពដដែលបានបន្តថា មុនពេលកើតហេតុ ស្ត្រីរងគ្រោះកំពុងតែឈររើសរកទិញខោអាវនៅតូបលក់ខោអាវមួយកន្លែងនៅក្នុងផ្សារធំថ្មី ដោយបានដាក់ទូរស័ព្ទមួយគ្រឿងរបស់គាត់នៅលើគំនរខោអាវក្បែរដៃ ពេលនោះស្រាប់តែជនសង្ស័យដើរមកក្បែរ និងធ្វើសកម្មភាពឆក់យកបាន និងរត់គេចតែម្តង ។
តាមប្រភពដដដែលបានប្រាប់បន្តទៀតថា នៅពេលជនសង្ស័យឆក់យកទូរស័ព្ទមួយគ្រឿងខាងលើបានហើយក៏ព្យាយាមរត់គេចខ្លួននោះ ស្ត្រីរងគ្រោះក៏បានឃើញទាន់ និងស្រែកឆោឡោអោយគេឯងជួយ និងរត់ដេញតាម រហូតដល់ខាងក្រៅផ្សារទើបកម្លាំងនគរបាលប៉ុស្តិ៍ផ្សារថ្មីទី១ ដែលឈរជើងនៅគោលដៅជុំវិញផ្សារជួយចាប់បាន និងនាំខ្លួនយកមកកាន់ប៉ុស្តិ៍ភ្លាមៗផងដែរ។
តាមប្រភពដដែលបានប្រាប់បន្តទៀតថា ជនសង្ស័យនេះជាមនុស្សញៀនថ្នាំដែលតែងតែធ្វើសកម្មភាពអុកឡុកនៅក្នុងមូលដ្ឋាន និងត្រូវចាប់បញ្ជូនទៅមណ្ឌលកែប្រែបន្សាបគ្រឿងញៀនជាច្រើនលើកច្រើនសារមកហើយ និងទើបតែចេញមកនៅផ្ទះបានតែ២ថ្ងៃប៉ុណ្ណោះ ក៏មកធ្វើសកម្មភាពឆក់ទូរស័ព្ទរបស់ស្ត្រីរងគ្រោះ និងត្រូវចាប់ជាថ្មីម្តងទៀតនាពេលនេះ។
ក្រោយពេលកើតហេតុ ទូរស័ព្ទមួយគ្រឿងខាងលើនោះត្រូវបានប្រគល់ទៅអោយស្ត្រីជាម្ចាស់វិញ ចំណែកឯជនសង្ស័យ ក្រោយពីធ្វើការចាប់ឃាត់ខ្លួននិងធ្វើការសាកសួរនៅនគរបាលប៉ុស្តិ៍ផ្សារថ្មីទី១រួចហើយ ក៏បានបញ្ជូនខ្លួនទៅកាន់អធិការដ្ឋាននគរបាលខណ្ឌដូនពេញ ដើម្បីចាត់ការទៅតាមផ្លូវច្បាប់ជាបន្តទៅទៀត ៕ (កែសម្រួលដោយ ៖ ធីតា)
ចែករំលែកព័តមាននេះ